JOHANE 18 - Biblia Ilagho Jiboie Kwa Wandu Wose

Kuwadwa kwa Jesu

¹ Nao iji Jesu wameria kughora agho, ukafuma na wanughi wake ukaruwuka vololo ya Kidroni. Andu aho korekoghe na mbuwa, na Jesu ukangia aho andwamweri na wanughi wake.

² Juda, uo mfunyi wake orekumanyireghe andu aja, angu kalazi koni Jesu orekwanyikieghe na wanughi wake aho.

³ Juda umeria kuwidwa masikari na walindiri wa Hekalu kufuma kwa Wakohani wabaa na Mafarisayo, ukacha nawo aja mbuwenyi, widwae taa na tochi na maswagha ghawo.

⁴ Jesu ukimanya agho ghose gherekoghe ghikimchea, ukawifumia ukawizera, “Nani mumlolagha?”

⁵ Nawo wikamtumbulia, “Jesu wa Nazareti!” Jesu ukaghamba, “Ni ini moni.” Juda, uo mfunyi wake, orekoghe andwamweri nawo.

⁶ Uendawizera wei, “Ni ini moni,” wikawuya kinyuma-nyuma wikaghwa andonyi.

⁷ Jesu ukawizera sena, “Nani mumlolagha?” Wikaghamba, “Jesu wa Nazareti.”

⁸ Jesu ukawizera, “Nameria kumghoria angu ni ini moni. Idana ngera ni ini munilolagha, wisighenyi awa wighende chia rawo.”

⁹ (Oreghorieghe agho kukatisha ilagho oreghorieghe, “Awo koreninekieghe simlaghashire ungi anduangi.”)

¹⁰ Nao Simoni Petro uko na lufu, ukalukua ukamdema mzumba wa Mkohani M'baa, ukamdumbua kudu kwa mkonu ghwa kiwomi; na irina ja uo mzumba ni Maliko.

¹¹ Jesu ukamzera Petro, “Wunja lufu lwako kiwonyi kwaro. Welee, kuamanya icho kikombe Aba uninekie sichinywagha?”

Jesu imbiri ya Anasi

¹² Nao waja masikari, na m'baa wawo, na walindiri wa Wayahudi, wikammbwada Jesu wikamfunga.

¹³ Imbiri, wikamghenja kwa Anasi uo orekoghe mghosi wa Kayafa, nao Kayafa orekoghe Mkohani M'baa mwaka ghuja.

¹⁴ Uo Kayafa, nuo orewinekieghe Wayahudi njama angu yafwane mundu umu ufo kwa wundu ghwa wandu.

Petro kumkana Jesu

¹⁵ Nao Simoni na uja mnughi mzima wikamnugha Jesu. Uja mnughi mzima orekoghe umanyikie kwa Mkohani M'baa, kwa huwo orengirieghe andwamweri na Jesu wazenyi kwa Mkohani M'baa.

¹⁶ Ela Petro orekoghe kimusi shighadi, kaavui na mnyango. Niko uja mnughi mzima oremanyikieghe kwa Mkohani M'baa ukafuma shighadi, ukaghora na muka mlindiri mnyango, ukamngira Petro andenyi.

¹⁷ Nao uja muka mlindiri mnyango ukamkotia Petro, “Welee, na oho si umu wa wanughi wa uhu mundu?” Petro ukamzera, “Si ini ungi.”

¹⁸ Wadumiki na walindiri werekoghe wakora modo ghwa maka, angu korekoghe mbeo; wikakaia wikioda modo. Na Petro orekoghe kimusi ukioda modo andwamweri nawo.

Mkohani M'baa kumkotia Jesu makoto

¹⁹ Nao Mkohani M'baa ukamkotia Jesu malagho aighu ya wanughi wake na mafundisho ghake.

²⁰ Jesu ukamtumbulia, “Ini nerekoghe ngighora malagho worinyi kwa wandu wose, na kufundisha andenyi ya masunagogi, na Hekalunyi andu Wayahudi wose wikwanagha, hata na jingi sidedie ilagho jingi kivisonyi anduangi.

²¹ Kwaki kunikotiagha ini? Wikotie awo wisikire ngideda ngera nawizerie wada? Waghimanya agho nighighorie.”

²² Nao iji waghora agho, mlindiri umu orekoghe kimusi ahoeni, ukamkaba Jesu na lui ukighamba, “Kuamtumbulia Mkohani M'baa huwu?”

²³ Jesu ukamzera, “Ngera nadeda makosa kughishuhudie makosa ghapo worinyi, na ngera naghora loli, kwaki kunikabagha?”

²⁴ Nao Anasi ukamghenja Jesu ufungilo kwa Mkohani M'baa Kayafa.

Petro kumkana Jesu sena

²⁵ Petro orekoghe kimusi ajaeni ukioda modo. Wandu wamu wikamkotia, “Welee, oho ndekuko umu wa wanughi wake anguwada?” Nao ukakana ukighamba, “Si ini ungi.”

²⁶ Nao umu wa wadumiki wa Mkohani M'baa, kichuku chake uja mundu oredumbuloghe kudu ni Petro ukamkotia, “Welee, siamanya nakuwonieghe mbuwenyi andwamweri nao?”

²⁷ Petro ukakana sena, nao ahoeni njogholo ikadeda.

Jesu kuredwa imbiri ya Pilato

²⁸ Nao nakesho wikamfunya Jesu kwa Kayafa wikamghenja ngomenyi iwangwagha praetoriumu, nawo ndewerengirieghe andenyi ya praetoriumu wichelushwa, eri wipate kuija Pasaka.

²⁹ Pilato ukawifumia shighadi ukawikotia, “U mundu mwamshitakiaki?”

³⁰ Nawo wikamtumbulia, “Ngera mundu uhu si mmbiwi, kumangu ndadamredagha kwako anduangi.”

³¹ Pilato ukawizera, “Mmbwadenyi mumtanye kwa sharia enyu.” Wikatumbulia, “Isi ndediwadie sharia ebwagha mundu anduangi.”

³² (Agha gherekaieghe kukatisha malagho oreghighorieghe Jesu gha kuwonyera ni kifwa chiao uchaafwa.)

³³ Pilato ukawuya andenyi ya praetoriumu, ukammbanga Jesu ukamkotia, “Welee, oho ni Mzuri wa Wayahudi?”

³⁴ Jesu ukamtumbulia, “Welee, kuakotia agho malagho kumoni, angu ni mndumu wakughoria malagho ghapo?”

³⁵ Pilato ukatumbulia, “Kwani ini neeka Myahudi? Mbari yako cheni na wakohani wabaa niwo wakureda kwapo. Kwabonya wada?”

³⁶ Jesu ukamtumbulia, “Wuzuri ghwapo si ghwa wurumwengu ughu anduangi. Ngera wuzuri ghwapo ghodeeka ghwa wurumwengu ughu, kumangu wadumiki wapo wabonya wuda, eri nisewado ni Wayahudi; ela wuzuri ghwapo si ghwa wurumwengu anduangi.”

³⁷ Niko Pilato ukamkotia, “Kwa huwo oho ko mzuri-e?” Jesu ukamtumbulia, “Ni oho kwaghamba angu ne mzuri. Nani nerevaloghe na kucha wurumwengunyi kwa wundu ughu ghoni, niwighorie wandu iyo loli. Kula mundu uko andenyi ya iyo loli wadanisikira.”

³⁸ Pilato ukamkotia, “Niki chiwangwagha loli?” Pilato uendaghora agho, ukawifumia Wayahudi sena ukawizera, “Ini siwonagha ikosa jingi kwake anduangi.

Jesu kutanywa ubwagho

³⁹ Ela moko na mzango ghwa ini kumfunguya mundu umweri ngelo ya Pasaka; mwawona wada nimfunguye Mzuri wa Wayahudi?”

⁴⁰ Nao wikaghora kwa lwaka lubaa, “Hata! Uo mbai! Deekunda Baraba.” Na Baraba orekoghe kiting'a.