JOSHUA 19 - Biblia Ilagho Jiboie Kwa Wandu Wose

Isanga jerenekeloghe Simeoni

¹ Kura ya kawi ikakaia kwa kichuku cha Simeoni kunughana na nyumba rawo. Isanga jake jerengirieghe andenyi ya isanga ja Juda.

² Najo jerekoghe ni Beer-sheba, Sheba, Molada,

³ Hazari-shuali, Bala, Ezemu,

⁴ Eltoladi, Bethuli, Horma,

⁵ Siklagi, Beth-markabothi, Hasar-susa,

⁶ Beth-lebaothi, Shahuremi: mizi ikumi na idadu, chiaimweri na mizi yaro mitini iko mbai mbai.

⁷ Sena korekoghe na Aini, Rimoni, Etheri, na Ashani: mizi ina, chiaimweri na mizi yaro mitini iko mbai mbai.

⁸ Korekoghe na mizi imu mitini mitini eremarieghe iyo mizi chia rose hata Baalath-beeri (angu Rama) noko cha kusinyi. Mizi iyo niyo erewurieghe ifwa ja kichuku cha Simeoni kunughana na nyumba rawo.

⁹ Kwa kukaia isanga ja Juda jerekoghe ibaa na ndighi, niko jimu jaro jikanekwa mbari ya Simeoni.

Isanga jerenekeloghe Zebluni

¹⁰ Kura ya kadadu ikakaia kwa kichuku cha Zebluni kunughana na nyumba rawo. Isanga werejinekeloghe jerevikieghe hata Saridi.

¹¹ Mpaka ghwawo ghukaenda nokolughu cha magharibi hata Mareali ghukavika Dabeshethi na kamoda kiko mashariki ya Jokneamu.

¹² Kufuma luwaru lumu lwa Saridi, mpaka ghukaenda cha mashariki hata mpaka ghwa Kisloth-tabori, ghukaendelia hata Daberathi na kuvika Jafia.

¹³ Kufuma aho ghukaenda cha mashariki hata Gath-heferi na Eth-kasini, ghukaghaluka cha Nea, kuendelea hata Rimoni.

¹⁴ Ii chia cha kaskazinyi mpaka ghukaghaluka cha Hanathoni na kutuia Vololo ya Iftaeli.

¹⁵ Iyo mizi erekwanyeghe na Katathi, Nahalali, Shimroni, Idala na Bethlehemu: mizi ikumi na iwi chiaimweri na mizi mitini iko mbai mbai.

¹⁶ Mizi ihi chiaimweri na mizi yaro mitini, erekoghe andenyi ya isanga ijo jerenekeloghe kichuku cha Zebluni jikaie ifwa jawo, kunughana na nyumba rawo.

Isanga jerenekeloghe Isakari

¹⁷ Kura ya kana ikakaia kwa kichuku cha Isakari kunughana na nyumba rawo.

¹⁸ Isanga jake jerekoghe ni Jezreeli, Kesulothi, Shunemu,

¹⁹ Hafaraimu, Shioni, Anaharathi,

²⁰ Rabiti, Kishioni, Ebesi,

²¹ Remethi, En-ganimu, Enhada, na Beth-pasesi.

²² Ugho mpaka ghorevikieghe Tabori, Shahasuma, na Beth-shemeshi ghukatua Jordani; nagho ghorekoghe na mizi ikumi na irandadu, chiaimweri na mizi yaro mitini iko mbai mbai.

²³ Mizi iyo chiaimweri na mizi yaro mitini erekoghe andenyi ya isanga ijo jerekoghe ifwa ja kichuku cha Isakari, kunughana na nyumba rawo.

Isanga jerenekeloghe Asheri

²⁴ Kura ya kasanu ikakaia kwa kichuku cha Asheri kunughana na nyumba rawo.

²⁵ Isanga jake jerekoghe ni Helkathi, Hali, Beteni, Akshafu,

²⁶ Alameleki, Amadi, na Mishali. Noko cha magharibi mpaka ghukavika Karmeli, na Shihor-libnathi.

²⁷ Nagho ghukaghaluka cha mashariki; ugho mpaka ghukaenda hata Beth-dagoni, ghukavika Zebluni na Vololo ya Iftaeli chia ya kaskazinyi hata Beth-meki na Neiyeli: ghukachuria kughenda cha kaskazinyi hata Kabuli,

²⁸ Ebroni, Rehobu, Hamoni, na Kana hata Sidoni Mbaa.

²⁹ Ugho mpaka ghukaghaluka cha Rama ghukavikia ngome ya muzi ghwa Tiro na kughaluka cha Hosa na kutuia Bahari ya Mediterania, chiaimweri na Mahalabu, Akzibu,

³⁰ Uma, Afeki, na Rehobu: mizi mirongo iwi na iwi, chiaimweri na mizi yaro mitini iko mbai mbai.

³¹ Mizi iyo erekoghe andenyi ya isanga jerekoghe ifwa ja kichuku cha Asheri kunughana na nyumba rawo.

Isanga jerenekeloghe Naftali

³² Kura ya karandadu ikakaia kwa kichuku cha Naftali kunughana na nyumba rawo.

³³ Mpaka ghwake ghorekoghe kufuma Helefu hata mudi ghwa mualoni ghuko Saananimu, Adamnekebumu, Jabneeli hata Lakumu na kutuia Jordani.

³⁴ Aho mpaka ghukaghaluka magharibi cha Azinoth-tabori, na kufuma aho, ghukaghenda Hukoki na kuvika Zebluni luwaru lwa kusinyi, Asheri luwaru lwa magharibi, na Jordani luwaru lwa mashariki.

³⁵ Mizi ya ngome erekoghe ni Sidimu, Seri, Hamathi, Rakathi, Kinerethi,

³⁶ Adama, Rama, Hazori,

³⁷ Kedeshi, Edrei, Enhasori,

³⁸ Yironi, Migdal-eli, Horemu, Beth-anathi na Beth-shemeshi, mizi yaro mitini iko mbai mbai.

³⁹ Mizi iyo mibaa na mitini erekoghe andenyi ya ijo isanga jerenekeloghe kichuku cha Naftali jikaie ifwa jawo, kunughana na nyumba rawo.

Isanga jerenekeloghe Dani

⁴⁰ Kura ya mfungade ikakaia kwa kichuku cha Dani kunughana na nyumba rawo.

⁴¹ Masanga gherewurieghe ifwa jawo gherekoghe ni Sora, Eshtaoli, Ir-shemeshi,

⁴² Shaalbini, Aijaloni, Ithla,

⁴³ Eloni, Timna, Ekroni,

⁴⁴ Elteke, Gibethoni, Baalathi,

⁴⁵ Jehudi, Bene-beraki, Gath-rimoni,

⁴⁶ Mejarkoni, Rakoni, wokoni na isanga jimarie Jopa.

⁴⁷ Hata iji wandu wa Dani werelaghashireghe isanga jawo, wikajoka na kulwa na wandu wa Leshemu, wikawibwagha kwa lufu, wikajiwada na kujiwusa ijo isanga, wikajikaia; wikajiwanga Dani kunughana na irina ja wawae wawo.

⁴⁸ Mizi iyo mibaa na mitini, erekoghe andenyi ya ijo isanga jerenekeloghe kichuku cha Dani jikaie ifwa jawo, kunughana na nyumba rawo.

Iwaghio ja kutua ja isanga

⁴⁹ Nao iji wandu wa Israeli wameria kuwagha maifwa gha isanga, wikammbaghia Joshua mwana wa Nuni isanga jimu jikaie ifwa jake.

⁵⁰ Wikamneka ugho muzi Timnathi-sera oreghulombieghe, ghuko mghondinyi ghwa Efraimu, sa iji BWANA orelaghirieghe. Joshua ukaghuagha ugho muzi sena, ukakaia aho.

⁵¹ Mkohani Eleazari, Joshua mwana wa Nuni, na wabaa wa vichuku va wandu wa Israeli niwo werejiwaghieghe ijo isanga kwa kukaba kura imbiri ya BWANA aja Shilo mnyangonyi ghwa Hema Ekwania; na huwo wikaimeria iyo kazi ejiwagha isanga.