JOSHUA 1 - Biblia Ilagho Jiboie Kwa Wandu Wose

Mlungu kumlaghira Joshua ulo na kuwada Kanaani

¹ Nyuma ya kifwa cha Musa mdumiki wa BWANA, BWANA ukaghora na Joshua mwana wa Nuni mdumiki wa Musa, ukimzera,

² “Mdumiki wapo Musa wafue. Idana wuka kuruwuke Jordani oho na awa wandu wose wa Israeli, kungie ijo isanga nawuyawineka.

³ Andu kose maghu ghenyu ghichaawadia, namneka; sa iji koni neremlaghirieghe Musa.

⁴ Mpaka ghonyu ghuchakaia kufuma kireti cha kusinyi hata Mghondi ghwa Lebanoni cha kaskazinyi; na kufuma ghuja moda m'baa ghwa Eufrate cha mashariki, na isanga jose ja Wahiti, hata noko cha magharibi ya Bahari ya Mediterania.

⁵ Ndekuwadie mndungi uchaakusima matuku ghose gha irangi jako. Sa iji koni nerekaieghe andwamweri na Musa, huwo koni nichakaia andwamweri na oho; sichaakupungukia hata sichaakusigha anduangi.

⁶ Kukaie na ndighi na ngolo ya wuing'oni, angu ni oho kuchaawilongoza awa wandu hata wipate ifwa ja jija isanga nereghemieghe kwa weke ndee angu nichawineka.

⁷ Oho kaia na ndighi tu, na ngolo ya wuing'oni, kukilindia kubonya karakara na Sharia yose morelaghiriloghe ni Musa mdumiki wapo; mseghaluke na mbai mkonu ghwa kiwomi hata mkonu ghwa kiwaka; eri kupate kuwona mecha andu kose kuchaaghenda.

⁸ Kusesighe kushoma chuo cha Sharia; kukufundishe aho kio na dime, kupate kukulindia na kubonya ghose sa iji koni maandiko ghighambagha. Kwa chia iyo kuchakaia nicha kwa mighendo yako, sena kuchapata wusimi.

⁹ Nechi nakulaghira too. Kukaie na ndighi sena kukaie ing'oni; kusakeobua hata kufwa ngolo, angu Ini BWANA Mlungu wako, nichakaianya na oho andu kose kuchaaghenda.”

Joshua kufunya malaghiro kwa wandu

¹⁰ Niko Joshua ukawizera vilongozi va wandu,

¹¹ “Marenyi kambi yose, muwizere wandu witumbanye vindo vawo; angu andenyi ya matuku adadu, mcharuwuka Moda ghwa Jordani mwende kujiwusa jija isanga BWANA Mlungu onyu wawuyamneka mujiwuse.”

¹² Joshua ukawizera kichuku cha Reubeni, cha Gadi, na cha nusu ya Manase,

¹³ “Kumbukenyi seji Musa mdumiki wa BWANA oremzerieghe, kukaia BWANA Mlungu onyu uchamneka iji isanga cha mashariki ya Jordani jikaie isanga jenyu.

¹⁴ Waka wenyu, wana wenyu, na mfugho renyu richasigharika aha, ela inyo wabaa muko na ndighi, mcharuwuka Jordani mrwae maswagha chiaimweri na wambenyu Waisraeli, mpate kuwitesia;

¹⁵ hata BWANA wameria kuwineka awo wanyinyu kuhora karakara na inyo mmbeni, nawo weni wipate ijo isanga BWANA Mlungu onyu wawuyawineka. Aho niko inyo mchawuya isangenyi konyu mkaie aho cha mashariki ya Jordani andu Musa mdumiki wa Mlungu oremlaghirieghe.”

¹⁶ Nao wikamtumbulia Joshua, “Agho ghose kwadilaghira dichaghibonya na andu uko kose kuchaadiduma dichaghenda.

¹⁷ Dichakusikira sa iji koni deremsikireghe Musa; BWANA ndekaie na oho sa iji koni orekaighe na Musa.

¹⁸ Uo ose uchaamenya malagho ghako, na kulegha kukusikira uchabwaghwa; oho kaia na ngolo sena kukaie ing'oni.”