JOSHUA 11 - Biblia Ilagho Jiboie Kwa Wandu Wose

Joshua kumsima Jabini na wangara wake

¹ Malagho gha wusimi ghwa Waisraeli ghiendamvikia Mzuri Jabini wa Hazori, ukaduma malagho kwa Mzuri Jobabu wa Madoni, na kwa Mzuri wa Shimroni na wa Akshafu;

² na kwa wazuri wa masanga gha mighondinyi cha kaskazinyi, andenyi Vololonyi ya Jordani, na kusinyi ya Ndiwa ya Galilaya mighondinyi mitini cha Nafoth-dori.

³ Sena ukaduma malagho kwa Wakanaani chia rose ra Jordani, na kwa Waamori, Wahiti, Waperizi, na kwa Wajebusi andenyi ya isanga ja mighondinyi; wokoni na kwa Wahivi, awo werekoghe wikikaia kirimbenyi cha Mghondi ghwa Hermoni andenyi ya isanga ja Mispa.

⁴ Wikacha na masikari ghawo ghose, ijeshi ibaa ja wandu wengi na ndighi sa msangagha ghwa baharinyi wiko na farasi na magare mengi.

⁵ Awa wazuri wose wikakwanya majeshi ghawo chiaimweri na kubonya kambi yawo mbai mbai ya Kamoda ka Meromu, wipate kulwa na Israeli.

⁶ BWANA ukamzera Joshua, “Kusakewiobua, angu kesho ngelo sa ihi nichawibwagha wose kwa wundu ghwa Israeli; kuchachikanya farasi rawo maghu, na kughikora magare ghawo.”

⁷ Niko Joshua na wandu wake wikawichea aja Meromu wisemanyire.

⁸ BWANA ukawineka Waisraeli wusimi aighu yawo, wikawikaba na kuwiwinga hata kaskazinyi ya Misrefoth-maimu na cha Sidoni Mbaa na cha mashariki hata vololo ya Mispa; wikawikaba na kuwibwagha wose hata wisesighe ungi.

⁹ Joshua ukawibonya sa iji koni orelaghiriloghe ni BWANA, ukachikanya farasi rawo maghu, na kughikora magare ghawo.

¹⁰ Ngelo iyo, Joshua ukawuya nanyuma na kughuwada muzi ghwa Hazori, ukam'bwagha mzuri waro. Koimbiri muzi ghwa Hazori nigho ghorekoghe m'baa ghwa agho mawuzuri ghose.

¹¹ Wikabwagha kula mundu orekoghe andenyi ya ugho muzi; ndeweresighieghe hata mundu umweri uko moyo; na ugho muzi ghwaro wikaghukora.

¹² Joshua ukawada iyo mizi yose, na kuwibwagha wazuri waro. Ukawitotesha wose sa iji koni Musa mdumiki wa Mlungu orelaghirieghe.

¹³ Ela Waisraeli ndewerekorieghe mizi iaghilo andu kuwukie, ela muzi ghwa Hazori ghoni ugho ghorekoreloghe ni Joshua.

¹⁴ Waisraeli wikawada vilambo va zoghori na mfugho kufuma kwa iyo mizi wikaviwusa, ela wikabwagha kula mundu na kuwitotesha wose, hata ndeweresighieghe mndungi ukisoda anduangi.

¹⁵ Sa iji koni BWANA oremlaghirieghe mdumiki wake Musa, niko koni Musa oremlaghirieghe Joshua. Na Joshua ukasikira na kubonya ghose sa iji koni BWANA oremlaghirieghe Musa.

Masanga ghiwusiro ni Joshua

¹⁶ Kwa huwo Joshua ukawusa ijo isanga jose, isanga ja mighondinyi na ja kaskazinyi na kusinyi, isanga jose ja Gosheni na kireti charo cha kusinyi, na isanga ja mighondi ya Israeli, chiaimweri na Vololo ya Jordani.

¹⁷ Wubaa ghwa ijo isanga ghorekoghe kufuma Mghondi ghwa Halaki cha kusinyi kaavui na Edomu, hata Baal-gadi cha kaskazinyi; andenyi ya vololo ya Lebanoni, kusinyi ya Mghondi ghwa Hermoni.

¹⁸ Joshua orebonyereghe wuda na wazuri wa agha masanga kwa ngelo ndacha.

¹⁹ Muzi orebonyereghe mapatano nagho ni Gibeoni andu Wahivi wamu werekoghe wikikaia. Ela wazima wose werebwaghiloghe wudenyi.

²⁰ Angu ni BWANA moni orewikurishireghe ngolo wilo na Waisraeli, eri wipate kutoteshwa wose kuseko na wughoma ghungi sa iji koni BWANA oremlaghirieghe Musa.

²¹ Ngelo iyo Joshua ukaghenda na kuwitotesha Waanaki awo werekoghe wikikaia masanga gha mighondinyi gha Hebroni, Debiri, Anabu, na masanga ghose gha mighondinyi gha Juda na Israeli. Wandu wose wa agho masanga ukawitotesha putu chiaimweri na mizi yawo.

²² Ndekoresigharikieghe Waanaki wangi andenyi ya mizi ya Israeli, ela weresigharikieghe watinieri andenyi ya Gaza, Gathi, na Ashdodi.

²³ Joshua ukawusa isanga jose sa iji koni BWANA oremlaghirieghe Musa. Joshua ukawineka Waisraeli jikaie isanga jawo, ukawiwaghia vipande kwa kula kichuku. Wandu wikahora na kuleka wuda.