JOSHUA 24 - Biblia Ilagho Jiboie Kwa Wandu Wose

Joshua kughora na wandu aho Shekemu

¹ Nao Joshua ukakwanya vichuku vose va Israeli aho Shekemu. Ukawiwanga waghosi na vilongozi, watanyi na wabaa wa Israeli; nawo wikacha imbiri ya Mlungu.

² Joshua ukawizera wandu wose, “BWANA Mlungu wa Israeli waghamba huwu, ‘Kala weke ndeyo Tera, ndee Abrahamu na Nahori werekoghe wikikaia kimonu cha Moda ghwa Eufrate na kutasa milungu mizima.

³ Niko ngamsaghua ndeyo Abrahamu kufuma kwa ijo isanga, ngamruwusa kimonu cha Moda ghwa Eufrate na kumghenja aghadi ya isanga jose ja Kanaani, na kumneka kivalwa kingi. Ngamneka Isaaka,

⁴ na kwa Isaaka ngamneka Jakobo na Esau. Niko ngamneka Esau na isanga ja mighondinyi ja Seiri jikaie ifwa jake, ela Jakobo na wana wake wikasea cha Misri.

⁵ Niko ngawiduma Musa na Haruni, ngawikaba Wamisri kwa agho nereghibonyereghe aghadi kwawo, konyuma ngamfunya aho.

⁶ Ngawifunya weke ndeyo Misri wikacha hata baharinyi, na Wamisri wikawinugha na magare ghawo hata Bahari ya Shamu.

⁷ Hata iji wanikemia ngangira kira ghadi na ghadi yawo na Wamisri, ngaibonya bahari iwimile Wamisri na kuwifinikira; meso ghawo ghikawona seji nawibonya Wamisri; nenyo mkakaia kireti kwa ngelo ndacha.

⁸ Niko ngamreda kwa isanga ja Waamori awo werekoghe mashariki ya Jordani. Wikalwa nenyo, ela ngawingira mikonunyi konyu, mkajiwusa isanga jawo, nani ngawitotesha imbiri konyu.

⁹ Niko Balaki mwana wa Sipori mzuri wa Moabu ukawuka kulwa na Israeli, ukaduma kummbanga Balaamu mwana wa Beori upate kummbwasira njowe,

¹⁰ ela ngalegha kumsikira Balaamu; kwa huwo ukamrasimia inyo, nani ngamkira kufuma kwa Balaki.

¹¹ Mkaruwuka Jordani mkacha Jeriko; wandu wa Jeriko wikalwa nenyo, na wokoni Waamori, Waperizi, Wakanaani, Wahiti, Wagirgashi, Wahivi na Wajebusi; nawo ngawingira mikonunyi konyu.

¹² Na kwa wazuri wawi wa Waamori, nerewidumieghe ngalamvu kuwisumbua rikawiwinga imbiri konyu; hata ndewerefumieghe kwa wundu ghwa inyo kutumia lufu angu ndana anduangi.

¹³ Neremnekieghe isanga mserejidumikieghe, na mizi msereiaghieghe; nenyo mwadakaia aho. Mwadaaja matunda gha mizabibu na gha mizeituni msereiwaeghe.’”

¹⁴ Joshua ukachuria kughora, “Idana mumneke ishima na kumdumikia BWANA kwa ngolo na kwa wuloli, muinje nambai milungu ya weke ndeyo wereidumikieghe aho Mesopotamia na Misri, mpate kumdumikia BWANA.

¹⁵ Na ikakaia mwalegha kumdumikia, msaghuo idime iji ngera ni milungu iyo eredumikiloghe ni weke ndeyo aho Mesopotamia angu ngera ni milungu ya Waamori awo mwawuyakaia isanga jawo; ela ini na nyumba yapo nichamdumikia BWANA.”

¹⁶ Niko awo wandu wikamtumbulia, “Jingi ndedichaamsigha BWANA wei diidumikie milungu mizima.

¹⁷ Kwa kukaia BWANA Mlungu odu nuo oredifunyireghe isi na weke aba kufuma isanga ja Misri, iyo nyumba ya wazumba; nao nuo orebonyereghe rija alama mbaa imbiri ya meso ghedu, ukadilindia chia yose derekoghe dikighenda, na aghadi ya wandu wose derekoghe dikiwiida;

¹⁸ na BWANA ukawiwinga wandu wose imbiri kodu awo Waamori werekoghe wikikaia aha. Kwa huwo isi wori dichamdumikia BWANA, angu uo ni Mlungu odu.”

¹⁹ Joshua ukawizera awo wandu, “Mwadima kulemwa ni kumdumikia BWANA, kwa kukaia uo ni Mlungu Mweli, Mlungu ukunde kutaswa uekeri, nao ndechaamfuya wughoma makosa na kaung'a renyu.

²⁰ Mkamsigha BWANA na kudumikia milungu mizima, uchamghaluka na kum'bonya kiwiwi, na kummeria, hata ngera orekoghe uki'bonyera nicha.”

²¹ Awo wandu wikamzera Joshua, “Hata! Isi dichamdumikia BWANA.”

²² Joshua ukawizera, “Mwakushuhudia mmbeni kukaia mwasaghua BWANA mpate kumdumikia.” Wikamtumbulia, “Isi de washahidi.”

²³ Ukawizera, “Basi injenyi milungu yenyu ya kighenyi iko aghadi konyu, na kukufunya kwa BWANA Mlungu wa Israeli kwa ngolo renyu.”

²⁴ Awo wandu wikamzera Joshua, “Dichamdumikia BWANA Mlungu odu, na kumsikira.”

²⁵ Niko Joshua ukabonya ilaghano na awo wandu ituku ijo, ukawika sharia na malaghiro aighu yawo uko Shekemu.

²⁶ Joshua ukaandika agho malagho andenyi ya chuo cha Sharia ya Mlungu, ukashoa igho ibaa, ukajidunga kimusi aisi ya mualoni ghuko andu kwa wueli kwa BWANA.

²⁷ Joshua ukawizera wandu wose, “Olenyi iji igho jichawuya mshahidi aighu yedu, angu jasikira malagho ghose BWANA wadizera. Kwa huwo jichakaia mshahidi aighu yenyu eri msechemlegha Mlungu onyu.”

²⁸ Joshua ukawisigha wandu wighende kula mundu andu kwa ifwa jake.

Kufwa kwa Joshua na Eleazari

²⁹ Nyuma ya agho, Joshua mwana wa Nuni, mdumiki wa BWANA ukafwa, uko na miaka ighana na ikumi.

³⁰ Wandu wikamrika mbuwenyi ya ifwa jake aho Timnathi-sera, iko isanga ja mighondinyi ja Efraimu, kaskazinyi ya Mghondi ghwa Gaashi.

³¹ Waisraeli wikamdumikia BWANA matuku ghose gha Joshua, na gha waghosi awo werekwanyeghe na Joshua, awo wose wererimanyireghe iro kazi BWANA orebonyereghe kwa Waisraeli.

³² Josefu uo orefueghe Misri, wandu wa Israeli weremdwaeghe na kumrika aho Shekemu; andenyi ya mbuwa iyo Jakobo oreighueghe kufuma kwa wana wa Hamori ndee wawo Shekemu kwa bei ya vibelele va feza ighana, nayo ikawuya ifwa ja kivalwa cha Josefu.

³³ Eleazari mwana wa Haruni ukafwa. Wikamrika aho Gibea, muzi ghwa isanga ijo jerenekeloghe mwana wake Finehasi.