JOSHUA 13 - Biblia Ilagho Jiboie Kwa Wandu Wose

Isanga jisigharikie jewada

¹ Joshua orekoghe wakaia mghosi wa miaka mingi. BWANA ukamzera, “Kwakaia mghosi wa miaka mingi, ela isanga jaduagha ilazi jewaghia wandu.

² Masanga ghiduagha ni agha: isanga jose ja Wafilisti, na Wageshuri,

³ chiaimweri na masanga gha Waavi noko cha kusinyi. (Isanga jifumagha kamoda ka Shihori, mpakenyi ghwa Misri kughenda noko cha kaskazinyi hata mpakenyi ghwa Ekroni jadatalwa kukaia ni ja Wakanaani. Awo wazuri wa Wafilisti werekoghe wikikaia mizi ya Gaza, Ashdodi, Ashkeloni, Gathi, na Ekroni;)

⁴ ijo isanga jose jerekoghe ja Wakanaani, na Meara (najo ni isanga ja Wasidoni) hata Afeki mpakenyi ghwa Waamori;

⁵ na isanga ja Wagebali, na Lebanoni yose kulangaya cha mashariki; kufuma Baal-gadi iko naisi ya Mghondi ghwa Hermoni hata andu kongiria Hamathi.

⁶ Wandu wose wikaiagha masanga gha mighondinyi kufuma Lebanoni hata Misrefoth-maimu, awo Wasidoni wose, nichawiwinga nimoni imbiri ya wandu wa Israeli, kupate kuwiwaghia wandu wa Israeli wiekeri ijo isanga jikaie ifwa jawo sa iji koni nerekulaghirieghe.

⁷ Idana kuviwaghie vija vichuku ikenda, na nusu ya kichuku cha Manase ijo isanga jikaie ifwa jawo.”

Kuwaghwa kwa isanga mashariki ya Jordani

⁸ Kichuku cha Reubeni, Gadi, na nusu ya kichuku cha Manase wamerie kupata ifwa jawo ijo Musa mdumiki wa Mlungu orewinekieghe, chia ya mashariki ya Moda ghwa Jordani.

⁹ Isanga jawo jerekoghe kufuma Aroeri iko mpakenyi ghwa Vololo ya Arnoni na muzi ghuko ghadi na ghadi ya iyo vololo, na wurindi ghose kufuma Medeba hata Diboni.

¹⁰ Jikashabuka hata mpakenyi ghwa Waamoni, najo jerekoghe chiaimweri na mizi yose erekoghe ikibonyerwa nguma ni Sihoni mzuri wa Waamori, uo orekoghe ukibonya nguma Heshboni,

¹¹ na Gileadi, na isanga ja Wageshuri na Wamaaka, na Mghondi ghwa Hermoni ghose, na Bashani yose hata Saleka;

¹² nagho nigho wuzuri ghose ghwa Ogu ghorekoghe Bashani; uo nuo oresigharikieghe wa Warefai orekoghe ukibonya nguma aja Ashtarothi na Edrei. Musa orewisimieghe awa wandu ukawiwinga.

¹³ Ela Waisraeli ndewerewiwingieghe Wageshuri na Wamaaka ela wikakaia aghadi ya Waisraeli hata linu.

¹⁴ Musa nderewinekieghe kichuku cha Lawi isanga jingi, kwa kukaia BWANA oremlaghirieghe kukaia ifungu jawo jichakaia kwa ivo vizongona vekora vifunywagha kwa BWANA.

Isanga jerenekeloghe Reubeni

¹⁵ Musa orewinekieghe wandu wa mbari ya Reubeni iwaghio ja isanga jimu jikaie ifwa jawo kunughana na nyumba rawo.

¹⁶ Najo ni kufuma Aroeri jiko mpakenyi ghwa Vololo ya Arnoni na ugho muzi ghuko ghadi na ghadi ya iyo vololo, na wurindi ghose ghwa Medeba,

¹⁷ chiaimweri na Heshboni na mizi yake yose iko kirindinyi: Diboni, Bamothi-baali, Beth-baalmeoni,

¹⁸ Jakazi, Kademothi, Mefaathi,

¹⁹ Kiriathaimu, Sibma, Sereth-shahari iko mghondinyi ghuko vololonyi,

²⁰ Beth-peori, na iyo mishoromoto ya Mghondi ghwa Pisga, na Beth-jeshimothi;

²¹ iyo ni chiaimweri na mizi iko wurindinyi, ugho wuzuri ghose ghwa Sihoni mzuri wa Waamori, uo orekoghe ukibonya nguma Heshboni uo oresimiloghe ni Musa chiaimweri na wabonyi nguma wa Midiani, niwo Evi, Rekemu, Zuri, Huri, na Reba; awo wose werebonyereghe isanga nguma aisi ya Mzuri Sihoni.

²² Umu wa awo wandu werebwaghiloghe ni wandu wa Israeli orekoghe uja mlaghui Balaamu mwana wa Beori.

²³ Jordani erekoghe mpaka ghwa magharibi ghwa mbari ya Reubeni.

Isanga jerenekeloghe Gadi

²⁴ Wokoni Musa orewinekieghe mbari ya Gadi iwaghio ja isanga jimu jikaie ifwa jawo kunughana na nyumba rawo.

²⁵ Najo jerekoghe Jazeri na mizi yose ya Gileadi, na nusu ya isanga ja Waamoni hata Aroeri iko cha mashariki ya Raba;

²⁶ na kufuma Heshboni hata Ramath-mizpe na Batonimu; na kufuma Mahanaimu hata isanga ja Debiri;

²⁷ na vololonyi ya Jordani iko na mizi ya Beth-haramu, Beth-nimra, Sukothi na Safoni, nako ni kutua kwa wuzuri ghwa Sihoni mzuri wa Heshboni. Mpaka ghwawo ghwa magharibi ghorekoghe Moda ghwa Jordani hata kuvikia cha kaskazinyi kutua kwa Ndiwa ya Galilaya.

²⁸ Iji nijo ifwa ja wandu wa mbari ya Gadi, kunughana na nyumba rawo, chiaimweri na mizi yaro mibaa na mitini.

Isanga jerenekeloghe Manase ya mashariki

²⁹ Musa orewinekieghe nusu ya mbari ya Manase iwaghio ja isanga jimu jikaie ifwa jawo, kunughana na nyumba rawo;

³⁰ najo jerekoghe Mahanaimu, iko chiaimweri na Bashani; nigho wuzuri ghose ghwa Ogu mzuri wa Bashani, na mizi mirongo irandadu iko Jairi andenyi ya Bashani.

³¹ Na wokoni nusu ya Gileadi na Ashtarothi na Edrei, nayo ni mizi mibaa ya wuzuri ghwa Ogu ghuko Bashani. Masanga agha ghose gherenekeloghe nusu ya kichuku cha Makiri mwana wa Manase kunughana na nyumba rawo.

³² Huwu niko Musa orewaghieghe isanga jiko cha mashariki ya Jeriko na Jordani, iji orekoghe kirindinyi cha Moabu.

³³ Ela Musa nderewinekieghe kichuku cha Lawi isanga jingi; kwa kukaia orewizerieghe ifwa jawo jichakaia ifungu ja mafunyo ghifunywagha kwa BWANA Mlungu wa Israeli.