JOSHUA 4 - Biblia Ilagho Jiboie Kwa Wandu Wose

Kudunga magho gha lukumbuso

¹ Nao iji wandu wose wameria kuruwuka, BWANA ukamzera Joshua,

² “Wada wandu ikumi na wawi, mundu umweri kufuma kwa kula kichuku;

³ kuwilaghire wishoo magho ikumi na awi kufuma ghadi na ghadi ya Jordani, aeni chwau ra wakohani rerewadirieghe wiko kimusi; mughido na kughiwika andonyi andu mchaalala ichi kio.”

⁴ Niko Joshua ukawiwanga awo wandu orewisaghueghe ikumi na wawi, mundu umweri kufuma kwa kula kichuku cha Israeli;

⁵ ukawizera, “Seenyi mngie modenyi ghwa Jordani, muide andu Sanduku ya BWANA Mlungu onyu iko, mshoo kula mundu igho na kughiduka maweghenyi konyu kunughana na mtalo ghwa wandu wa Israeli;

⁶ iyo ichakaia ni alama aghadi konyu ngelo wana wenyu wa kivalwa chichagha wichaamkotia kutambua kwaro magho agho.

⁷ Niko mchawighoria angu machi gha moda ghwa Jordani gheredumbukieghe imbiri ya Sanduku ya Ilaghano ja BWANA, iji ereruwukieghe Jordani, na agha magho ghichakaia lukumbuso lwa toe kwa wandu wa Israeli, lwa agho gherebonyekieghe.”

⁸ Awo wandu wa Israeli wikabonya sa iji koni werezereloghe ni Joshua, wikashoa magho ikumi na awi kunughana na vichuku ikumi na viwi va wandu wa Israeli, sa iji koni BWANA oremlaghirieghe Joshua; wikaruwuka nagho Jordani hata andu aja weredungieghe kambi, wikaghiwika andonyi.

⁹ Na Joshua wori, oredungieghe magho ikumi na awi aighu ya andu chwau ra wakohani awo weredukieghe Sanduku ya Ilaghano rerewadirieghe. Agho magho ghaduagha aeni aho.

¹⁰ Angu wakohani werekaieghe kimusi aghadi ya Jordani, hata malagho ghose BWANA oremlaghirieghe Joshua uwighorie wandu ghikameria kubonywa seji Musa oremlaghirieghe Joshua. Wandu wikashashira kuruwuka moda.

¹¹ Wandu wose wiendaruwuka, awo wakohani weredukagha Sanduku ya BWANA, wikakiria imbiri ya wandu.

¹² Wana wa Reubeni, na wa Gadi, na nusu ya kichuku cha Manase wikaruwuka wirwae maswagha imbiri ya wandu wa Israeli sa iji koni Musa orewilaghirieghe.

¹³ Wandu elfu mirongo ina wikaida imbiri ya BWANA, wirwae maswagha kwa wuda wurindinyi ghwa Jeriko.

¹⁴ Ituku ijo, BWANA ukamjosa Joshua imbiri ya Waisraeli wose, wikamneka Joshua ishima matuku ghose gha irangi jake sa iji koni weremnekieghe ishima Musa.

¹⁵ BWANA ukamlaghira Joshua

¹⁶ uwizere wakohani wawuyaduka Sanduku ya Ilaghano wijoke kufuma Jordani.

¹⁷ Joshua ukabonya wokoni.

¹⁸ Nao iji awo wakohani wiidukagha Sanduku ya Ilaghano ja BWANA wajoka kufuma Jordani, wiendawadia mbai na mbai ya moda, agho machi ghikachua na kudika dika sa iji koni gherekoghe.

¹⁹ Wandu wikaruwuka Jordani ituku ja ikumi ja mori ghwa imbiri wikadunga kambi Gilgali, cha mashariki ya Jeriko.

²⁰ Joshua ukadunga agho magho ikumi na awi wereghidwaeghe Jordani, aho Gilgali.

²¹ Ukawizera wandu wa Israeli, “Wana wenyu wikawikotia weke ndee matuku ghichagha kutambua kwaro magho agho,

²² mchawighoria kukaia wandu wa Israeli wereruwukieghe moda ughu ghwa Jordani aighu ya ndoe iomie.

²³ Angu BWANA Mlungu onyu oreomeshereghe machi gha Jordani kwa wundu ghonyu hata mkameria kuruwuka; sa iji oreomeshereghe machi gha Bahari ya Shamu kwa wundu ghodu;

²⁴ eri wandu wose wa ndoenyi wipate kumanya kukaia ndighi ra BWANA reko aeni; nenyo mpate kumuobua BWANA Mlungu onyu kwa kala na kala.”