JOSHUA 23 - Biblia Ilagho Jiboie Kwa Wandu Wose

Malagho gha Joshua ghwa kutua

¹ Nyuma ya matuku mengi, BWANA ukawineka Waisraeli kuhora na sere kufuma kwa wamaiza wawo wose werewimarieghe chia rose. Joshua orekoghe waghosia nandighi.

² Niko ukawiwanga Waisraeli wose waghosi na vilongozi vawo, watanyi na wabaa wawo, ukawizera, “Ini naghosia nandighi.

³ Mwamerie kuwona seji BWANA Mlungu onyu uwibonyere wandu wa iri mbari rose kwa wundu ghonyu, kwa kukaia BWANA Mlungu onyu orekoghe ukimluya wuda.

⁴ Namerie kuwaghia vichuku venyu ifwa ja isanga iji ja wandu wisigharikie, chiaimweri na iji ja wandu nimerie kuwisima; kufuma Jordani hata Bahari ya Mediterania cha magharibi.

⁵ BWANA Mlungu onyu uchawisindika noko nyuma na kuwiwinga imbiri ya meso ghenyu; nenyo mchajiwusa isanga jawo sa iji koni BWANA Mlungu onyu orelaghirieghe.

⁶ Kwa huwu mkaie mmange mkiwadia agha ghose ghiandikilo chuonyi cha Sharia ya Musa kuseko na kuighalukia na mbai;

⁷ eri msechewadana na mbari ra wandu wisigharikie aghadi konyu, angu kuighora milungu yawo, angu kughema, angu kuidumikia, angu kuighoghomia.

⁸ Ela mmbwadane na BWANA Mlungu onyu, sa iji koni m'bonyere hata ituku ja linu.

⁹ BWANA orewingieghe mbari mbaa ra wandu wiwadie ndighi imbiri konyu, na hata mndungi nderedimieghe kusimana nenyo hata idime.

¹⁰ Mundu onyu umweri wadima kuwinga wandu elfu imweri, kwa kukaia ni BWANA Mlungu onyu umluyagha wuda, sa iji koni oremlaghirieghe.

¹¹ Kwa huwo mkulindie; mumkunde BWANA Mlungu onyu.

¹² Mkaghaluka na kukukwanya na masighariko gha wandu wisigharikie aha aghadi konyu, na kuloworana nawo wai wawo na wai wenyu,

¹³ mmanye kwa loli angu BWANA Mlungu ndechaakaia ukiwiwinga wandu wa iri mbari imbiri msevikie, ela wichaghaluka kukaia shaghala na mdegho konyu na sa kiboko chemkaba mbarunyi konyu na sa minjwa edunga meso ghenyu, hata mwameria kutota na kufuma kwa iji isanga jiboie ijo morenekeloghe ni BWANA Mlungu onyu.

¹⁴ “Na idana ngelo yapo yalighisa, nenyo mmbeni mwamanya andenyi ngolonyi konyu na rohonyi konyu kukaia ndemsowie kilambo chingi kicha cha ivo BWANA Mlungu onyu oremlaghirieghe. Ndekuwadie jingi ja malaghiro ghake usejikatishire.

¹⁵ Na sa iji koni BWANA Mlungu oremnekieghe maza rose ndicha karakara na ilaghiro jake, ni huwokoni uchamredia mawiwi ghose hata wameria kumtotesha mmbose na kumfunya kwa iji isanga jiboie BWANA Mlungu onyu oremnekieghe;

¹⁶ ikakaia mwajichikanya ilaghano jake ijo oremlaghirieghe, nao mfume kuidumikia milungu mizima na kuighoghomia, aho niko BWANA uchajokwa ni machu aighu yenyu, nenyo mchatota shwa wori na kusoweka andenyi ya ijo isanga jiboie oremnekieghe.”