JOSHUA 16 - Biblia Ilagho Jiboie Kwa Wandu Wose

Isanga jerenekeloghe Efraimu na Manase ya magharibi

¹ Isanga jerenekeloghe kivalwa cha Josefu, jerezoeghe kufuma Jordani kaavui na Jeriko, andu machi gha Jeriko ghizoiagha ghikienda cha mashariki na kughenda cha kireti; ghukajoka kufuma Jeriko hata isanga ja mighondinyi kuvikia Betheli.

² Kufuma Betheli, ghukaghenda cha Luzu kuidiria Atarothi andu Waariki werekoghe.

³ Niko ghukaenda nokoisi cha magharibi, isanga ja Wajafleti na kuida cha Beth-horoni Ya Isi, hata Gezeri, na kutuia Bahari ya Mediterania.

⁴ Kivalwa cha Josefu, nacho ni kichuku cha Manase na Efraimu, werepatireghe ifwa ja isanga iji.

Efraimu

⁵ Isanga ja Efraimu kunughana na nyumba rawo jerekoghe seji inughagha: mpaka ghwawo ii chia cha mashariki ghorekoghe Ataroth-ada, ghukaenda hata kuvikia Beth-horoni ya Lughu.

⁶ Na kufuma aho mpaka ghukaenda hata Bahari ya Mediterania; ghukisigha Mikmetathi ii chia cha kaskazinyi. Kufuma aho, ii chia cha mashariki mpaka ghukaghaluka kulangaya Taanath-shilo na kuida kiimbiri cha mashariki kuvikia Janoa.

⁷ Niko ghukasea kufuma Janoa hata Atarothi na Naara, kuvikia Jeriko na kutuia Jordani.

⁸ Mpaka ghukaghaluka kuenda cha magharibi kufuma Tapua hata kamoda ka Kana na kutua Bahari ya Mediterania. Iji nijo isanga jerenekeloghe kichuku cha Efraimu kunughana na nyumba rawo jikaie ifwa jawo,

⁹ chiaimweri na mizi mitini erekoghe andenyi ya mpaka ghwa Wamanase, ela ikanekwa Waefraimu.

¹⁰ Ela ndewerewiwingieghe Wakanaani awo werekoghe wikikaia Gezeri, kwa huwo Wakanaani wikadua aghadi ya Waefraimu hata ituku iji ja linu, ela wikadua sa wazumba wawo.