JOHANE 13 - Biblia Ilagho Jiboie Kwa Wandu Wose

Jesu kuwioghosha wanughi wake maghu

¹ Nao imbiri ya Ndima ya Pasaka, Jesu ukimanya angu ngelo yake yavika esigha ughu wurumwengu, uwuye kwa Aba, na seji orekoghe ukiwikunda wandu wake wiko wurumwengunyi, ukawikunda wandu hata kutua.

² Ngelo ya vindo va nakenyi, uja Mmbiwi orekoghe wameria kumngira Juda mwana wa Simoni Iskarioti ngolo emfunya Jesu.

³ Jesu moni ukimanya angu uja Aba wamnekie vilambo vose mikonunyi kwake, na angu orefumieghe kwa Mlungu, sena uaghenda kwa Mlungu;

⁴ ukawuka ngelo ya vindo, ukainja nguwo rake na kukufunga na taulu.

⁵ Nao ukadungiria machi beseninyi, ukazoya kuwioghosha wanughi wake maghu, na kuwiaghia kwa ija taulu orekufungieghe nayo.

⁶ Nao ukavika kwa Simoni Petro. Petro ukamzera, “Bwana kuanioghosha maghu?”

⁷ Jesu ukamzera, “Agho nighibonyagha ndekughimanyagha idana kungi, ela kuchaghimanya konyuma.”

⁸ Petro ukamzera, “Na jingi ndekuchaanioghosha maghu ghapo anduangi.” Jesu ukamzera, “Ngera nisekuoghoshagha maghu-lee, ndekuna wungara ghungi na ini anduangi.”

⁹ Simoni Petro ukamzera, “Bwana nioghoshe; si maghu ghiekeri, ela hata mikonu na chongo wori.”

¹⁰ Jesu ukamzera, “Uo wameria kukuoghosha ndewuyaakunda kukuoghosha sena, ela maghu gheni; angu wameria kuela. Nenyo mwaelie, ela si inyo mmbose anduangi.”

¹¹ Jesu oremmanyireghe uo uchaamfunya, niko oreghorieghe, “Inyo mwaela, ela si inyo mmbose anduangi.”

¹² Umeria kuwioghosha maghu ghawo, ukarwa nguwo rake, na kusea kidombo wulalonyi kwake. Ukawikotia, “Mwatambukilwa ni agho nam'bonyera idakoni?

¹³ Inyo mwadaniwanga Mwalimu na Bwana, nenyo mwabonya nicha; angu niko koni niko.

¹⁴ Ikakaia ini Bwana na Mwalimu onyu namuoghosha maghu ghenyu, yamfwana na inyo wori kuoghoshana maghu mmbeni na mmbeni.

¹⁵ Angu ini nammbikia fwana, eri inyo m'bonyeghe wokoni seji nam'bonyera.

¹⁶ Namghoria loli, mdumiki ndekaiagha m'baa kuchumba bwana wake, hata mdumi ndekaiagha m'baa kuchumba uo umdumie anduangi.

¹⁷ Ngera mwaghimanya agha, mwarasimilwa mkaghibonya.

¹⁸ “Siwueghora huwu kwa inyo mmbose anduangi, angu nawiichi awa niwisaghue, ela ni suti Maandiko ghikatie, agho ghighambagha, ‘Uo dijanye vindo vapo, waghalukie ulo nani.’

¹⁹ Nani namghoria agha imbiri ghisebonyekie, eri ghikabonyeka, mpate kurumiria angu Ini Nuo Moni.

²⁰ Namghoria loli, Uo ummbusagha mndungi nimdumagha, uaniwusa ini, na uo uniwusagha ini, uammbusa uo orenidumieghe wori.”

Jesu kughora kiimbiri angu uchafunywa

²¹ Jesu umeria kughora agho, ukasirimika ngolonyi kwake ukaghamba worinyi, “Namghoria loli, umu onyu uchanifunya!”

²² Nao wanughi wake wikazighanana wisemmanyagha uo umghoragha anduangi.

²³ Umu wa wanughi, uo Jesu oremkundieghe, orekoghe wasea kidombo kaavui na Jesu.

²⁴ Nao Petro ukamkunyiria umkotie Bwana ngera uo umghoragha nani.

²⁵ Na uo mnughi ukikaia kaavui na Jesu ukamkotia, “Bwana nani?”

²⁶ Jesu ukatumbulia, “Ni uo nichaamshingia kibelele cha mkate na kumneka.” Nao uendashingia kibelele cha mkate, ukamneka Juda mwana wa Simoni Iskarioti.

²⁷ Na Juda umeria kuchiwusa icho kibelele cha mkate, Shetani ukamngia. Jesu ukamzera, “Ijo kukunde kubonya jibonye shwa-shwa.”

²⁸ Hata ndekorekoghe na ungi wa awo werekoghe mezenyi oremanyireghe kwaki oremzeragha huwo anduangi.

²⁹ Wamu wikaghesha wei angu Juda orekoghe ukidwa mfuko ghwa pesa, Jesu odemzera ughuo ivo vindo vikundikagha kwa ndima, angu kewada uneke wakiwa kindo chimu.

³⁰ Nao Juda uendachiwusa icho kibelele cha mkate, ukafuma shighadi shwa. Nako korekoghe kio.

Momu mmbishi

³¹ Nao iji Juda wameria kufuma shighadi, Jesu ukaghamba, “Idana Mwana wa Mdamu wameria kukaswa, na Mlungu wameria kukaswa andenyi kwake.

³² Ngera Mlungu wakaswa andenyi kwake, huwo koni Mlungu uchamkasa Mwana andenyi kwake uo moni; nao uchamkasa shwa wori.

³³ “Wanake, ngelo ekanya nenyo yasighwa ndinieri. Mchanilola, nani namghoria sa iji koni nereghorieghe vilongozi va Wayahudi, ‘Andu nighendagha, inyo ndemdimagha kucha anduangi.’

³⁴ Momu mmbishi namneka inyo: Kundanenyi mmbeni na mmbeni; sa iji koni neremkundieghe, nenyo mkundane woruwo.

³⁵ Mkakundana, wandu wose wichamanya angu inyo moko wanughi wapo.”

Jesu kughora kiimbiri angu Petro uchamkana

³⁶ Na Simoni Petro ukamkotia, “Bwana kughenda hao?” Jesu ukatumbulia, “Andu cnighendagha ini, ndekudimagha kuninugha idana anduangi, ela kuchaninugha konyuma.”

³⁷ Petro ukamzera, “Bwana, kwaki nisedimagha kukunugha idana? Ini neko tayari kufwa kwa wundu ghwako.”

³⁸ Jesu ukatumbulia, “Loli kwadima kufwa kwa wundu ghwapo? Nakughoria loli, njogholo ndeichadeda hata kwameria kunikana kadadu.”