JEREMIA 39 - Biblia Ilagho Jiboie Kwa Wandu Wose

Kuwadwa kwa Jerusalemu

¹ Mwaka ghwa ikenda, mori ghwa ikumi ghwa kubonya nguma kwake Zedekia mzuri wa Juda, Nebukadnezari mzuri wa Babuloni ukacha na majeshi ghake ghose, na kughurughaia muzi ghwa Jerusalemu.

² Ituku ja ikenda ja mori ghwa kana, mwaka ghwa ikumi na imweri ghwa kubonya nguma kwa Zedekia, wurigha ghwa muzi ghorechikanyiroghe.

³ Jerusalemu iendawadwa, wabaa wose wa mzuri wa Babuloni wikacha na kusea kidombo andenyi ya Mbenge ya Ghadi na ghadi, chiaimweri na Nergali-shareza, Samgari-nebo, Sarsekimu na Nargali-shareza umu, na wabaa wazima wose wa mzuri wa Babuloni.

⁴ Nao iji Mzuri Zedekia na masikari ghake wawiwona, wikakimbia na kufuma mzinyi nakio, wikamaria chia ya mbuwa ya mzuri, wikaidiria mbengenyi iko aghadi ya mawurigha awi, wikaghenda kulangaya Araba.

⁵ Ela ijeshi ja Wababuloni jikawinugha, wikammbwada Zedekia aho wurindinyi ghwa Jeriko, nawo wikamreda kwa Nebukadnezari mzuri wa Babuloni aho Ribla isanga ja Hamathi. Nebukadnezari ukamtanya aho.

⁶ Ukawibwagha wana wa Zedekia aho Ribla, Zedekia ukizighanira; wokoni ukawibwagha wabaa wose wa Juda.

⁷ Ukaghifunya meso gha Zedekia, ukamfunga na pingu na kumdwa cha Babuloni.

⁸ Wababuloni wikaikora ngome ya mzuri, na nyumba ra wandu; wikaghuchikanya wurigha ghwa Jerusalemu.

⁹ Niko Nebuzaradani, uo m'baa wa majeshi, ukawidwa wunyika cha Babuloni awo wandu weresigharikieghe mzinyi; awo werekimbirieghe cha kwake na awo weresigharikieghe.

¹⁰ Ukawisigha awo werekoghe wakiwa wikaie ahoeni isangenyi ja Juda, awo wiserekoghe na kindo chingi; ukawineka mbuwa ra mizabibu na mbuwa iyo ngelo cheni.

Kufungulwa kwa Jeremia

¹¹ Nebukadnezari mzuri wa Babuloni ukafunya momu aighu yapo kwa kumlaghira Nebuzaradani uo m'baa wa majeshi ukighamba,

¹² “Wada Jeremia kumlindie nicha, kusem'bonye ilagho jingi, ela kum'bonyere seji ukuzeragha.”

¹³ Niko Nebuzaradani, uo m'baa wa majeshi, chiaimweri na wabaa Nebushazibani na Nergali-shareza, na wabaa wose wa mzuri wa Babuloni,

¹⁴ wikaduma na kunireda kufuma waza ya walindiri; wikaniwika mikonunyi kwa Gedalia mwana wa Ahikamu, wawae Shafani, eri upate kunighalisha. Kwa huwo ini Jeremia ngakaia aghadi ya wandu.

Isuwirio kwa wundu ghwa Ebedi-meleki

¹⁵ BWANA ukaghora nani niko kifungonyi wazenyi ya walindiri, ukighamba,

¹⁶ “Ghenda kumzere Ebedi-meleki Muethiopia huwu, ‘Ini BWANA wa majeshi, Mlungu wa Israeli naghamba nichakatisha malagho ghapo nereghighorieghe aighu ya ughu muzi; kwa kughubonya kiwiwi hata si kughubonyera nicha anduangi, nagho ghichakatia ituku ijo imbiri yako.

¹⁷ Ela oho nichakukira, hata ndekuchaangirwa mikonunyi kwa awo wandu kwawuyawiobua anduangi.

¹⁸ Angu kwa loli nichakulindia hata ndekuchaabwaghwa wudenyi, ela irangi jako jichakaia banana, angu korenirumirieghe. Ini BWANA naghamba.’”