JOHANE 11 - Biblia Ilagho Jiboie Kwa Wandu Wose

Kifwa cha Lazaro

¹ Nao mndumu wa Bethania uwangwagha Lazaro orekoghe mkongo. Bethania ni muzi ghwa Maria na mruna Marita.

² Ni uja Maria oremshingieghe Bwana mavuda, na kumuaghia maghu ghake kwa iridia jake, nuo mruna Lazaro orekoghe mkongo.

³ Na waja waruna wa waka wikaduma momu kwa Jesu wikighamba, “Bwana, mghenyi wako kumkunde ni mkongo.”

⁴ Nao Jesu iji wasikira agho ukaghamba, “Wukongo ughu si kwa wundu ghwa kifwa anduangi, ela ni kwa wundu ghwa kumredia Mlungu wubaa, na kwa wundu ghwa Mwana wa Mlungu kukaswa.”

⁵ Jesu oremkundieghe Marita, na mruna wa waka, na Lazaro.

⁶ Ela sena iji waghorelwa angu Lazaro orekoghe mkongo, ukachuria kukaia andu koni orekoghe kwa matuku awi.

⁷ Niko ukawizera wanughi wake, “Dighende Judea sena.”

⁸ Wanughi wake wikamzera, “Mwalimu, kafwani koni Wayahudi wedeeka wikikulola wikulase na magho, sena kookunda kughenda ahoeni?”

⁹ Jesu ukawitumbulia, “Welee, saa ra dime si ikumi na iwi anguwada? Uo ose ughendagha na dime ndekuwagha anduangi, angu waghuwona mwengere ghwa wurumwengu ughu.

¹⁰ Ela ukaghenda na kio uchakuwa, angu ndena ugho mwengere anduangi.”

¹¹ Jesu uendameria kughora agho ukaghamba, “Mghenyi odu Lazaro walala, ela niaendammbusira.”

¹² Wanughi wake wikamzera, “Bwana, ngera waalala, uboa to.”

¹³ Ela Jesu odeghora malagho gha kifwa cha Lazaro, nawo wikadaghesha uaghora kulala kwa dilo.

¹⁴ Niko Jesu ukawighoria worinyi, “Lazaro wafwa,

¹⁵ ela naboilwa kwa wundu ghonyu angu serekoghe aho, eri inyo mpate kurumiria. Elaima dighende kwake.”

¹⁶ Tomasi (uwangwagha Masa) ukawizera wanughi wammbao, “Ndedighende diwose difwanye nao.”

Jesu, uko kuruka na irangi

¹⁷ Nao iji Jesu wavika, ukamkua Lazaro usinde andenyi ya kaburi matuku ana.

¹⁸ Bethania erekoghe kaavui na Jerusalemu sa wukula ghwa kilometa idadu,

¹⁹ na Wayahudi wengi werekoghe wacha kwa weke Marita na Maria, kuwihoresha ngolo kwa wundu ghwa kifwa cha mruna.

²⁰ Nao iji Marita wasikira angu Jesu waawuyacha, ukaghenda kummara, ela Maria oresigharikieghe nyumbenyi.

²¹ Marita ukamzera Jesu, “Bwana, ngera kodeeka aha, kumangu mwanidu nderefwagha anduangi.

²² Ela sena namanya angu hata idana Mlungu uchakuneka icho chose kuchaamlomba.”

²³ Jesu ukamzera, “Mwanyinyu ucharuka.”

²⁴ Marita ukamzera, “Namanya angu ucharuka ngelo ya kuruka ituku ja kutua mbai.”

²⁵ Jesu ukamzera, “Ini nuo uko kuruka na irangi. Uo unirumiriagha ini, hata ngera wafwa, uchakaia moyo;

²⁶ na uo ose uko moyo, na kunirumiria ini, na jingi ndechaafwa anduangi. Welee, kwarumiria agho?”

²⁷ Marita ukamzera, “Ee Bwana. Narumiria angu oho koko Kristo, Mwana wa Mlungu uja uchagha wurumwengunyi.”

Jesu kudikwa ni mbori

²⁸ Nyuma ya Marita kughora huwo, ukaghenda kummbanga mruna Maria kwa kiviso ukamzera, “Mwalimu oko aha wakuwanga.”

²⁹ Nao iji Maria wasikira agho, ukawuka shwa-shwa, ukaghenda kummara.

³⁰ Na Jesu orekoghe usengirie mzinyi kande, ela orekoghe ajaeni Marita orekwaneghe nao.

³¹ Waja wandu werekwanyeghe na Maria wikimhoresha, iji weremmbonieghe ukiwuka na kufuma shwa-shwa wikamnugha, angu wereririkanyireghe uaghenda kulila aja kaburinyi.

³² Nao iji Maria orevikieghe andu Jesu orekoghe na kummbona, ukaghwa maghunyi kwake ukimzera, “Bwana, ngera kodeeka aha, kumangu mwanidu nderefwagha anduangi.”

³³ Jesu uendammbona ukilila, na Wayahudi waja weremnughieghe wikilila wori, ngolo yake ikanyavurika na kuja wasi.

³⁴ Ukawikotia, “Welee, mwammbikie hao?” Wikaghamba, “Bwana, choo kuwone.”

³⁵ Jesu ukadikwa ni mbori.

³⁶ Nao Wayahudi wikaghamba, “Zighanenyi seji oremkundieghe!”

³⁷ Wazima wikaghamba, “Keni mundu uhu oremtambueghe uja kitungure meso, nderedimagha kughiria Lazaro usakefwa anguwada?”

Jesu kumrukisha Lazaro

³⁸ Nao Jesu ukasirimika nandighi sena ngolonyi kwake, ukacha kaburinyi; nayo erekoghe ya mbanga na igho jawikwa mnyangonyi kwaro.

³⁹ Jesu ukaghamba, “Injenyi igho!” Marita mruna uja mundu ufue ukaghamba, “Bwana, luma ulu uanuka; angu wakaie kaburinyi matuku ana.”

⁴⁰ Jesu ukamzera, “Welee, sikuzerieghe kukarumiria kuchaghuwona wubaa ghwa Mlungu anguwada?”

⁴¹ Nao wikajiinja igho. Jesu ukazighana noko ighu ukaghamba, “Nakuneka chawucha Aba, angu kwanisikira,

⁴² nani neremanyireghe angu oho kwadanisikira ngelo rose. Ela naghighora agha kwa wundu ghwa wandu wiko kimusi aha; wipate kurumiria angu ni oho korenidumieghe.”

⁴³ Umeria kughora agho, ukawanga kwa lwaka lubaa, “Lazaro! Fuma shighadi!”

⁴⁴ Nao uja mundu orekoghe ufue ukafuma shighadi, urighirilo nguwo ra kurika maghu na mikonu, na wushu ghwake ghufungilo na kitambaa. Jesu ukawizera, “Mfunguonyi, mumleke ughende.”

Njama rem'bwagha Jesu

⁴⁵ Kwa huwo Wayahudi wengi awo werechieghe kwa Maria, iji wawona agho oreghibonyereghe, wikamrumiria.

⁴⁶ Ela wazima wikaghenda na kuwighoria Mafarisayo iro maza rerebonyeroghe ni Jesu.

⁴⁷ Niko Mafarisayo na wakohani wabaa wikakwanya Mwandu, nawo wikaghamba, “Dibonya wada? Mundu uhu waawuyabonya weke mwakilimbiti wengi.

⁴⁸ Dikamsigha huwu, kula mundu uchamrumiria, na Waroma wichacha na kuinona Hekalu na mbari edu.”

⁴⁹ Umu wawo uwangwagha Kayafa, uo orekoghe Mkohani M'baa mwaka ugho, ukawizera, “Inyo ndemwichi ilagho jingi putu.

⁵⁰ Ndemmbonagha angu yamfwana mundu umu ufo kwa wundu ghwa wandu, kuchumba mbari yose kutota anguwada?”

⁵¹ Agha ndereghighorieghe kwa kumanya kwake koni anduangi, ela angu orekoghe Mkohani M'baa mwaka ghuja, orelodieghe angu Jesu uchafwa kwa wundu ghwa mbari yawo;

⁵² hata si kwa mbari yawo iekeri anduangi, ela uwikwanye chiaimweri awo wana wa Mlungu wisaghisikie.

⁵³ Nao kufuma aho, vilongozi va Wayahudi wikabonya mpango ghom'bwagha Jesu.

⁵⁴ Kwa huwu Jesu ndereselieghe worinyi kwa Wayahudi anduangi, ela orefumieghe aho ukaghenda kaavui na kireti, muzi ghuwangwagha Efraimu; ukakaia aho andwamweri na wanughi wake.

⁵⁵ Idana Ndima ya Pasaka ya Wayahudi erekoghe kaavui, na wandu wengi werejokieghe Jerusalemu, wipate kukuelesha Ndima iyo isevikie.

⁵⁶ Nawo wikakaia wikimlola Jesu; hata iji wakwana chiaimweri Hekalunyi, wikakotiana weni na weni, “Mmbona wada? Yadimika ikaie useche ndimenyi loli?”

⁵⁷ Wakohani wabaa na Mafarisayo werekoghe wafunya momu angu mndungi ukamanya andu uko, uwighorie wipate kummbwada.