JOHANE 2 - Biblia Ilagho Jiboie Kwa Wandu Wose

Arusi muzinyi Kana

¹ Ituku ja kadadu korekoghe na arusi Kana muzi ghwa Galilaya, na mae Jesu orekoghe ahoeni.

² Jesu na wanughi wake wori werewangiloghe.

³ Divei iendasia, mae Jesu ukamzera, “Ndewina divei.”

⁴ Jesu ukamzera, “Ngamao agho ni ghaki? Ngelo yapo ndeivikie anduangi.”

⁵ Niko aho mae Jesu ukawizera wadumiki, “Bonyenyi ijo jose uchaamzera.”

⁶ Na aho korekoghe na mbuta irandadu ra magho riwikilo kunughana na mzango ghwa Wayahudi ghokuelesha, kula mbuta idimagha kungira sa lita ighana ra machi.

⁷ Jesu ukawizera wadumiki, “Churenyi iri mbuta machi.” Nao wikarichura pacha.

⁸ Ukawizera, “Idana daenyi mumghenjere m'baa wa arusi.” Nawo wikamghenjera.

⁹ Hata iji m'baa wa arusi watoa agho machi ghiwurie divei, nao usemanyagha andu ifumie, (ela awo wadumiki werekoghe wikimanya) ukammbanga uja bwana arusi,

¹⁰ ukamzera, “Kula mundu wadaneka wandu divei iboie kiimbiri, wandu wikanywa na ndighi, niko uredagha ija ya machi-machi. Ela oho kwaduagha na divei iboie hata idana!”

¹¹ Mwakilimbiti uhu wa imbiri, Jesu orem'bonyereghe aja Kana muzi ghwa Galilaya; ukaghuwonyera wubaa ghwake, na wanughi wake wikamrumiria.

¹² Nyuma ya agho, Jesu, na mae, na waruna, na wanughi wake, wikasea cha Kafarnaumu; wikakaia aho kwa matuku matini.

Jesu kughenda Hekalunyi

¹³ Ngelo ya Ndima ya Pasaka ya Wayahudi erekoghe yavika kaavui, na Jesu ukajoka Jerusalemu.

¹⁴ Nao aja Hekalunyi ukakua wandu wikiuza ng'ombe, na ng'ondi, na maringo; na awo wibadilishanagha pesa wiko kidombo mezenyi kwawo.

¹⁵ Nao Jesu ukaboisa kiboko cha mirizi, ukawifunya Hekalunyi wose, na ng'ondi na ng'ombe; ukaridia pesa ra awo werekoghe wikibadilishana, ukaribingilisha meza rawo;

¹⁶ ukawizera awo werekoghe wikiuza maringo, “Rifunyenyi noko iri rose, msakeibonya nyumba ya Aba ikaie nyumba ezoghoria.”

¹⁷ Wanughi wake wikakumbuka seji iandikilo huwu, “Iriso jeikunda nyumba yako janibwagha.”

¹⁸ Nao Wayahudi wikamkotia, “Ni alamaki kuibonyagha idiwonyere angu koko na hachi ebonya maza iri?”

¹⁹ Jesu ukawizera, “Inonenyi Hekalu ihi, nani nichaiagha kwa matuku adadu.”

²⁰ Nao Wayahudi wikaghamba, “Kwadima kuiagha Hekalu ereaghiloghe kwa miaka mirongo ina na irandadu kwa matuku adadu?”

²¹ Ela Jesu odeghora Hekalu ya mumbi ghwake.

²² Kwa huwu, iji warukishwa kufuma kwa wafu, wanughi wake wikakumbuka seji oreghorieghe huwo; wikaghirumiria maandiko na ilagho ijo Jesu orejighorieghe.

Jesu kurimanya tabia ra wandu wose

²³ Nao iji Jesu orekoghe Jerusalemu kwa Ndima ya Pasaka, wandu wengi weremrumirieghe kwa kuwona awo weke mwakilimbiti orewibonyereghe;

²⁴ ela Jesu nderewirumirieghe awo, angu orewimanyireghe wose.

²⁵ Hata nderekundieghe mndungi umghorie maza ra wandu anduangi, angu oremanyireghe rose riko andenyi ya mdamu.