JOSHUA 17 - Biblia Ilagho Jiboie Kwa Wandu Wose

Manase ya magharibi

¹ Niko kichuku cha Manase chikanekwa iwaghio jake, angu orekoghe mwana wa imbiri wa Josefu. Makiri, uo orekoghe mwana wa imbiri wa Manase, nao nuo ndee wawo Wagileadi, ukawaghilwa Gileadi na Bashani; angu Makiri orekoghe mundu olwa wuda.

² Isanga jerekoghe cha magharibi ya Jordani jerenekeloghe kichuku cha Manase kunughana na nyumba rawo: Abiezeri, Heleki, Asirieli, Shekemu, Heferi, na Shemida. Awa niwo wandu wa womi wa kivalwa cha Manase mwana wa Josefu, kunughana na nyumba rawo.

³ Ela Selofehadi mwana wa Hadi, wawae Gileadi, mwana wa Makiri, wawae Manase, nderekoghe na wana wa womi ela wa waka wiekeri, nawo ni: Mahla, Noa, Hogla, Milka na Tirza.

⁴ Wikaghenda kwa mkohani Eleazari na kwa Joshua mwana wa Nuni na kwa vilongozi, wikaghamba, “BWANA oremlaghirieghe Musa dineko ifwa kara kara na wandu wa womi wa kichuku chedu.” Niko wikanekwanya isanga chiaimweri na kichuku chawo cha wandu wa womi, sa iji koni BWANA orelaghirieghe.

⁵ Ihi niyo shekeria Manase orenekeloghe mafungu ikumi kuchumba, aighu ya Gileadi na Bashani chia ya mashariki ya Jordani;

⁶ angu wai wa Manase werepatireghe ifwa chiaimweri na wana wake wa womi. Isanga ja Gileadi jerefunyiroghe jikaie ifwa ja masighariko gha Wamanase wose.

⁷ Mpaka ghwa Manase ghorekoghe kufuma Asheri hata Mikmetathi, cha mashariki ya Shekemu. Mpaka ghwaro ghukaenda cha kusinyi hata kwa wandu wikaiagha Entapua.

⁸ Isanga ja Tapua jerekoghe ja Manase, ela muzi ghwa Tapua ghuko mpakenyi ghorekoghe ghwa kivalwa cha Efraimu.

⁹ Ugho mpaka ghukasea hata kamoda ka Kana. Mizi iko cha kusinyi ya ako kamoda erekoghe ya Efraimu, hata ngera erekoghe andenyi ya mpaka ghwa Manase. Mpaka ghwa Manase ghwaendie hata kaskazinyi ya ako kamoda, hata kusiria Bahari ya Mediterania.

¹⁰ Isanga ja Efraimu jerekoghe cha kusinyi, na isanga ja Manase jikakaia cha kaskazinyi, Bahari ya Mediterania ikikaia mpaka ghwawo chia ya magharibi. Isanga ja Asheri jerekoghe chia ya ghadi na ghadi ya kaskazinyi na magharibi, na isanga ja Isakari jikakaia chia ya ghadi na ghadi ya kaskazinyi na mashariki.

¹¹ Andenyi ya isanga ja Isakari na Asheri, Manase orepatireghe muzi ghwa Beth-sheani na Ibleani chiaimweri na mizi yaro mitini mitini, chiaimweri na wandu werekoghe mizi ya Dori, Endori, Taanaki, Megido, na mizi yaro mitini ya mbai mbai; muzi ghwa kadadu ni Nafati.

¹² Ela wandu wa Manase ndeweredimieghe kuiwusa iyo mizi, angu Wakanaani werelegherikieghe andenyi yaro. Kwa huwo Wakanaani wikadua ahoeni.

¹³ Na hata wokoni Waisraeli wiendachurikia ndighi, ndewerewifunyireghe Wakanaani wose anduangi, ela wikadua wikiwidumikisha.

Efraimu na Manase ya magharibi kulomba wichurilo isanga.

¹⁴ Kivalwa cha Josefu wikamzera Joshua, “Kwaki kwadiwaghia ifwa ja isanga jimweri diwose? Isi deko wengi kwa kukaia BWANA wadirasimie.”

¹⁵ Niko Joshua ukawitumbulia, “Ikakaia inyo mwakaia wengi, na isanga ja mighondinyi ja Efraimu ndejimkatagha, basi ngienyi cha msidunyi, mdeme icho kilemba mkupatire andu kokaia kwa Waperizi, na kwa Warefai.”

¹⁶ Nawo wikatumbulia, “Isanga ja mighondinyi ndejidikatagha, na Wakanaani wikaiagha kirindinyi weko na magare gha chuma, awo wose wikaiagha Beth-sheani na mizi iko mbai mbai, na awo wikaiagha vololonyi ya Jezreeli.”

¹⁷ Joshua ukawizera mbari ya Efraimu na mbari ya Manase iko cha magharibi, “Ni loli moko wengi, sena moko na ndighi; kwa huwo mchachurilwa ifungu jimu.

¹⁸ Isanga ja mighondinyi jichakaia jenyu. Hata ngera ni ja msidu mchadema icho kilemba; jipate kuwuya ifwa jenyu kufuma kutua uku hata kutua kuja. Maza ra Wakanaani, mchawiwinga noko, hata ngera weko na magare gha chuma na kukaia na ndighi.”