JOHANE 14 - Biblia Ilagho Jiboie Kwa Wandu Wose

Jesu, chia eghenda kwa Aba

¹ Niko Jesu ukawizera, “Msakeja wasi ngolonyi konyu; mrumirienyi Mlungu, nirumirienyi na ini wori.

² Nyumbenyi kwa Aba gheko malalo mengi ghekaia; ngera ghiserekoghe, kumangu namerie kumghoria. Ela idana niaghenda kum'boisira malalo.

³ Nani ngaghenda na kum'boisira malalo, nichawuya sena nimdo cha kwapo, mpate kukaia andu nikaiagha.

⁴ Nenyo mwaiichi chia ya andu nighendagha.”

⁵ Tomasi ukamzera, “Bwana, andu kughendagha ndedikumanyire anduangi; dichaimanya wada chia?”

⁶ Jesu ukamtumbulia, “Ini nuo Chia, na Loli, na Irangi; mndungi ndedimagha kucha kwa Aba useidirie kwapo.

⁷ Ikakaia muniichi, wokoni na Aba mwamwichi. Kufuma idana mwammanya, sena mwameria kummbona.”

⁸ Filipo ukamzera, “Bwana diwonyere Aba, nesi dichakatwa.”

⁹ Jesu ukamzera, “Uluma lose dakanya ndekuniichi Filipo? Uo uniwonie ini, wamerie kummbona uja Aba. Kughora wada sena, ‘Kudiwonyere Aba?’

¹⁰ Welee, ndekurumirie angu ini neko andenyi kwa Aba, na Aba oko andenyi kwapo? Malagho ghose nawuyamghoria siwueghora kwa nguma yapo anduangi, ela uja Aba uko andenyi kwapo, nuo wawuyabonya kazi rake.

¹¹ Nirumirienyi iji namzera angu neko andenyi kwa Aba, na Aba oko andenyi kwapo. Iji mserumiriagha, rumirienyi kwa wundu ghwa rija kazi reni.

¹² Namghoria loli, uo unirumiriagha, uchabonya iro kazi niribonyagha; ee, nao uchabonya na zima mbaa kuchumba iri; angu niaghenda kwa Aba.

¹³ Icho chose mchaalomba kwa irina japo, nicham'bonyera; Aba upate kukaswa andenyi ya Mwana.

¹⁴ Mkanilomba kindo chingi kwa irina japo nicham'bonyera.

Ilaghiro ja Roho Mweli

¹⁵ “Mkanikunda mchaiwadia memu yapo.

¹⁶ Nani nichamlomba Aba, nao uchamneka Mtesia mzima, uchaakaianya na inyo kwa kala na kala.

¹⁷ Uo ni Roho wa loli, wurumwengu ghusedimagha kummbusa, angu ghusedimagha kummbona; hata kummanya anduangi. Ela inyo mwamwichi, angu oko andwamweri nenyo, nao uchakaia andenyi konyu.

¹⁸ “Sichaamsigha wakiwa anduangi, ela nichacha konyu.

¹⁹ Kwa ngelo vui wurumwengu ndeghuchaaniwona sena, ela inyo mchaniwona, na kwa kukaia neko moyo, inyo wori mchakaia moyo.

²⁰ Ngelo iyo ikavika, mchamanya angu ini neko andenyi ya Aba, na inyo moko andenyi kwapo, na ini andenyi konyu.

²¹ Uo uiwadagha memu yapo na kuikatisha, nuo unikundagha; na uo unikundagha, uchakundwa ni Aba, na ini nichamkunda na kukuwonyera ini moni kwake.”

²² Juda (suo ungi Iskarioti) ukamzera, “Bwana, idimika wada oho kukuwonyera kodu kuseko na kukuwonyera kwa wurumwengu?”

²³ Jesu ukamtumbulia, “Mundu ukanikunda, uchajiwadia Ilagho japo, na Aba uchamkunda, nesi dichacha na kukaia andwamweri nao.

²⁴ Uo usenikunde, ndeghiwadagha malagho ghapo anduangi. Na ilagho mujisikiragha si japo jingi, ela ni ja Aba uo orenidumieghe.

²⁵ “Namghoria malagho agha ingelo niko andwamweri nenyo,

²⁶ ela uja Mtesia uja Roho Mweli, Uo Aba uchaamduma kwa irina japo, uchamfundisha kula ilagho, na kumkumbusa maza rose neremghorieghe.

²⁷ “Namsighia sere, sere yapo namneka, simnekagha seji wurumwengu ghubonyagha. Msakeja wasi ngolonyi konyu, hata msakeobua.

²⁸ Mwameria kusikira ngimzera, ‘Niaghenda sena nimmburie.’ Ngera modenikunda, kumangu mwaboilwa; kwa kukaia naawuyaghenda kwa Aba, angu Aba ni m'baa kunichumba ini.

²⁹ Na idana namghoria imbiri ghisebonyekie, eri iji ghabonyeka, mpate kurumiria.

³⁰ Sidimagha kughora nenyo luma, angu m'bonyi nguma wa wurumwengu ughu waawuyacha; nao ndewadie nguma ringi aighu yapo anduangi.

³¹ Ela yafwane wurumwengu ghumanye angu namkunde Aba, niko nawuyabonya sa iji koni orenilaghirieghe. Wukenyi difume aha.