JOELI 3 - Biblia Ilagho Jiboie Kwa Wandu Wose

Mlungu kuritanya mbari zima

¹ BWANA waghamba, “Ngelo iyo nichawiwunjira Juda na Jerusalemu mecha ghawo.

² Nicharikwanya mbari zima, na kusea nawo cha Vololo Etanya. Nichawitanya aho kwa wundu ghwa maza rose wiwibonyere wandu wapo. Wawisasarie wandu wa Israeli aghadi ya masanga gha kighenyi, na kujiwagha isanga japo Israeli.

³ Wakabie kura aighu ya wandu wapo, wikauza wana wa womi kwa kupata malaya, na wai kwa kupata divei winyo.

⁴ “Mwawuyakunda kunilipa kwa wundu ghwa kilambo chimu? Ikakaia ni huwo, nichamlipa kwa shwa-shwa mabonyo ghenyu gheni m'bonyere.

⁵ Mwawadie feza na dhahabu, mkwadwa mali rapo na kuringira hekalunyi renyu.

⁶ Mwawadie wandu wa Juda na Jerusalemu mkawiuza kula kwa Wagriki, na kuwiwika kula na isanga jawo.

⁷ Ela idana nichawinyavurisha wifume andu muwiuzire, nani nicham'bonyera sa iji koni muwibonyere.

⁸ Nichawiuza wana wenyu wa womi na wa waka kwa wandu wa Juda, nawo wichawiuza kula kwa wandu wa Sheba; ini BWANA naghamba.

⁹ “Ereshenyi malagho agha kwa mbari zima: ‘Kaienyi tayari kwa wuda wangenyi mang'oni ghenyu; kwanyenyi masikari ghenyu ghose mghende.

¹⁰ Chanenyi maghembe ghenyu ghiwuye chufu, na miundu yenyu iwuye mafumu; hata uo uko mnyonge ndeghambe “Ne ing'oni.”

¹¹ Shashirenyi muche inyo mbari rose ra wandu muko mbai mbai; kwanyikenyi aho vololonyi.’” Duma ijeshi jako jisee jiwikabe ee BWANA.

¹² “Suti mbari zima wikuwike tayari kusea cha Vololo Etanya. Ini BWANA nichasea kidombo aho nipate kutanya mbari rose ra wandu wimarie mbai mbai.

¹³ Awa ni wandu wizamie nandighi; wibwaghe karakara na ngano idemwagha ngelo ya makuwido; wifashe-fashe karakara na zabibu rikamwagha andenyi ya kidu chekamia zabibu hata divei ichuo na kudika-dika.”

¹⁴ Maelfu na maelfu gha wandu ghakwanyikia andenyi ya Vololo Etanya. Ituku ja BWANA jalighisa kuvika aho.

¹⁵ Iruwa na mori vasera kira, na nyerinyeri raleka kung'ala-ng'ala.

Mlungu kuwirasimia wandu wake

¹⁶ BWANA wadoka kufuma Mghondi ghwa Sioni lwaka lwake lwaruruma kufuma Jerusalemu; mawingunyi na ndoenyi kwasughusika. Ela BWANA uchawilindia wandu wake.

¹⁷ “Niko oho ee Israeli, kuchaamanya kukaia ini ne Mlungu wako; nadakaia aighu Sioni, ugho mghondi ghwapo ghwa wueli. Jerusalemu ichakaia muzi ghwapo ghwa wueli, na waghenyi ndewichaaghusima sena anduangi.

¹⁸ “Ngelo iyo, mighondi ichachulwa ni mbuwa ra mizabibu, na mighondi mitini ichachulwa ni ng'ombe ra mariwa, isanga ja Juda jose jichachulwa ni machi, dumeda dwaa machi duchakaia dukisea kufuma Hekalunyi ya BWANA, na kunyoshera Vololo ya Shitimu.

¹⁹ “Misri ichawuya ikara, na Edomu ichawuya kireti; kwa kukaia werebonyereghe lung'eto kwa wandu wa Juda, wikabwagha wandu wake wisewadie makosa.

²⁰ Ela Juda ichakailwa ni wandu kwa kala, na Jerusalemu wori ichakailwa vivalwa vose.

²¹ Nichalipa awo wibwaghilo, hata sichaawifuya wughoma. Kwa kukaia ini BWANA nadakaia Sioni.”