JEREMIA 36 - Biblia Ilagho Jiboie Kwa Wandu Wose

Baruku kushoma chuo andenyi ya Hekalu

¹ Mwaka ghwa kana ghwa kubonya nguma kwake Jehoiakimu mwana wa Josia mzuri wa Juda, BWANA oreghorieghe nani ukighamba,

² “Wada chuo, kuandike andenyi yaro malagho ghose nikulaghirie aighu ya Israeli na Juda, na mbari rose ra wandu, kufuma ituku jija nighorie na oho matuku gha Josia, hata linu.

³ Kewada wandu wa Juda wichasikira agho mawiwi ghose nighambie nichawibonyera, na kewada wadima kughaluka kula umu wawo wihee, nani nipate kuwifuya wughoma wuwiwi ghwawo na kaung'a yawo.”

⁴ Niko ngammbanga Baruku mwana wa Neria, na Baruku ukaandika andenyi ya chuo malagho ghose nimghorie, agho nereghoreloghe ni BWANA.

⁵ Ngamlaghira Baruku ngighamba, “Ini namerie kughirilwa nisengie andenyi ya Hekalu ya BWANA;

⁶ kwa huwo oho kughende na kuwishomie wandu wose wikisikira, agho malagho nakughoria kukaghiandika, ingelo wiko andenyi ya Hekalu, ituku ja kufunga tumu. Wokoni kuwishomie wandu wose wa Juda wifumagha mizinyi kwawo wisikire.

⁷ Kewada wadima kulomba na kuvoya imbiri ya BWANA, na kewada kula umu wawo uchaghaluka na kusigha mighendo yake izamie; kwa kukaia machu na lubio BWANA ughorie aighu ya awa wandu ni lubaa.”

⁸ Niko Baruku mwana wa Neria ukabonya wokoni sa iji neremlaghirieghe kushoma malagho ghose gha BWANA ghiko chuonyi, ukaghishoma andenyi ya Hekalu ya BWANA.

⁹ Mwaka ghwa kasanu mori ghwa ikenda ghwa kubonya nguma kwake Jehoiakimu mwana wa Josia mzuri wa Juda, wandu wose wiko Jerusalemu, na wandu wose wichee Jerusalemu kufuma mizi ya Juda, wikaeresha kufunga tumu imbiri ya BWANA.

¹⁰ Niko Baruku ukaghishoma agho malagho neremghorieghe kufuma chuonyi uko andenyi ya Hekalu, wandu wose wikisikira, ukaghishoma uko andenyi ya chumba cha muandiki Gemaria, mwana wa Shafani cherekoghe waza ya ighu, aho andu kongiria Mbenge Mbishi ya Hekalu ya BWANA.

Chuo kushomwa kwa wabaa

¹¹ Mikaia mwana wa Gemaria, wawae Shafani uendasikira agho malagho ghose gha BWANA ghishomelo kufuma chuonyi,

¹² ukasea cha ngomenyi ya mzuri na kungia chumbenyi cha muandiki; na wabaa wose werekoghe kidombo aho. Nawo ni muandiki Elishama, Delaia mwana wa Shemaia, Elnathani mwana wa Akbori, Gemaria mwana wa Shafani, Zedekia mwana wa Hanania, na wabaa wose.

¹³ Mikaia ukawighoria malagho usikire ghikishomwa ni Baruku wandu wose wikisikira.

¹⁴ Niko wabaa wose wikamduma Jehudi mwana wa Nethania, wawae Shelemia, na wawae m'baa Kushi, umzere Baruku, “Wada icho chuo kwachishomia wandu kuche.” Baruku ukawada icho chuo, ukaghenda kwawo.

¹⁵ Nao wikamzera, “Sea kidombo kuchishome.” Niko Baruku ukawishomia.

¹⁶ Wiendasikira malagho ghose, wikazighanana weni na weni kwa wowa, wikamzera Baruku, “Suti dimghorie mzuri agha malagho ghose.”

¹⁷ Wikamkotia Baruku, “Dighorie, kwaghiandikie wada agha malagho? Jeremia odeeka ukighora ima kukaandikagha?”

¹⁸ Baruku ukatumbulia, “Odeeka kinighoria malagho ghose nani ngaghiandika na wino chuonyi.”

¹⁹ Wabaa wikamzera Baruku, “Ghendenyi mkuvise mmbose na Jeremia, mndungi usemanye andu muko.”

Mzuri kukora icho chuo

²⁰ Waja wabaa wikaghenda kwa mzuri, nyuma ya kuwika chija chuo chumbenyi kwa muandiki Elishama; wikamghoria mzuri agho malagho ghose.

²¹ Niko mzuri ukamduma Jehudi urede icho chuo, nao ukachireda kufuma chumbenyi cha muandiki Elishama, na Jehudi ukachishomia mzuri, wabaa wose wikikaia kimusi mbai nambai ya mzuri.

²² Edeeka ni ngelo ya kwari, mori ghwa ikenda; na mzuri odeeka andenyi ya ngome yake ukaiagha ngelo ya kwari, ukioda modo ghwa maka ghorekoreloghe aho.

²³ Jehudi uendashoma karatasi idadu inya huwu, mzuri ukachiwada chuo na kuchirashua na kandagha katini ukachikumba modonyi ghwa maka, hata chikahia putu chikasia.

²⁴ Sena mzuri chiaimweri na wadumiki wake awo werekoghe wikisikiria agho malagho, ndewereobueghe hata kurashua nguwo rawo anduangi.

²⁵ Na hata ngera Elnathani na Delaia, na Gemaria weretimieghe kumvoya mzuri usechikore, nderewisikireghe anduangi.

²⁶ Nao mzuri ukafunya momu kwa mwana wake Jerahimeeli, na Seraia mwana wa Azrieli, na Shelemia, mwana wa Abdeeli, winiwade chiaimweri na uja muandiki Baruku, ela BWANA ukadivisa.

Jeremia kuandika chuo kizima

²⁷ Nyuma ya mzuri kukora chija chuo na malagho gharo ghose agho ghereandikiloghe ni Baruku ngimghoria, BWANA ukaghora nani ukighamba,

²⁸ “Wada chuo kizima kuandike andenyi yaro ghaja malagho ghose gha imbiri gherekoghe andenyi ya chija chuo chikorelo ni Mzuri Jehoiakimu wa Juda.

²⁹ Na kwa Jehoiakimu mzuri wa Juda kughambe, ‘BWANA waghamba huwu, Oho kwakora ichi chuo kukighamba, Kwaki kwachiandika wei mzuri wa Babuloni uchacha loli kutotesha iji isanga, na kubwagha mdamu na nyamandu?

³⁰ Kwa huwo ini BWANA naghamba huwu aighu yako Jehoiakimu mzuri wa Juda, Ndekuchaakaia na kivalwa cheseria kifumbi cha nguma cha Daudi, na gharia yako ichadegwa shighadi a mrukenyi ghwa iruwa ja dime, na mbeo ngelo ya nakio.

³¹ Nani nichakukaba chiaimweri na kivalwa chako, na wadumiki wako kwa wundu ghwa mawiwi ghenyu. Nichareda wuwiwi ghose aighu yenyu, na aighu ya wandu wikaiagha Jerusalemu, na aighu ya wandu wa Juda, ugho nereghughorieghe ghuchaawichea; ela ndemcheesikira.’”

³² Niko ngawada chuo kizima, ngamneka uja muandiki Baruku mwana wa Neria, uo oreandikieghe malagho ghose neremghorieghe ini Jeremia andenyi ya chija chuo cherekoreloghe ni Jehoiakimu mzuri wa Juda, ukaandika sena na kuchuria malagho mazima aighu ya agho gha imbiri.