JEREMIA 49 - Biblia Ilagho Jiboie Kwa Wandu Wose

Kutanya kwa BWANA aighu ya Amoni

¹ BWANA waghamba huwu aighu ya Waamoni, “Welee, Israeli ndewadie wana? Welee, ndena mundu wa ifwa? Kwaki wandu wetasa ghuja mlungu Moleki wingirie isanga ja Gadi, na kukaia andenyi ya mizi yaro?

² Olenyi matuku ghichacha, nani nichabonya kililo cha wandu chisikirike muzi ghwa Raba ghuko kwa Waamoni, nagho ghuchasighwa mduu, na mizi yaro mitini ichakorwa; niko aho Israeli ichawunja isanga jake, waghamba BWANA.

³ Lilenyi ee wandu wa Heshboni, angu muzi ghwa Ai ghwasighwa mduu; ronyi nguwo ra magunia kwa wasi mkeme, ee wai wa Raba, lilenyi mkimbie na imbiri na nanyuma awurighenyi; kwa kukaia mlungu ghonyu Moleki ghuchabarishwa chiaimweri na wakohani na wabaa.

⁴ Kwaki mkukasagha na vololo renyu inyo wandu mseko waloli, mwawuyakusaghika na mali renyu mkighamba, ‘Nani udimagha kulwa nesi?’

⁵ Ola nichareda kiture aighu yenyu chichaafuma kwa awo wimmarie chia rose, nenyo mchawingwa; na kula umu onyu uchakimbia kukukira, hata ndekuchaakaia na mndungi owitumbanya wakimbii.

⁶ Ela konyuma, nichawiwunjira Waamoni mecha ghawo, Ini BWANA naghamba.”

Kutanya kwa BWANA aighu ya Edomu

⁷ BWANA wa majeshi waghamba huwu aighu ya Edomu, “Welee, ndeiko hikima andenyi ya wandu wa Temani? Welee, njama ya wandu wa suku eesia? Hikima yawo eesia?

⁸ Inyo wandu wa Dedani, ghalukenyi mkimbie mkuvise ndenyi; angu nichareda wuwiwi aighu ya kivalwa cha Esau; ngelo yavika niwikabe.

⁹ Welee, wandu wikacha kwako kuwaya zabibu ndewichaasigha rimu? Na vitoi-e; wikacha nakio ndawadaiwa putu ra kuwikata?

¹⁰ Ela Esau neemsigha mduu, ngafunukua hata na andu kwake kokuvisa, usechaadima sena kukuvisa. Wana wake watoteshero chiaimweri na waruna, na wambao, hata ndeuko sena.

¹¹ Sigha wana wako wisewadie weke ndee, nichawiwika wikaie moyo; na waka wakiwa wako wisuwirie kwapo.”

¹² “Ikakaia awo wiserekoghe wenywa icho kikombe cha makabo, suti wichinyo, welee, kuchaghenda kusepatire ikabo? Ndekuchaaghenda kusepatire ikabo, ela suti kunyo icho kikombe.

¹³ Angu nabonyere ighemi kwa ini moni, kukaia muzi ghwa Bozra ghuchashinikilwa, na kusekwa; ghuchasighwa mduu, ghuwasirilo njowe; na mizi yake ichasighwa miduu matuku ghose.”

¹⁴ Nasikire malagho kufuma kwa BWANA; mdumwa wadumwa kwa iro mbari uwizere, “Kwanyikenyi chiaimweri mmbose, mpate kulwa na Edomu; wukenyi mngie wudenyi.”

¹⁵ Angu zighana BWANA uchakubonya kukaie mtini aghadi ya iro mbari, kumenyero aghadi yawo.

¹⁶ Kuobosha kwako na lukaso lwa ngolo yako lwamerie kukukalia, ee, oho kukaiagha mbangenyi ra magho, na aighu ya mghondi. Hata ngera kwabonyere kijungu chako ighu sa cha indu, BWANA uchakusera andonyi.

¹⁷ BWANA waghamba, “Edomu uchashinikilwa; kula mundu uchaaida aho uchashinika, na kuzoma kwa wundu ghwa mashaka ghake.

¹⁸ Angu iji Sodoma na Gomora chiaimweri na mizi iko mbai mbai eretotesheroghe, ndekuwadie mndungi uchaakaia aho angu kuidiria aho.

¹⁹ Olenyi sa iji shimba ichagha iranunyi ja ng'ondi jimange, kufuma kwa icho kilemba cha Moda ghwa Jordani, niko koni nichaawibonya Waedomu wikimbie shwa-shwa kufuma isangenyi kwawo; nani nichamsaghua mundu mzima ojibonyera nguma uo ose nichaamkunda. Nani uko sa ini, nani udimagha kunishitakia? Ni m'bonyi nguma uao udimagha kusimana nani?

²⁰ Kwa huwo, sikira mpango nighubonyere ini BWANA aighu ya wandu wa Edomu, na makusudi ghapo aighu ya awo wandu wikaiagha muzi ghwa Temani. Hata wana wawo watini wichakurudulwa noko, na wandu nawo wichaobua.

²¹ Lwaka lwa kughwa kwawo luchasughusa ndoe; kukema kwawo kuchasikirika Bahari ya Shamu.

²² Olenyi mbari imu ichajoka shwa iangue sa indu, na kughorua mawawa ghake aighu ya Bozra, ipate kuikaba; na ngolo ra mang'oni gha Edomu ituku ijo, richatika-tika sa muka ukumbagha lufu kwa kuva.”

Kutanya kwa BWANA aighu ya Dameshki

²³ BWANA waghamba huwu aighu ya Dameshki, “Wandu wa mizi ya Hamathi na Arpadi wakambwa ni chongo, angu wasikira malagho ghizamie. Wakaia na wowa m'baa na kujawasi sa mivo-mivo ya bahari isedimagha kunyama.

²⁴ Wandu wa Dameshki wakaia wanyonge, waghaluka na kukimbia, wawadwa ni kiwogho-wogho, kuwawa na wasi kwawichea sa kwa muka ukumbagha lufu kwa kuva.

²⁵ Muzi ghumanyikie ghuchulo ni maboilo ghwasighwa-sighwa wada!

²⁶ Wandu waro wa irika wichabwaghwa a wazenyi kwawo, na ituku ijo masikari gharo ghichatoteshwa.

²⁷ Nichakora mawurigha gha Dameshki, na modo ghwaro ghuchakora na kumeria ngome rose ra Mzuri Ben-hadadi, ini BWANA wa majeshi naghamba.”

Kutanya aighu ya mbari ya Kedari na muzi ghwa Hazori

²⁸ BWANA waghamba huwu aighu ya mbari ya Kedari na mawuzuri gha Hazori, agho gheresimiloghe ni Mzuri Nebukadnezari. “Wuka kukabe Kedari, kuwitoteshe awo wandu wa mashariki.

²⁹ Wada hema rawo na mfugho rawo, pazia rawo na vilambo vawo vose; mdo ngamila rawo noko, muwizere wandu,

³⁰ Ee wandu wa Hazori, kimbienyi mghende kula mkuvise ndenyi; kwa kukaia Nebukadnezari mzuri wa Babuloni wabonyere mpango na makusudi ghelwa nenyo.

³¹ “Wukenyi mkabe iyo mbari yawuyakuhoresha na kukurumiria cheni; iyo isewadie mbenge hata mirigho ingi, iyo ikaiagha iekeri.

³² Donyi ngamila rawo wunyika, na mfugho rawo wori. Nichawisaghisa awo wiaragha virodi, nani nichawiredia wasi andu kwawo kose.

³³ Hazori uchawuya kireti cha mizozo, na kusighwa nduu kwa kala na kala; mndungi ndechaakaia aho, hata mndungi omara-mara ndechaakaia aho anduangi.”

Kutanya kwa BWANA aighu ya Elamu

³⁴ BWANA oreghorieghe nani aighu ya Elamu, iji Zedekia orezoyagha kubonya nguma.

³⁵ BWANA Mlungu wa majeshi ukaghamba huwu, “Olenyi nichawibwagha wandu wa Elamu wose wilwagha na ndana wikusaghikagha nawo;

³⁶ nani nichawetesha mbeo aighu ya Elamu kufuma mbembe rose inya ra mlungunyi. Nichawisasara andu kose, na kula mbari ichavikilwa ni wandu wa Elamu.

³⁷ Nichawingira wandu wa Elamu wowa imbiri ya wamaiza wawo, na imbiri ya awo wilolagha kuwibwagha, nichareda mawiwi aighu kwawo kwa machu ghapo ghibirie. Nichawidumia wandu wibwagho wudenyi, hata niwimerie wose.

³⁸ Nichamtotesha mzuri wawo na wabaa wawo, nani nichawibonyera nguma wandu wa Elamu.

³⁹ Ela konyuma, nichawiwunjira wandu wa Elamu mecha ghawo, Ini BWANA naghamba.”