JEREMIA 48 - Biblia Ilagho Jiboie Kwa Wandu Wose

Kunoneka kwa Moabu

¹ BWANA wa majeshi, uo Mlungu wa Israeli waghamba huwu aighu ya Moabu, “Ni bugha kwa wandu wa Nebo, kwa kukaia muzi ghwawo ghwasighwa mduu. Kiriathaimu yasimwa na kuwadwa, iro ngome rawadwa rikachikanywa, na wandu wawo wafushwa waya.

² Wubaa ghwa Moabu ghwasia. Wabonyere mpango ghwa wuwiwi aighu ya Heshboni wikighamba, ‘Choonyi dimuinje putu usekaie mbari na inyo ee wandu wa muzi ghwa Madmena mchanyamirishwa, mchawingwa ni majeshi.’

³ “Sikirenyi kililo chifumagha Horonaimu, ‘Wuduu na kunoneka kubaa!’

⁴ Moabu yanonwa, na kililo cha wanake chasikirika.

⁵ Waawuyajoka wikilila a mshoromotonyi ghwa Luhithi; kililo chasikirika kwa wundu ghwa kunoneka, wikisea a mshoromotonyi ghwa Horonaimu.

⁶ Waghamba, ‘Kimbienyi mkukire mmbeni! Kimbienyi sa furo kireti.’

⁷ Moabu, korekoghe na irumirio na ngome rako na mali rako, ela oho wori kuchadwalwa; na mlungu ghwako Kemoshi wori ghuchadwalwa wubarishonyi; ghuchadwalwa chiaimweri na wakohani wake na wabaa wake.

⁸ Uo mnoni uchacha kulwa na kula muzi, hata muzi ghungi ndeghuchaafufunuka, andu kwa vololo kuchatota, na andu kwa wurindi kuchanonwa; sa iji koni ini BWANA nighorie.

⁹ “Mnekenyi Moabu mawawa, upate kuburuka noko, mizi yake ichasighwa miduu isekailwagha ni mndungi.

¹⁰ “Ndewado ni njowe uo ubonyagha kazi ya BWANA kwa wughadi, ndewado ni njowe uo usebwaghagha kwa lufu lwake.”

Kunoneka kwa mizi ya Moabu

¹¹ BWANA waghamba, “Moabu orekoghe na raha kufuma wanake ghwake, utumbanyikie sa divei, jingi iseghalusiro kudungirilwa chombo kizima, hata jingi ndedwalo wunyika; kwa huwo wadadua na luwala, na irumba jake ndejighalukie.

¹² “Zighanenyi matuku ghichacha, nani nichamdumia wandu wemuungua sa divei; wichaangamira na kubara-bara mitungi yake.

¹³ Niko aho Moabu uchafushwa waya ni mlungu ghwake Kemoshi, seji wandu wa Israeli werefushiroghe waya ni Betheli ugho mlungu wereghurumirieghe.

¹⁴ “Mghamba wada inyo wandu wa Moabu wei ‘Moko mang'oni, wandu wiwadie ndighi wa wuda?’

¹⁵ Moabu chiaimweri na mizi yake wameria kuchelwa ni Mnoni; wandu wake wa irika orewisaghueghe wasea kubwaghonyi, ini Mzuri, niwangwagha BWANA wa majeshi naghamba.

¹⁶ Moabu walighisa kuchelwa ni wasi, na matiriro ghake ghaawuyacha shwa wori.

¹⁷ Inyo mmbose muko mbai mbai yake mlilienyi, na inyo mmbose muichi sare yake ghambenyi, ‘Mzata ghwa nguma na kudima ghwachika-chika wada, ugho mzata ghwa wubaa!’

¹⁸ “Seenyi kufuma kwa wubaa ghonyu ee wandu mkaiagha Diboni; msee kidombo andoenyi terinyi! Kwa kukaia mnoni wa Moabu wameria kucha aighu yenyu, nao wameria kurichikanya ngome renyu.

¹⁹ Kaienyi kimusi chienyi mzighanire, ee wandu mkaiagha Aroeri! Mumkotie uo ukimbiagha na uo ufufunukagha mghambe, ‘Ni ilaghoki jakaia?’

²⁰ Wichatumbulia, ‘Moabu wafushwa waya angu wameria kughwa, lilenyi na kukema mchungu. Ghorenyi kaavui na Moda ghwa Arnoni kukaia, Moabu wameria kunonwa.’

²¹ “Kutanywa kwameria kucha aighu ya isanga ja wurindi; kwacha aighu ya Holoni, na Jasa, na Mefaathi,

²² na Diboni, na Nebo, na Beth-diblathaimu,

²³ na Kiriathaimu, na Beth-gamueli, na Beth-meoni,

²⁴ na Keriothi, na Bosra, na mizi yose ya isanga ja Moabu, kula na kaavui.

²⁵ Moabu wadumbulwa lwembe, na mkonu ghwake ghwachikwanywa, ini BWANA naghamba.

Kuserwa kwa Moabu

²⁶ “Mmbongerenyi Moabu angu orekujosereghe moni aighu yapo ini BWANA, upate kughala-ghala aighu ya madaika ghake; na kusekwa.

²⁷ Welee ndemoremsekieghe Israeli? Huwo modemmbona aghadi ya vitoi iji moremdedagha mkisughusa vongo venyu?

²⁸ “Sighenyi iyo mizi, mwendekaia mbangenyi ee wandu wa Moabu; mkaie sa mbughi iaghagha kijungi chake a lukororonyi.

²⁹ Dasikire lukaso lwa Moabu, wakukasire nandighi; kukuduka kwake na lukaso lwake, na lung'eto lwake; na uko kukujosa kwa ngolo yake.

³⁰ Ini BWANA naichi kukuduka kwake, kukukasa kwake ni kwa duu; ndedimagha kubonya ilagho jingi.

³¹ Kwa huwo naawuyalilia Moabu; naawuyawililia wandu wa Moabu wose, na wandu wa Kir-heresi.

³² Niakulilia oho ee mzabibu ghwa Sibma, kuchumba mzabibu ghwa Jazeri; Mbashu rako raidie aighu ya bahari, na kuvika kula hata Jazeri; uo mnoni wacha aighu ya matunda ghako gha sumesu na makuwido ghako gha zabibu.

³³ Maseko na maboilo ghamerie kuinjwa noko, kufuma kwa isanga ja mavalo ja Moabu, nabonyere divei ikasoweka kukamwa vidunyi, ndekuwadie mndungi wawuyakama zabibu kwa kuboilwa, chwaka rawuyasikirika si ra maboilo anduangi.

³⁴ “Wandu wa Heshboni na Eleale waawuyalila, na chwaka rawo rasikirika hata Jahazi; wiakema kufuma Soari hata Horonaimu na Eglathi-shelishia. Kwa kukaia hata machi gha Nimrimu ghameria kuoma.

³⁵ Nichamuinja mundu ofunya vizongona aho Moabu; uo ose ufunyagha vizongona mighondinyi andu kotasira, kuifukiria milungu yake marumba.

³⁶ “Kwa huwo ngolo yapo yawuyalilia Moabu sa kukaba msherembe, na ngolo yapo ialila karakara na msherembe kwa wundu ghwa wandu wa Kir-heresi, kwa kukaia mali rose wishamie ratota.

³⁷ Wandu wose weeara vongo vawo, na kudumbua sombe rawo; mikonu yawo eechughwa-chughwa, na kula umu wawo waawuyarwa nguwo ya igunia.

³⁸ Aighu ya nyumba rose ra Moabu na viwachenyi varo ni kililo kiduu, angu namerie kum'bara Moabu sa chombo chisetalwagha ni mndungi.

³⁹ Ai ee Moabu kabarika! Si kulila ulilie! Moabu wafwa waya nao ukaghaluka noko! Nao huwo Moabu waawuya kilambo chesekwa, na cheshinikilwa ni wose wimmarie chia rose.”

Moabu kulemwa ni kufufunuka

⁴⁰ BWANA waghamba huwu: “Olenyi mbari ichacha shwa iangue sa indu, ikighorua mawawa ghake aighu ya Moabu;

⁴¹ mizi ichawuswa, na ngome richawadwa. Ngolo ra mang'oni gha Moabu ituku ijo richawuya sa ngolo ya muka ukumbagha lufu lova.

⁴² Moabu ichanonwa isekaie na wandu sena; angu ikujosere cheni aighu yapo ini BWANA.

⁴³ Kiture, na kina, na mdegho vaawuyammbeseria inyo wandu mkaiagha Moabu.

⁴⁴ Uo uchaakimbia kiture uchachunukia kinenyi; na uo ujokagha kufuma kinenyi uchawadwa ni mdegho. Kwa kukaia nichareda maza iri aighu ya Moabu, andenyi ya mwaka ghwawo ghokabwa, ini BWANA naghamba.

⁴⁵ “Wandu waro wakimbiria Heshboni wikilola wulindiri, wasilwa na ndighi; ela modo ghwakorie Heshboni, ugho muzi ghwa Sihoni, ghukafuma na kukora mido ya mighondi ya mang'oni gha wuda gha wandu wa Moabu.

⁴⁶ Ni bugha kwako ee Moabu, wandu wa Kemoshi wameria kunonwa, kwa kukaia wana wako wa womi na wa waka wamerie kudwalwa wunyika.

⁴⁷ Ela kutuonyi nichammbunjira Moabu mecha ghake, ini BWANA naghamba.” Uko niko kutanywa kwa Moabu.