JOHANE 5 - Biblia Ilagho Jiboie Kwa Wandu Wose

Jesu kum'boisa mundu kaavui na Ndiwa

¹ Nyuma ya maza iro, Jesu ukajoka Jerusalemu kwa Ndima ya Wayahudi.

² Na aho Jerusalemu kaavui na Mbenge ya Ng'ondi, eko ndiwa iko na malalo masanu, iwangwagha kwa Kiebrania Bethzatha.

³ Andenyi ya malalo agho, korekoghe na wakongo wengi werelalieghe; vitungure, wakelemeri, na wa kupooza. [Wikiweseria machi kunyavurwa,

⁴ angu malaika wa Bwana orekoghe ukisea ndiwenyi kwa vimu vake kughinyavura machi; na uo ose orezoeghe kungia ndiwenyi nyuma ya machi kunyavurwa, oreboisiroghe wukongo ghwake ugho orekoghe nagho.]

⁵ Ahoeni korekoghe na mundu ulwale kwa miaka mirongo idadu na wunyanya.

⁶ Nao iji Jesu wammbona na kumanya angu wakaie aho kwa ngelo ndacha, ukamzera, “Welee, kwakunde kuboiso?”

⁷ Uja mkongo ukatumbulia, “Bwana, sipatire mundu oningira ndiwenyi ngelo machi ghanyavurwa, ela iji nakaia nikicha, mundu mzima waniida na kungia imbiri.”

⁸ Jesu ukamzera, “Wuka kuduke mkeka ghwako kughende.”

⁹ Shwa wori uja mundu ukaboa, ukaduka mkeka ghwake ukaghenda. Ilagho ijo jerebonyekieghe ituku ja Sabato.

¹⁰ Niko Wayahudi wamu wikamzera uja mundu waboiswa, “Idime ni ituku ja Sabato, yadarighidwa oho kuduka mkeka ghwako.”

¹¹ Nao ukatumbulia, “Uja mundu waniboisa nuo wanizera, ‘Duka mkeka ghwako kughende.’”

¹² Wikamkotia, “Uo wakuzera ‘Duka mkeka ghwako kughende’ nani?”

¹³ Ela uja mundu uboisiro nderemmanyireghe; angu Jesu orefumieghe aja, na wandu werekoghe izungu ilazi.

¹⁴ Konyuma Jesu ukamkua uja mundu Hekalunyi, ukamzera, “Ola kwaboisiro, lindia kusebonye kaung'a sena kuchepatwa ni ilagho jizamie kuchumba jija.”

¹⁵ Uja mundu ukaghenda na kuwighoria Wayahudi angu ni Jesu um'boisire.

¹⁶ Nao Wayahudi wikazoya kumtirira Jesu, angu orebonyereghe maza iro ituku ja Sabato.

¹⁷ Jesu ukawizera, “Aba wadabonya kazi matuku ghose, kwa huwu na ini suti nibonye kazi.”

¹⁸ Kwa wundu ghwa madedo agho, Wayahudi wikachuria kulola chia em'bwagha, kwa kukaia Jesu ndereinonieghe Sabato cheni, ela hata Mlungu wadammbanga wei ni ndee, ukikubonya uo moni karakara na Mlungu.

Nguma ra Mwana

¹⁹ Nao Jesu ukawizera, “Namghoria loli, Mwana ndedimagha kubonya ilagho jingi uo moni anduangi, ela wadabonya karakara na agho ughiwonagha kwa Ndee. Angu agho ughibonyagha uja Aba, nigho gheni na Mwana ughibonyagha wokoni.

²⁰ Angu uja Aba wamkunde Mwana, nao wadammbonyera maza iro reni uribonyagha. Sena uchammbonyera maza mbaa kuchumba iri, inyo mpate kushinika.

²¹ Angu sa iji koni Aba urukishagha wafu na kuwineka irangi, huwo koni Mwana wadawineka irangi awo uwikundagha.

²² Uja Aba ndemtanyagha mndungi anduangi, ela wamnekie uja Mwana wudimi ghose ghotanya;

²³ wose wipate kum'bonyera ishima Mwana, sa iji koni wim'bonyeragha ishima uja Aba wori. Uhu usem'bonyeragha uja Mwana ishima, ndem'bonyeragha ishima uja Aba oremdumieghe wori.

²⁴ “Namghoria loli, uo ose usikiragha ilagho japo, na kumrumiria Uo orenidumieghe, oko na irangi ja kala na kala; nao ndengiagha kutanyonyi anduangi, ela wameria kuida kufuma kifonyi na kungia iranginyi.

²⁵ Namghoria loli, ngelo iacha, hata idana eko, iji wafu wichaalusikira lwaka lwa Mwana wa Mlungu, na awo wilusikiragha, wichakaia moyo.

²⁶ Sa iji koni uja Aba uko na irangi andenyi kwake, wokoni wamnekie Mwana kukaia na irangi andenyi kwake.

²⁷ Sena wamnekie nguma retanya, angu uko Mwana wa Mdamu.

²⁸ Msakeshinulwa ni maza iri angu ngelo iacha, wafu wose wiko kaburinyi wichalusikira lwaka lwake;

²⁹ wiruke na kufuma kaburinyi kwawo; awo wibonyere nicha, wirukie irangi, na awo wibonyere wuwiwi, wirukie kutanywa.

Wushuhuda aighu ya Jesu

³⁰ “Sidimagha kubonya ilagho jingi kwa nguma yapo ini moni anduangi; ela nadatanya sa iji nisikiragha kwa Aba, na kutanya kwapo ni kwa hachi, kwa kukaia silolagha lukundo lwapo ini moni anduangi, ela lukundo lwake uo orenidumieghe.

³¹ Ngakushuhudia ini moni, wushuhuda ghwapo ndeghukaa ghwa loli anduangi.

³² Oko umu unishuhudiagha ini, nani namanya angu ugho wushuhuda unishuhudiagha nagho ni ghwa loli.

³³ Inyo morewidumieghe wandu kwa Johane, nao moni ukashuhudia agho gha loli.

³⁴ Si angu nakusaghika kwa wushuhuda ghwa wadamu, ela naghora malagho agha inyo mpate kukia.

³⁵ Johane orekoghe sa taa iakagha na kulangalishira mwengere, nenyo kwa ngelo vui morekoghe mkiboilwa kwa mwengere ghwake.

³⁶ “Ela neko na wushuhuda m'baa kuchumba ugho ghwa Johane. Angu iro kazi niribonyagha, iro Aba oreninekieghe niribonye, niro reni rinishuhudiagha kukaia uo orenidumieghe ni Aba.

³⁷ Na wokoni uja Aba orenidumieghe wanishuhudia; na inyo jingi ndemlusikire lwaka lwake hata kughuwona wushu ghwake anduangi;

³⁸ na ilagho jake ndejiko ngolonyi konyu kwa kukaia ndemumrumirie Uo oredumiloghe ni Uo moni.

³⁹ Mwadazighana-zighana Maandiko, mkiririkanya wei ghadima kumneka irangi ja kala na kala, nagho nigho ghinishuhudiagha ini;

⁴⁰ nenyo mwalegha kucha kwapo mpate irangi.

⁴¹ “Si angu nawuyalola kukaswa ni wandu,

⁴² ela namwichi seji muko, angu lukundo lwa Mlungu ndeluko ngolonyi konyu anduangi.

⁴³ Ini nachee kwa nguma ra Aba, nenyo ndemuniwusagha; ela ngera mndungi wacha kwa nguma rake, mchammbusa.

⁴⁴ Mdima wada kurumiria mkinekana wubaa mmbeni na mmbeni, nenyo msekunde kughulola ugho wubaa ghufumagha kwa Mlungu moni?

⁴⁵ Msakeghesha wei ini nichamshitakia kwa uja Aba, ela uo Musa mumsuwiriagha, nuo moni uchaamshitakia.

⁴⁶ Ngera loli modemrumiria Musa, kumangu mwanirumiria ini wori, kwa kukaia Musa oreandikieghe malagho aighu yapo.

⁴⁷ Ikakaia mseghirumirie maandiko gha Musa, mdima wada kughirumiria malagho ghapo?”