JEREMIA 42 - Biblia Ilagho Jiboie Kwa Wandu Wose

Wandu kulomba Jeremia uwilombie

¹ Niko wabaa wose wa majeshi, na Johanani mwana wa Karea, na Azaria mwana wa Hoshaia, na wandu wose kufuma mtini hata m'baa wikasoghoda kaavui

² wikanizera, “Dakulomba kudibonyere seji dikuzeragha, nao kumlombe BWANA Mlungu wako kwa wundu ghodu, ee kwa wundu ghwa agha masighariko ghose gha wandu (kwa kukaia isi derekoghe wengi deechasigharika watinieri seji kudiwonagha);

³ eri BWANA Mlungu wako upate kudiwonyera chia ifwanagha diinughe, na agho ghidifwanagha kubonya.”

⁴ Nani ngawizera, “Namsikira; olenyi nichamlomba BWANA Mlungu onyu sa iji koni mwanilomba, na agho ghose BWANA uchaanitumbulia, nichamghoria; sichaamvisa ilagho jingi anduangi.”

⁵ Nao wikanizera, “BWANA ndekaie mshahidi wa loli na wa hachi aighu yedu, iji dalemwa ni kubonya malagho agho ghose BWANA Mlungu wako uchaakuduma kodu.

⁶ Dichalusikira lwaka lwa BWANA, uo dakuduma kwake ikaiagha ni kwa mawiwi angu kwa mecha, dipate mecha iji damsikira BWANA Mlungu odu.”

Matumbulio gha BWANA kwa malombi gha Jeremia

⁷ Nyuma ya matuku ikumi, BWANA ukaghora nani.

⁸ Niko ngammbanga Johanani mwana wa Karea na wabaa wose wa majeshi werekwanyeghe, na wandu wose kufuma mtini wawo hata m'baa wawo,

⁹ ngawizera, “BWANA, uo Mlungu wa Israeli, uo morenidumieghe nighenje malombi ghenyu kwake waghamba huwu,

¹⁰ ‘Iji mwakaia andenyi ya iji isanga, niko nichammangisha hata sichaamvuchua anduangi. Nichammbika aeni hata sichaamuinja anduangi; kwa kukaia nawawa ni agho mawiwi nim'bonyere.

¹¹ Msakemuobua uo mzuri wa Babuloni, uo mwawuyamuobua; msemuobuo, angu ini neko andwamweri na inyo, nipate kumkira na kumvuvua kufuma mikonunyi kwake.

¹² Nichammbonia inyo wughoma eri upate kummbonia wughoma, na kumsigha mkaie andenyi ya isanga jenyu jeni.’

¹³ “Ela mkaghamba, ‘Isi ndedichaakaia andenyi ya iji isanga’, nao mleghe kumsikira BWANA Mlungu onyu

¹⁴ kwa kughamba, ‘Hata! Isi dichaghenda cha isanga ja Misri, andu disechaawona wuda, angu kusikira lwaka lwa tarumbeta, angu kusowa vindo; nesi dichakaia aho,’

¹⁵ sikirenyi seji BWANA wa majeshi, uo Mlungu wa Israeli waghora huwu inyo masighariko gha Juda, ‘Mkafunga ndighi kughenda cha Misri mwendekaia aho,

¹⁶ niko aho ugho wuda mwawuyaghuobua ghuchaamchea ahoeni isanga ja Misri, na iyo njala mwawuyaiobua ichamchea kwa wungi ahoeni Misri, nenyo mchafuya aho.

¹⁷ Wandu wose wichaakufunya kwendakaia Misri, wichabwaghwa wudenyi, na kwa njala, na kwa saka izamie; ndekuchaakaia na masighariko ghangi angu mndungi okaia moyo kufumanya na ugho wuwiwi nichaawiredia.’

¹⁸ “BWANA wa majeshi, uo Mlungu wa Israeli waghamba huwu: ‘Sa iji koni machu ghapo na kubia kwapo korediriloghe aighu ya wandu werekoghe Jerusalemu, niko koni na machu ghapo ghichaadilwa konyu iji mwaghenda cha Misri. Mchawuya sa vilambo va kisha, wandu weshinikilwa, wandu wa njowe, na wandu wesekwa. Ndemchaajiwona iji isanga sena.’

¹⁹ “BWANA wamzera huwu ee masighariko gha Juda, ‘Mseghende Misri.’ Manyenyi kukaia namghoria idime iji

²⁰ kukaia, mwakulaghashire nenyo mchakubwagha mmbeni. Morenidumieghe kwa BWANA Mlungu onyu, mkighamba, ‘Dilombie kwa BWANA Mlungu odu, na ijo jose kuchaazerwa ni BWANA Mlungu odu, nijo jeni dichaabonya.’

²¹ Nani namghoria idime, ela ndemumsikire BWANA Mlungu onyu kwa jingi ja agho unidumie nimghorie.

²² Kwa huwo manyenyi loli angu mchabwaghwa wudenyi, na kwa njala, na kwa saka izamie, andenyi ya ijo isanga mwawuyakaia na bea eghendajikaia.”