JEREMIA 44 - Biblia Ilagho Jiboie Kwa Wandu Wose

Ilagho ja BWANA kwa Waisraeli wiko Misri

¹ BWANA oreghorieghe nani aighu ya Wayahudi wose werekoghe wikikaia andenyi ya isanga ja Misri, aho Migdoli, na Tahpanesi, na Memfisi na andenyi ya isanga ja Misri ya Lughu.

² “BWANA wa majeshi, Mlungu wa Israeli ukaghamba mwamerie kuwona wuwiwi ghose nereghuredieghe aighu ya Jerusalemu, na aighu ya mizi yose ya Juda. Zighanenyi idime eeka miduu isewadie mndungi wawuyakaia aho,

³ kwa wundu ghwa wuwiwi wereghubonyereghe na kuwusira machu ghapo, iji wereghendieghe kufukiria milungu mizima marumba na kuitasa; iyo, awo weni angu inyo, hata weke ndeyo wisereimanyireghe anduangi.

⁴ Nani nerewidumieghe wadumiki wapo walodi wose konyu sena na sena ngighamba, ‘Msebonye ughu wuwiwi niseghukunde.’

⁵ Ela ndemorenisikireghe hata kunideghia madu ghenyu, mpate kusigha wuwiwi ghonyu, na kuleka kufukiria milungu mizima marumba.

⁶ Kwa huwo nerejokeloghe ni machu ghapo na kubia kwapo aighu ya mizi ya Juda, na chienyi ra Jerusalemu, nayo ikasighwa miduu seji iwonekagha idime.

⁷ “Na idana Ini BWANA wa majeshi, Mlungu wa Israeli nakotia kwaki mkubonyeragha mmbeni wuwiwi ghung'ane huwu ghowimeria womi na waka, wanake na awo wiongagha andenyi ya Juda, hata msowe masighariko ghangi gha wandu?

⁸ Kwaki mughiwusiragha machu ghapo kwa kazi ra mikonu yenyu, na kuifukiria marumba milungu mizima ya Misri, andu mchee mpate kukaia, eri mkumerie mmbeni hata mmbuye wandu wewadwa ni njowe na wesholelwa aghadi ya mbari rose ra ndoenyi?

⁹ Welee, mooliwa agho mawiwi gha weke ndeyo, na mawiwi gha wazuri wa Juda na waka wawo; na wuwiwi ghonyu inyo mmbeni na waka wenyu, ugho wereghubonyereghe andenyi ya isanga ja Juda, na chienyi ra Jerusalemu?

¹⁰ Ndewikuserie weni hata idime iji; hata ndewiniobue na kughenda kwa sharia rapo na kughiwadia malaghiro ghapo nighiwikie imbiri konyu na imbiri ya weke ndeyo.

¹¹ “Kwa huwo, Ini BWANA wa majeshi, Mlungu wa Israeli nichaghaluka na kum'bonya kiwiwi, na kuwitotesha wandu wa Juda putu.

¹² Awo wandu wa Juda wisigharikie, nao wikakufunya kucha cha Misri wipate kukaia aha, nichawibonya witotesho wose ahaeni isangenyi ja Misri. Wichafwa wudenyi, na kwa njala, kufuma mtini wawo hata m'baa wawo; nawo wichawoneka sa kilambo cha kisha, cheshinikilwa, chiwasirilo njowe, na chesholelwa.

¹³ Nichawikaba awo wikaiagha isanga ja Misri, sa iji koni nerewikabieghe awo werekoghe Jerusalemu, kwa wuda na kwa njala, na kwa saka izamie;

¹⁴ eri mndungi usigharikie wa Juda, awo wichee kukaia isanga ja Misri usefufunuke, angu kukia, angu kuwuya cha isanga ja Juda, ijo wawuyakaia na bea ewuya wiendejikaia; kwa kukaia ndewichaawuya, ela awo wakimbii watini tu niwo wichaawuya.”

¹⁵ Niko awo womi weremanyireghe kukaia waka wawo werefukirieghe marumba kwa milungu mizima, na awo waka wose werekoghe kimusi aho, izungu ibaa ja wandu, awo wandu wose werekaiagha Misri ya Lughu wikamtumbulia,

¹⁶ “Ndedichaakusikira kwa agho malagho kwadighoria kwa irina ja BWANA;

¹⁷ ela isi dichabonya agho malagho dereghibonyerieghe ighemi; kumfukiria marumba Malkia wa Mlungunyi, nesi dichamdungia vizongona vedu venywa, sa iji koni dibonyagha na sa iji koni weke aba werebonyagha, chiaimweri na wazuri wedu na wabaa wedu, andenyi ya mizi ya Juda na chia ra Jerusalemu; na aho derekoghe na vindo vingi na kuwona nicha, hata ndederewonieghe wuwiwi ghungi anduangi.

¹⁸ Ela kufuma dasigha kufukiria marumba uja Malkia wa Mlungunyi, na kumdungia vizongona venywa, deesowekelwa ni kula kilambo, sena dikamerelwa ni wuda na njala.”

¹⁹ Nao waka wikaghamba, “Welee, iji deremfukiriagha Malkia wa Mlungunyi marumba, na kumdungia vizongona venywa, huwo womi wedu ndewererumirianeghe nesi, iji derekoghe dikim'bonyera mikate iko na fwana yake na kumdungia vizongona venywa?”

²⁰ Niko ngawitumbulia wandu wose womi na waka, wandu wose awo werekoghe wikimtumbulia:

²¹ “Welee, BWANA nderekumbukieghe na kuririkanya aighu ya marumba moreghifukirieghe andenyi ya mizi ya Juda na chia ra Jerusalemu, inyo mmbose na weke ndeyo, wazuri wenyu, na wabaa wenyu na wandu wose wa isangenyi? Welee, agho ndegheremchieghe BWANA akilinyi kwake?

²² BWANA ndedimie kurumaghia wuwiwi na wuchafu ghonyu moregubonyereghe. Kwa wundu ugho, isanga jenyu jeesighwa iduu jisewadie wandu, jiwadilo ni njowe sa iji jiko idime.

²³ Ni kwa wundu ghwa inyo kuifukiria milungu mizima marumba, na kum'bonyera BWANA kaung'a mselusikiragha lwaka lwake kwa kughenda kwa sharia rake, memu yake na mashuhudio ghake, niko ughu wuwiwi ghose ghumerie kumchea sa iji koni mughuwonagha idime.”

²⁴ Ngawizera wandu wose wa Juda womi na waka, wikaiagha isanga ja Misri wisikire ilagho ja BWANA.

²⁵ BWANA wa majeshi, uo Mlungu wa Israeli waghamba huwu, “Inyo na waka wenyu mwamerie kughora worinyi kwa memu yenyu na kukatisha kwa mabonyo ghenyu, mkighamba mchakatisha maghemi ghenyu agho maghemi ghenyu moreghibonyereghe ghemfukira marumba Malkia wa Mlungunyi na kumdungia vizongona venyu venywa. Idana bonyenyi na kukatisha maghemi ghenyu.

²⁶ Kwa huwo sikirenyi seji ini BWANA nighambagha konyu inyo mmbose wandu wa Juda mkaiagha isanga ja Misri: Olenyi naghemie kwa irina japo ibaa, kukaia, irina japo ndejichaatumilwa sena ni mndungi wa Juda aha Misri ukighamba, ‘Naghema kwa BWANA ukaiagha moyo.’

²⁷ Olenyi naawuyamzighanira woruwu, si kwa kum'bonyera mecha ela kiwiwi; inyo mmbose wandu wa Juda mkaiagha isanga ja Misri mchabwaghwa wudenyi, na kwa njala hata mwasia putu.

²⁸ Na awo wichaafufunuka kubwaghwa wudenyi, wichafuma isanga ja Misri na kuwuya cha isanga ja Juda, watinieri, na masighariko ghose gha wandu wa Juda wereghendieghe cha isanga ja Misri wichamanya ni ilagho jani jiko ja loli, ngera ni japo angu ngera ni jawo.

²⁹ Ihi niyo ichaakaia alama emmbonyera, kukaia, nichamkaba andenyi ya iji isanga, eri mpate kumanya angu ilagho japo jichakatia aighu yenyu kwa wundu ghwa wuwiwi mughubonyere.

³⁰ Olenyi nichamfunya Mzuri Hofra mzuri wa Misri, na kumngira mikonunyi kwa wamaiza wake, na mikonunyi kwa awo wikunde kum'bwagha; kara kara seji neremngirieghe Zedekia mzuri wa Juda mikonunyi kwa Nebukadnezari mzuri wa Babuloni, uo orekoghe m'maiza wake orekundeghe kum'bwagha.”