JOHANE 10 - Biblia Ilagho Jiboie Kwa Wandu Wose

Mfwano ghwa Mlisha wa Ng'ondi

¹ Nao Jesu ukaghamba, “Namghoria loli, ngera mundu usengiagha cha iranunyi ja ng'ondi kwa kuidiria mnyangonyi, ela uajokeria andu kuzima, uo ni kitoi na kiting'a.

² Ela uo ungiagha kwa kuidiria mnyangonyi, nuo mlisha wa ng'ondi.

³ Mlindiri mnyango wadamrughuya; na ng'ondi radasikira lwaka lwake ukiriwanga kwa marina ghawo, nao wadarighenja shighadi.

⁴ Iji wameria kurifunya shighadi wadakiria imbiri kwawo, naro ng'ondi radamnugha angu raluichi lwaka lwake.

⁵ Ng'ondi iro, nderidimagha kumnugha mghenyi, ela richamkimbia, kwa kukaia nderilumanyagha lwaka lwa waghenyi anduangi.”

⁶ Jesu oretumieghe mfwano ughu, ela awo ndeweretambukiloghe ni agho orekoghe ukighora anduangi.

Jesu Mlisha mucha

⁷ Nao Jesu ukaghora sena, “Namghoria loli, ini nuo mnyango ghwa ng'ondi.

⁸ Awo wose werechieghe imbiri kwapo ni vitoi na viting'a, na ng'ondi ndererewisikireghe anduangi.

⁹ Ini nuo mnyango, uo ungiagha kwa kuidiria kwapo, uchakia; nao uchangia, na kufuma, na kuwona malisho.

¹⁰ Kitoi chadacha kwa kuiwa, kubwagha na kunona; ini nerechieghe wipate kukaia na irangi ja kala na kala, sena wijipate kwa wungi.

¹¹ “Ini nuo Mlisha mucha. Mlisha mucha wadafunya irangi jake kwa wundu ghwa ng'ondi.

¹² Mundu wa mafungu, nao si mlisha ungi, na ng'ondi riseko mali yake, iji wawona kikwau chikicha wadakimbia na kurisigha ng'ondi. Na kikwau chadariwada ng'ondi na kurisaghisa.

¹³ Wakimbia angu ni mundu wa mafungu, hata ndetalagha maza ra ng'ondi anduangi.

¹⁴ Ini nuo Mlisha mucha. Iro rapo nariichi, naro wori raniichi ini,

¹⁵ sa iji Aba uniichi ini, nani namwichi Aba; nani najifunya irangi japo kwa wundu ghwa ng'ondi.

¹⁶ Sena nawadie ng'ondi rimu riseko ra iranu iji. Naro reni yanifwana kuriruda, naro richalusikira lwaka lwapo; nao kuchakaia chagha chimweri na mlisha umweri.

¹⁷ “Uja Aba wanikunda kwa kukaia najifunya irangi japo nipate kujiwusa sena.

¹⁸ Ndekuwadie mndungi unisokagha irangi japo, ela niajifunya kwa kukunda kwapo ini moni. Neko nandighi rejifunya, sena neko nandighi rejiwusa. Huwo niko nerelaghiriloghe ni Aba.”

¹⁹ Nao kukakaia na mawaghinyiko sena aghadi ya Wayahudi kwa wundu ghwa malagho agho.

²⁰ Wengi wawo wikaghamba, “Oko na pepo, sena oko na isu, kwaki mumsikiragha?”

²¹ Wazima wikaghamba, “Madedo agha si gha mundu uko na pepo kungi, welee, pepo yadima kutambua meso gha vitungure?”

Jesu kuleghwa ni Wayahudi

²² Korekoghe na Ndima ya Kuwika Hekalu Wakfu aho Jerusalemu, ngelo ya kwari.

²³ Jesu orekoghe ukisela Hekalunyi andenyi ya lukumbi lwa Solomoni.

²⁴ Nao Wayahudi wikammaria chia rose wikamzera, “Kudikambira chongo hata lii? Ngera koko Kristo kudighorie worinyi.”

²⁵ Jesu ukawitumbulia, “Namerie kumghoria nenyo ndemrumiriagha anduangi. Iro kazi niribonyagha kwa irina ja Aba, niro reni rinishuhudiagha ini.

²⁶ Ela inyo ndemrumiriagha kwa kukaia ndemko ng'ondi rapo anduangi.

²⁷ Ng'ondi rapo radasikira lwaka lwapo, nani nariichi, naro raninugha.

²⁸ Nani narineka irangi ja kala na kala, hata na jingi nderichaatota, sena ndekuwadie mndungi uchaanisoka mkonunyi kwapo anduangi.

²⁹ Uo Aba uninekie ni m'baa kuchumba wose, hata ndekuwadie mndungi udimagha kurifunya mkonunyi kwa Aba anduangi.

³⁰ Ini na Aba ni umweri.”

³¹ Nao Wayahudi wikashoa magho sena, wipate kumlasa.

³² Jesu ukawizera, “Nammbonyere kazi nyingi riboie kufuma kwa Aba; kwa iro, ni iao munilasiragha na magho?”

³³ Wayahudi wikamtumbulia, “Ndedikulasagha na magho kwa wundu ghwa kazi ndicha, ela ni kwa wundu ghwa masholio ghako oho mdamu kukubonya sa Mlungu.”

³⁴ Jesu ukawitumbulia, “Welee, ndeiandikilo Sharienyi konyu, ‘Ini naghambie inyo mo milungu?’

³⁵ Ikakaia orewiwangieghe milungu awo werenekeloghe malagho gha Mlungu (na maandiko ndeghidimagha kuchikanywa anduangi),

³⁶ welee, uja oreelesheroghe ni Aba, na kudumwa wurumwengunyi, inyo mwamzera, ‘Kwaawuyasholia,’ angu nighorie ‘Ini ne Mwana wa Mlungu?’

³⁷ Ngera niseribonyagha iro kazi ra Aba msakenirumiria;

³⁸ ela ikakaia naribonya, hata ngera mwalegha kunirumiria, kumangu mwarirumiria iro kazi reni, mpate kumanya angu Aba oko andenyi kwapo, na ini andenyi kwake.”

³⁹ Nao wikatima kummbwada sena, ela ukafufunuka mikonunyi kwawo.

⁴⁰ Nao Jesu ukaghenda sena kimonu cha moda ghwa Jordani, andu Johane orekoghe ukibaputiza imbiri, ukakaia aho.

⁴¹ Na wandu wengi wikamchea wikighamba, “Johane nderebonyereghe alama ingi, ela malagho ghose oreghighorieghe Johane aighu ya mundu uhu ni gha loli.”

⁴² Nao ahoeni wengi wikarumiria kwake.