JEREMIA 50 - Biblia Ilagho Jiboie Kwa Wandu Wose

Kuwadwa kwa Babuloni

¹ Iji nijo ilagho ja BWANA orenighorieghe aighu ya Babuloni, na wandu waro.

² “Ghoria iro mbari kughambe, wusira kiweto kughore, hata kusesighe ilagho jingi: ‘Babuloni wameria kuwadwa Mlimu Beli ghwamerie kufushwa waya. Ugho mlungu Merodaki ghwakambwa ni chongo. Milimu yake yameria kufushwa waya, fwana rake rakambwa ni chongo.’

³ “Angu mbari imu ya wandu kufuma kaskazinyi yacha aighu ya Babuloni, nayo ichabonya isanga jake jisigho iduu. Wandu na nyamandu richafuma aho, na mndungi ndechaakaia aho anduangi.”

Kuwuya kwa Israeli

⁴ BWANA waghamba, “Matuku agho na ngelo iyo, wandu wa Israeli na wandu wa Juda, wichacha chiaimweri wikilila; nawo wichamlola BWANA Mlungu wawo.

⁵ Wichakotia chia eghende cha Sioni na mawushu ghawo ghikilangaya aho, wikighamba, ‘Choonyi diwadane na BWANA kwa ilaghano ja kala na kala jisechaaliwika jingi.’

⁶ “Wandu wapo werekoghe ng'ondi rilagharie, rilongozero kiwiwi ni walisha waro, kwa kurighalua na kurighenja aighu mighondinyi; kufuma mghondi m'baa hata mghondi mtini, hata rikaliwa maranu ghawo.

⁷ Awo wose werewiwonieghe werewibwaghieghe; na wamaiza wawo wikaghamba, ‘Isi ndediwadie ikosa, ela awo niwo wibonyere kaung'a kwa BWANA, na aho niko andu kwawo kokaia kwa loli, uo BWANA, uko isuwirio ja weke ndee.’

⁸ “Inyo wandu wa Israeli, kimbienyi mfume Babuloni! Sighenyi ijo isanga ja Wababuloni! Kaienyi wa imbiri sa fwandi ilongozagha chagha!

⁹ Zighanenyi, nicharinyavurisha iro mbari nyingi ra wandu wiche kufuma kaskazinyi kulwa na Babuloni, wichakuboisa weni kwa wuda aighu ya Babuloni, na aho wichaghuwada ugho muzi. Mawanu ghawo gheeka sa wandu mang'oni wiko na akili, wisewuyagha mikonu miduu.

¹⁰ Isanga ja Wababuloni jichawadwa, na awo wose wichaawada ugho muzi wichadwa vilambo hata wivikoje, Ini BWANA naghamba.”

Kunoneka kwa Babuloni

¹¹ BWANA waghamba, “Hata ngera mwaboilwa na kukujosa ee wandu wa Babuloni; inyo mmbwadagha na kusoka mbari ya wandu wa ifwa japo; hata ngera mwarama-rama sa tagho ya ng'ombe ifashagha ngano, na kukema sa farasi ya womi,

¹² ela ugho muzi ghonyu m'baa ghuchafushwa waya nandighi, muzi ghwa Babuloni ghuchaserwa nandighi. Ola! Ghuchawuya muzi ghwa nyuma putu ghwa iro mbari ra wandu, na kuwuya kireti chiomie chiwurie ikara.

¹³ Kwa wundu ghwa machu ghapo ini BWANA, muzi ugho ndeghuchaakailwa ni mndungi, ela ghuchasighwa mduu putu; kula mundu uchaaida kaavui nagho uchashinika na kughuzomea kwa wundu ghwa agho makabo ghake.

¹⁴ “Kupangenyi mmbeni aighu ya Babuloni inyo wandu mlwagha kwa ndana, mughurughaie ugho muzi; mughulase, hata msesighe iwanu jingi, kwa kukaia ghwabonyere kaung'a aighu yapo ini BWANA.

¹⁵ Kemenyi ngemi ya wuda mzinyi kose kwa kukaia wandu waro wamerie kukufunya, na mawurigha gha muzi ghwawo ghwamerie kuwuduka; angu icho ni kisasi chapo ini BWANA nawuyachilipa. Lipenyi kisasi aighu ya ugho muzi kunughana na mabonyo ghake ubonyere wazima.

¹⁶ Muinje muwi mbeu usewoneke Babuloni, na uo ukuwidagha kwa ngelo yaro wori usewoneke; kwa wundu ghwa ijeshi jibonyagha wuda, kula mundu uchawuya kwa wandu wake weni; kula mundu uchakimbiria isangenyi jake.”

Kuwuya kwa Israeli

¹⁷ BWANA waghamba huwu, “Wandu wa Israeli weeka sa ng'ondi ridiwagha na kuwingwa ni shimba. Imbiri werejiloghe ni mzuri wa Ashuru, na kutua Nebukadnezari mzuri wa Babuloni ukaododa maindi ghawo.

¹⁸ Kwa huwo, ini BWANA wa majeshi, Mlungu wa Israeli nichamkaba mzuri wa Babuloni na isanga jake, sa iji koni neremkabieghe mzuri wa Ashuru.

¹⁹ Nichabonya wandu wa Israeli wiwuye isangenyi jawo, nawo wichakaia wikija vindo vilimwagha aho Karmeli na Bashani; wichaghuda aighu ya mighondi ya Efraimu na Gileadi.

²⁰ Matuku agho na ngelo iyo, wandu wichalola wuwiwi andenyi ya Israeli wiisowe; wichalola kaung'a andenyi ya Israeli wighusowe; wichalola kaung'a andenyi ya Juda, nawo ndewichaaiwona, kwa kukaia nichawifuya wughoma awo nichaawisighara.”

Kutanya kwa Mlungu aighu ya Babuloni

²¹ BWANA waghamba, “Joka kukabe isanga ja Merathaimu, na wandu wikaiagha Pekodi. Bwagha, kunone putu; kubonye ghose nikulaghirie.

²² Ndoghoi ya wuda yasikirika, na kunoneka kubaa kwakaia isangenyi.

²³ Yakaia wada Babuloni iyo erekabieghe ndoenyi kose na kubara na nyondo, kughushwa andoenyi na kubarwa huwo? Yakaia wada iwuye kilambo cheshinikilwa aghadi ya iro mbari ra wandu!

²⁴ Nerekudeghieghe mdegho kukawadwa ee Babuloni, na oho ndekoremanyireghe, ela koochakua kwawadwa, angu korekoghe kukisimana na ini BWANA.

²⁵ Ini BWANA narughue nyumba yapo ya maswagha, ngafunya maswagha gha machu ghapo, kwa kukaia ini Bwana MLUNGU wa majeshi neko na kazi ebonya andenyi ya isanga ja Wababuloni.

²⁶ Choonyi kufuma chia rose mumkabe, ribarenyi nganya rake, mumfunge sa visuke va ngano mumtoteshe putu, msemsighare andu kungi.

²⁷ Bwaghenyi wandu wake wa irika wose; wiserenyi wibwagho. Ni bugha kwawo, angu ituku jawo jekabwa jameria kuvika.

²⁸ “Sikirenyi wandu weredwaloghe wunyika wikimbiagha kufuma Babuloni, wipate kueresha kulipa kisasi kwa BWANA Mlungu onyu andenyi ya Sioni, kwa wundu ghwa Hekalu yake.

²⁹ “Wizerenyi wakumbi mawanu wichelasa wandu wa Babuloni, ee, awo wose witumiagha ndana. Bonyenyi kambi mughurughaie muzi, mndungi wawo usefufunuke. Mlipenyi karakara na mabonyo ghake, mum'bonyere agho ghose karakara sa iji koni orebonyereghe, kwa kukaia wakukasire ukanimenya ini BWANA Mlungu, uo Mweli wa Israeli.

³⁰ Kwa wundu ugho wandu wake wa irika wichabwaghwa awazenyi kwake, na ituku ijo masikari ghake ghose ghichatoteshwa, ini BWANA naghamba.

³¹ “Ola nichalwa na oho ee Babuloni kukukasire, angu ituku jako jekabwa jameria kuvika.

³² Mbari yako ikukasire ichakuwa na kughwa, isepate mndungi oiwusira; nani nichaikora mizi yako, na modo ghuchaimeria hata iyo mizi imarie mbai mbai yaro.”

³³ BWANA wa majeshi waghamba huwu, “Wandu wa Israeli na wandu wa Juda wakorongelo, wandu werewidwaeghe wunyika wawiwadie na kuwimaziria, wisekunde kuwilekeria wighende.

³⁴ Mkomboli wawo oko na ndighi, irina jake ni BWANA wa majeshi. Loli ucharizighana maza rawo, upate kureda kuhora ndoenyi; ela kwa wandu wikaiagha Babuloni, uchawisowia kuhora.”

³⁵ BWANA waghamba, “Kifwa kwa Wababuloni! Kifwa kwa wandu wose wikaiagha Babuloni, na aighu ya wabaa, na wandu wake wa akili.

³⁶ Kifwa kwa walaghui, awo ni makelu! Kifwa kwa mang'oni ghake gha wuda, wakambwa ni chongo!

³⁷ Kifwa kwa farasi na magare ghake, na kwa majeshi gha kighenyi ghiko aghadi kwawo nawo wichawuya sa waka! Kunoneka kwa mashamo ghake ghose nawo wichasokwa!

³⁸ Isanga ndejiome hata jiomere machi! Kwa kukaia ni isanga ja milimu, nawo weeikunda hata ikaawikelesha.

³⁹ “Kwa huwo Babuloni ichachulwa ni nyamandu ra isakenyi, na mbisi na nyagha; ijo isanga ndejichaakailwa ni wandu sena kwa kala na kala vivalwa vose.

⁴⁰ Sa iji koni Mlungu oreitoteshereghe Sodoma na Gomora, chiaimweri na mizi yaro ya kaavui, ni huwo koni ndekuwadie mdamu ungi uchaakaia andenyi ya mizi ihi, hata omara-mara moni, ini BWANA naghamba.

⁴¹ Olenyi wandu waawuyacha kufuma kaskazinyi, mbari ya wandu iwadie ndighi, na wazuri wengi wanyavurika kufuma andu kuko kula kwa ndoenyi.

⁴² Wawadie ndana na mafumu, ni wandu wing'etere wisene wughoma; lwaka lwa kucha kwawo ni sa kururuma kwa bahari, wajoka farasi, wameria kurwa sa mundu wa wuda wichelwa na oho ee muzi ghwa Babuloni.

⁴³ “Mzuri wa Babuloni wasikire malagho gharo mikonu yake ikateweleka; ukangilwa ni luwawo, sa lwa muka ukumbagha lufu lwa kuva.

⁴⁴ “Ola nichacha shwa-shwa seji shimba ijokagha kufuma kilembenyi cha Jordani, kungia iranu ja ng'ondi jimange, na kuwibonya wikimbie kufuma mzinyi kwawo, nani nichammbika mundu mzima aighu ya ugho muzi, uo nichaamsaghua. Nani uko sa ini? Nani udimagha kunishitakia? Ni m'bonyi nguma uao udimagha kulwa nani?

⁴⁵ Kwa huwo sikira mpango ghwapo ini BWANA nighubonyere aighu ya Babuloni, na makusudi ghapo nighibonyere aighu ya isanga ja Wababuloni. Loli wana wawo watini wichadwalwa noko, na kula umu uchaoboshwa.

⁴⁶ Ndoenyi kuchasughusika ngelo esikira kuwadwa kwa Babuloni, na kililo charo chichasikirika kwa iro mbari ra wandu.”