JOSHUA 14 - Biblia Ilagho Jiboie Kwa Wandu Wose

Kuwaghwa kwa isanga jiko magharibi ya Jordani

¹ Huwu niko isanga ja Kanaani ijo jiko magharibi ya Jordani jerewaghiloghe wandu wa Israeli jikaie ifwa jawo. Wandu werekoghe wikiwagha ni mkohani Eleazari, Joshua mwana wa Nuni, na vilongozi va wandu wa mbari ya Israeli.

² Sa iji koni BWANA oremlaghirieghe Musa, kuwagha isanga kwa vichuku ikenda na nusu cha magharibi ya Jordani kodeeka kubonyo kwa kura.

³ Musa orekoghe wafunya isanga ja mashariki ya Jordani jikaie ifwa kwa vichuku viwi na nusu, ela Walawi nderewinekieghe ifwa jingi anduangi.

⁴ Angu mbari ya Josefu erewaghiloghe mafungu awi, Manase na Efraimu, na Walawi ndewerenekeloghe ifungu jingi, ela werenekeloghe mizi ekaia, na andu kolishira mfugho rawo.

⁵ Wandu wa Israeli werebonyereghe sa iji koni BWANA oremlaghirieghe Musa, wikajiwagha isanga.

Hebroni kunekwa Kalebu

⁶ Ituku jimu, wandu wamu wikacha kwa Joshua aja Gilgali kufuma Juda; umu wawo orekoghe Kalebu mwana wa Jefune, Mkenazi, ukamzera Joshua, “Oho kwawuyamanya seji BWANA oreghorieghe aja Kadesh-barnea aighu yako na ini.

⁷ Ngelo iyo, ini nedeeka mundu wa miaka mirongo ina, iji Musa mdumiki wa Mlungu orenidumagha kufuma Kadesh-barnea nizighane iji isanga; nani ngamredia malagho gha loli.

⁸ Ela wandu wereghendanyeghe nani wereredieghe malagho ghebwagha wandu wedu ngolo, ela ini neremnughieghe BWANA Mlungu wapo kwa ngolo yapo yose.

⁹ Niko ituku ijo Musa ukanibonyera ighemi kukaia ini na wana wapo dichanekwa ijo isanga nerejiwadirieghe jikaie ifwa jedu.

¹⁰ Ola idana BWANA wanikaishire moyo sa iji koni oreghorieghe miaka ihi mirongo ina na misanu kufuma waghora agho malagho kwa Musa, Waisraeli wikidamba kireti; na idana zighana nakaia na miaka mirongo wunyanya na misanu.

¹¹ Naduagha na ndighi sa iji koni neredumwagha ni Musa, naduagha na ndighi relwa wuda, na hata rebonya ilagho ijo jose.

¹² Idana nineke iji isanga ja mighondinyi sa iji koni BWANA orenilaghirieghe jija ituku; angu kwasikire seji Waanaki werekoghe aho na mizi ya ngome rawo wiaghie mbaa; yadimika BWANA ukaie andwamweri nani, eri niwisime na kuwiwinga sa iji koni BWANA orelaghirieghe.”

¹³ Niko Joshua ukamrasimia Kalebu mwana wa Jefune, ukamneka muzi ghwa Hebroni ghukaie ifwa jake.

¹⁴ Hebroni yaduagha ifwa ja kivalwa cha Kalebu mwana wa Jefune, Mkenazi, hata linu; kwa kukaia orekoghe mloli, ukamnugha BWANA Mlungu wa Israeli kwa ngolo yake yose.

¹⁵ Koimbiri Hebroni erewangwagha muzi ghwa Arba, (na Arba nuo orekoghe mundu mbaa wa Waanaki.) Kukakaia na sere isangenyi.