JOSHUA 21 - Biblia Ilagho Jiboie Kwa Wandu Wose

Mizi ya Walawi

¹ Niko vilongozi va kichuku cha Lawi wikamchea mkohani Eleazari, Joshua mwana wa Nuni, na waghosi wa vichuku vose va Israeli;

² wikawizera aho Shilo isanga ja Kanaani, “Mlungu oreghorieghe kwa momu ghwa Musa kukaia, isi nesi dineko mizi ekaia chiaimweri na milamba elishira mfugho redu.”

³ Niko wandu wa Israeli wikawineka Walawi kwa momu ghwa BWANA mizi inughagha ikaie andu kwawo kokaia, na milamba elishira mfugho kufuma kwa ijo ifwa jawo.

⁴ Kura ya imbiri ikafuma ya Wakohathi wa kichuku cha Lawi kunughana na nyumba rawo. Kwa huwo Walawi werekoghe kivalwa cha mkohani Haruni werepatireghe mizi ikumi na idadu kufuma kwa kichuku cha Juda, na cha Simeoni, na cha Benjamini.

⁵ Wandu wazima wa kivalwa cha Kohathi werenekeloghe mizi ikumi kufuma kwa kichuku cha Efraimu, kichuku cha Dani, na cha Manase ya magharibi.

⁶ Kivalwa cha Mlawi Gershoni cherenekeloghe mizi ikumi na idadu kufuma kwa kichuku cha Isakari, na cha Asheri, na cha Naftali, na cha Manase ya mashariki iko Bashani.

⁷ Kivalwa cha mlawi Merari cherenekeloghe mizi ikumi na iwi kufuma kwa kichuku cha Reubeni, na cha Gadi, na cha Zebluni.

⁸ Wandu wa Israeli werefunyireghe iyo mizi kwa Walawi na milamba yaro elishira kwa chia ya kura, sa iji koni Mlungu oreghorieghe kwa momu ghwa Musa.

⁹ Agha nigho marina gha mizi erefunyiroghe ni kichuku cha Juda na Simeoni

¹⁰ ikanekwa kivalwa cha Haruni, awo werekoghe kinyumba cha Kohathi, kichuku cha Lawi, angu wereghuloghe ni kura ya imbiri.

¹¹ Wikanekwa Kiriath-araba (uo Arba orekoghe ndee wake Anaki) nagho idana ghwadawangwa Hebroni, isanga ja mighondinyi ja Juda, chiaimweri na mlamba gholishira ghuko mbai-mbai yaro.

¹² Ela mbuwa ra muzi na mizi yaro mitini, erenekeloghe Kalebu mwana wa Jefune ikaie ifwa jake.

¹³ Chiaimweri na kunekwa Hebroni, ugho muzi ghorefunyiroghe ghukaie ghumu ghokimbiria kwa wundu ghwa m'bwaghi, kivalwa cha mkohani Haruni cherenekeloghe mizi ihi: Libna na mlamba ghwaro gholishira,

¹⁴ Jatiri na mlamba ghwaro gholishira, Ashitemo na mlamba ghwaro gholishira,

¹⁵ Holoni na mlamba ghwaro gholishira, Debiri na mlamba ghwaro gholishira,

¹⁶ Aini na mlamba ghwaro gholishira, Juta, na mlamba ghwaro gholishira, Beth-shemeshi na mlamba ghwaro gholishira; mizi ikenda ifumie kwa ivo vichuku viwi va Simeoni na Juda.

¹⁷ Kufuma kwa kichuku cha Benjamini werenekeloghe mizi ina: Gibeoni na mlamba ghwaro gholishira, Geba na mlamba ghwaro gholishira,

¹⁸ Anathothi na mlamba ghwaro gholishira, na Almoni na mlamba ghwaro gholishira.

¹⁹ Mizi yose erenekeloghe wakohani, icho kivalwa cha Haruni erekoghe ikumi na idadu.

²⁰ Kinyumba chimu cha Wakohathi, cha icho kichuku cha Lawi, cherenekeloghe mizi imu kufuma kwa kichuku cha Efraimu.

²¹ Nawo werenekeloghe mizi ina: Shekemu na mlamba ghwaro gholishira, (nagho ni muzi ghumu ghokimbiria kwa wundu ghwa m'bwaghi) ghuko isanga ja mighondinyi ja Efraimu, Gezeri na mlamba ghwaro gholishira,

²² Kibisaimu na mlamba ghwaro gholishira, Beth-horoni na mlamba ghwaro gholishira.

²³ Kufuma kwa kichuku cha Dani werenekeloghe mizi ina: Elteke na mlamba ghwaro gholishira, Gibethoni na mlamba ghwaro gholishira,

²⁴ Aijaloni na mlamba ghwaro gholishira, na Gath-rimoni na mlamba ghwaro gholishira.

²⁵ Kufuma kwa kichuku cha Manase ya magharibi werenekeloghe mizi iwi: Taanaki na mlamba ghwaro gholishira, na Gath-rimoni na mlamba ghwaro gholishira.

²⁶ Mizi erenekeloghe kinyumba chimu cha Wakohathi erekoghe ikumi chiaimweri na milamba yaro elishira.

²⁷ Kinyumba cha Gershoni, kichuku cha Lawi, cherenekeloghe mizi iwi kufuma kwa kichuku cha Manase ya mashariki: Golani iko Bashani (nagho ni muzi ghumu ghokimbiria kwa wundu ghwa m'bwaghi) na mlamba ghwaro gholishira, na Beeshtera na mlamba ghwaro gholishira.

²⁸ Kufuma kwa kichuku cha Isakari werenekeloghe mizi ina: Kishioni na mlamba ghwaro gholishira, Daberathi na mlamba ghwaro gholishira,

²⁹ Jarmuthi na mlamba ghwaro gholishira, na En-ganimu na mlamba ghwaro gholishira.

³⁰ Kufuma kwa kichuku cha Asheri werenekeloghe mizi ina: Mishali na mlamba ghwaro gholishira, Abdoni na mlamba ghwaro gholishira,

³¹ Helkathi na mlamba ghwaro gholishira, na Rehobu na mlamba ghwaro gholishira.

³² Kufuma kwa kichuku cha Naftali werenekeloghe mizi idadu: Kedeshi iko Galilaya (nagho ni muzi ghumu ghokimbiria kwa wundu ghwa m'bwaghi) na mlamba ghwaro gholishira, Hamothi-dori na mlamba ghwaro gholishira, na Kartani na mlamba ghwaro gholishira.

³³ Vichuku vizima vizima va kinyumba cha Gershoni werenekeloghe mizi ikumi na idadu chiaimweri na milamba yaro elishira.

³⁴ Masighariko gha kichuku cha Lawi, nawo ni wen-Merari, werenekeloghe kufuma kwa kichuku cha Zebluni mizi ina; Jokneamu na mlamba ghwaro gholishira, Karta na mlamba ghwaro gholishira,

³⁵ Dimna na mlamba ghwaro gholishira, na Nahalali na mlamba ghwaro gholishira.

³⁶ Kufuma kwa kichuku cha Reubeni werenekeloghe mizi ina: Bezeri na mlamba ghwaro gholishira, Jahazi na mlamba ghwaro gholishira,

³⁷ Kedemothi na mlamba ghwaro gholishira, na Mefaathi na mlamba ghwaro gholishira.

³⁸ Kufuma kwa kichuku cha Gadi werenekeloghe mizi ina: Ramothi andenyi ya isanga ja Gileadi (nagho ni muzi ghumu ghokimbiria kwa wundu ghwa m'bwaghi) na mlamba ghwaro gholishira, Mahanaimu na mlamba ghwaro gholishira,

³⁹ Heshboni na mlamba ghwaro gholishira, na Jazeri na mlamba ghwaro gholishira.

⁴⁰ Kwa huwo kichuku cha Merari nawo ni Walawi wamu weresigharikieghe werenekeloghe mizi ikumi na iwi.

⁴¹ Mizi ya kichuku cha Lawi iko andenyi ya ifwa ja wandu wa Israeli erekoghe mirongo ina na wunyanya, chiaimweri na milamba yaro elishira.

⁴² Mizi iyo, kula ghumu ghoremariloghe ni mlamba ghwaro gholishira.

Waisraeli kujiwusa ijo isanga

⁴³ Niko huwo BWANA ukawineka wandu wa Israeli ijo isanga orewilaghirieghe weke ndee, ukawighemia kukaia uchawineka; nawo wimeria kujipata ifwa ijo isanga, wikakaia aho.

⁴⁴ BWANA ukawineka kuhora chia rose sa iji koni orewibonyereghe weke ndee ighemi; ndekorekoghe na m'maiza ungi wawo oredimieghe kusimana nawo anduangi, kwa kukaia BWANA orekoghe wawisimia.

⁴⁵ BWANA ukajikatisha kula ilaghiro orejibonyereghe kwa wandu wa Israeli.