JOHANE 6 - Biblia Ilagho Jiboie Kwa Wandu Wose

Jesu kuwighudisha vindo wandu elfu isanu

¹ Nao nyuma ya maza iri, Jesu ukaghenda kimonu cha ndiwa ya Galilaya, nayo niyo cheni ndiwa ya Tiberia.

² Izungu ibaa ja wandu jikamnugha, angu werewonieghe weke mwakilimbiti orewibonyereghe kwa kuwiboisa awo werekoghe wakongo.

³ Jesu ukajoka mghondinyi ukasea kidombo andwamweri na wanughi wake.

⁴ Na ija Ndima ya Wayahudi iwangwagha Pasaka erekoghe kaavui.

⁵ Nao iji Jesu wawona jija izungu ibaa ja wandu jikimchea ukamzera Filipo, “Welee, dighua hao mikate wandu awa wipate kuja?”

⁶ (Oreghorieghe agho kwa kumtima, angu oremanyireghe seji uo moni uchaabonya.)

⁷ Nao Filipo ukamtumbulia, “Mikate ya dinari maghana awi ndeiwikatagha awandu, hata wikawaghilwa katini katini.”

⁸ Umu wa wanughi wake uwangwagha Andrea mruna Simoni Petro ukamzera,

⁹ “Oko mwana wa womi umu aha uko na mikate misanu ya shairi na samaki iwi, ela icho ni kilamboki kwa wandu wengi sa awa?”

¹⁰ Jesu ukawizera, “Wizerenyi wandu wisee kidombo.” Aho korekoghe na nyasi nyingi, kwa huwo wandu wikasea kidombo sa wandu wa womi elfu isanu.

¹¹ Jesu ukaiwusa iyo mikate, hata umeria kufunya chawucha kwa Mlungu, ukawiwaghia wandu werekoghe kidombo; na samaki woruwo koni, kula mundu ukapata sa iji orekundieghe.

¹² Nao iji wandu wameria kughuda, ukawizera wanughi wake, “Vitumbanyenyi vibelele va mikate vose vasigharika kindo chingi chisakelaghaya.”

¹³ Wikaitumbanya wikachura vikapu ikumi na viwi va ija mikate ya shairi isigharikie kwa waja wandu werekoghe wikija.

¹⁴ Waja wandu wiendawona uo mwakilimbiti orebonyekieghe wikaghamba, “Kwa loli uhu nuo uja Mlodi uchagha wurumwengunyi.”

¹⁵ Jesu ukimanya angu wandu werekundieghe kummbwada na kum'bonya mzuri, ukafuma aho, ukajoka sena cha mghondinyi uekeri.

Jesu kughenda aighu ya machi

¹⁶ Hata iji lwavika luma lwa kenyi, wanughi wake wikasea cha ndiwenyi,

¹⁷ wikajoka mashuonyi wikazoya kuruwuka cha Kafarnaumu. Kira chikasea imbiri Jesu usewivikie.

¹⁸ Nao machi ghikazoya kunyavurika kwa wundu ghwa kiremba kibaa cha mbeo.

¹⁹ Hata iji waruda makasia sa mwendo ghwa kilometa isanu angu irandadu, wikammbona Jesu ukighenda na maghu aighu ya machi, na kuvika kaavui na jija ishua; nawo wikaobua na ndighi.

²⁰ Jesu ukawizera, “Msakeobua, ni ini moni.”

²¹ Nawo iji wamngira ishuonyi kwa kuboilwa, shwa wori ijo ishua jikavika andu wereghendagha.

Wandu kumlola Jesu

²² Nakesho yaro, jija izungu ja wandu weresigharikieghe kimonu cha ndiwa, werewonieghe angu andu aho kodeeka na ishua jimweri tua; na seji Jesu nderengirieghe ishuonyi andwamweri na wanughi wake anduangi, ela wanughi wereghendieghe weni wiekeri.

²³ Elaima, mashua zima rifumie Tiberia, rerechieghe andu aho wandu werejieghe mikate iji Bwana oremfunyireghe Mlungu chawucha.

²⁴ Nao iji awo wandu wawona angu Jesu na wanughi wake ndewerekoghe aho, wikangia mashuonyi wikaghenda Kafarnaumu wikimlola Jesu.

Jesu Mkate ghwa Irangi

²⁵ Nao iji wammbona kimonu cha ndiwa wikamzera, “Mwalimu, kwachee lii aha?”

²⁶ Jesu ukawitumbulia, “Namghoria loli, mwaawuyanilola, si angu morewonieghe uja mwakilimbiti anduangi, ela ni iji morejieghe ija mikate mkaghuda.

²⁷ Msakebonya kazi kwa wundu ghwa vindo vinonekagha, ela bonyenyi kazi kwa wundu ghwa ivo viduagha hata irangi ja kala na kala. Navo mchanekwa ni Mwana wa Mdamu, angu nuo moni urumirilo ni uja Aba, Mlungu moni.”

²⁸ Nao wikamkotia, “Welee, dibonye wada ima dipate kuribonya iro kazi ra Mlungu?”

²⁹ Jesu ukawitumbulia, “Kazi ya Mlungu niyo ihi: inyo kumrumiria uo oremdumieghe.”

³⁰ Wikamkotia, “Ni mwakilimbiti uao kubonyagha nesi diwone dikurumirie? Kwabonya kaziki?

³¹ Weke wawa wedu werejieghe ija mana kireti sa iji koni iandikilo, ‘Orewinekieghe mkate kufuma mlungunyi wipate kuja.’”

³² Niko Jesu ukawizera, “Namghoria loli, Musa nderemnekieghe mkate kufuma mlungunyi; Aba nuo umnekagha inyo mkate ghwa loli kufuma mlungunyi.

³³ Angu mkate ugho Mlungu umnekagha, ni uo uchee kufuma mlungunyi kughuneka wurumwengu irangi.”

³⁴ Nao wikamzera, “Bwana kudineke mkate ugho matuku ghose.”

³⁵ Jesu ukawizera, “Ini nuo mkate ghwa irangi, uo uchagha kwapo na jingi ndechaawona njala, na uo ose urumiriagha kwapo na jingi ndechaaoma anduangi.

³⁶ Ela neremghorieghe angu hata ngera mwaniwona, ela sena ndemrumiriagha anduangi.

³⁷ Awo wose Aba uninekagha wichacha kwapo; na uo uchagha kwapo, na jingi sichaammbinga anduangi.

³⁸ Angu serechieghe kufuma mlungunyi kubonya lukundo lwapo anduangi; ela kubonya lukundo lwake Uo orenidumieghe.

³⁹ Na lukundo lwake Uo orenidumieghe nilo ulu: niselaghashe hata umweri wa awo oreninekieghe, ela niwirukishe Ituku ja kutua mbai.

⁴⁰ Angu ijo ujikundagha Aba nijo iji: kula mundu ummbonagha Mwana na kurumiria kwake, ukaieghe na irangi ja kala na kala. Na ini nichamrukisha Ituku ja kutua mbai.”

⁴¹ Nao Wayahudi wikazoya kumzughunukia angu oreghorieghe, “Ini nuo mkate ghoreserieghe kufuma mlungunyi.”

⁴² Wikaghamba, “Welee, uhu suo Jesu mwana wa Josefu, ndee na mae diwiichi? Yakaia wada uo kudizera waserie kufuma mlungunyi?”

⁴³ Jesu ukawizera, “Sighenyi mazughunuko aghadi konyu.

⁴⁴ Mndungi ndedimagha kucha kwapo anduangi, ngera userudilo ni uja Aba orenidumieghe, nani nichamrukisha Ituku ja kutua mbai.

⁴⁵ Walodi wereandikieghe, ‘Kula mundu uchafundishwa ni Mlungu.’ Uo ose umsikiragha uja Aba, na kukufundisha kwake, uchacha kwapo.

⁴⁶ Huwo si kughora wei mndungi wammbonie uja Aba anduangi, ela ni uo ufumie kwa Mlungu, nuo ummbonie uja Aba.

⁴⁷ Namghoria loli, uo urumiriagha, oko na irangi ja kala na kala.

⁴⁸ Ini nuo mkate ghwa irangi.

⁴⁹ Weke wawa wenyu werejieghe ija mana kireti ela wikafwa.

⁵⁰ Ughu nigho mkate ghuseagha kufuma mlungunyi, ugho mundu ukaghuja usechaafwa anduangi.

⁵¹ Ini nuo ugho mkate ghuko moyo ghoreserieghe kufuma mlungunyi. Mndungi ukaja mkate ugho, uchakaia moyo kwa kala na kala. Na mkate nichaaghufunya kwa wundu ghwa irangi ja wurumwengu, ni mumbi ghwapo.”

⁵² Nao Wayahudi wikazoya nganyi weni na weni wikighamba, “Welee, idimika wada mundu uhu kudineka nyama ya mumbi ghwake diije?”

⁵³ Jesu ukawizera, “Namghoria loli, ngera msejagha nyama ya Mwana wa Mdamu na kuinywa bagha yake, ndemdimagha kukaia na irangi andenyi konyu anduangi.

⁵⁴ Uo ose ujagha mumbi ghwapo na kuinywa bagha yapo, oko na irangi ja kala na kala, nani nichamrukisha Ituku ja kutua mbai.

⁵⁵ Angu mumbi ghwapo ni vindo va loli, na bagha yapo ni kunywa kwa loli.

⁵⁶ Uo ujagha mumbi ghwapo na kuinywa bagha yapo, wadakaia andenyi kwapo na ini andenyi kwake.

⁵⁷ Sa iji koni Aba uko moyo orenidumieghe, nani nakaia moyo kwa wundu ghwa Aba, huwo koni uo unijagha ini uchakaia moyo kwa wundu ghwapo wori.

⁵⁸ Ughu nigho mkate ghoreserieghe kufuma mlungunyi, si sa ghuja weke wawa wenyu werejieghe wikafwa; ela uhu ujagha mkate ughu uchadua moyo kwa kala na kala.”

⁵⁹ Jesu oreghighorieghe agho malagho andenyi ya sunagogi aja Kafarnaumu iji orekoghe ukifundisha.

Malagho gha Irangi ja kala na kala

⁶⁰ Wengi wa wanughi wake wiendasikira malagho agho wikaghamba, “Agho mafundisho ghakurie; nani udimagha kughisikira?”

⁶¹ Jesu ukimanya moni angu wanughi wake werekoghe wikizughunukia malagho agho ukawizera, “Welee, agha ghaamkuwisha?

⁶² Yakaiagha wada ngera modemmbona Mwana wa Mdamu ukijoka andu aja orekoghe koimbiri?

⁶³ Uja Roho nuo unekagha irangi, ela mumbi ndeghudimagha ilagho jingi anduangi. Malagho namghoria ni Roho na irangi.

⁶⁴ Elaima wamu wenyu ndemrumirie anduangi.” (Jesu oreghorieghe agho angu oremanyireghe kufuma imbiri ni weke ani wiserumiriagha na ni ani uchaamfunya.)

⁶⁵ Nao ukaghamba, “Niko neremghorieghe angu mndungi ndedimagha kucha kwapo ngera userudilo ni uja Aba.”

⁶⁶ Kwa wundu ghwa agho, wengi wa wanughi wake wikawuya nyuma, hata ndewerenughaneghe nao sena anduangi.

⁶⁷ Nao ukawizera waja wanughi ikumi na wawi, “Welee, nenyo wori mookunda kughenda?”

⁶⁸ Simoni Petro ukamtumbulia, “Bwana, dimghendia ani? Oho koko na malagho gha irangi ja kala na kala.

⁶⁹ Isi darumirie, sena dacheemanya angu oho nuo uja Mweli wa Mlungu.”

⁷⁰ Jesu ukawitumbulia, “Welee, si ini moni neremsaghueghe inyo ikumi na wawi? Ela sena umu onyu ni Mmbiwi!”

⁷¹ Aho orekoghe ukimghora Juda mwana wa Simoni Iskarioti, angu nuo moni wa waja ikumi na wawi uchaamfunya.