JEREMIA 34 - Biblia Ilagho Jiboie Kwa Wandu Wose

Ilagho kwa Zedekia

¹ BWANA oreghorieghe nani ingelo Nebukadnezari mzuri wa Babuloni, chiaimweri na ijeshi jake, na mawuzuri ghose gha ndoenyi ghiko aisi yake werekoghe wikilwa na Jerusalemu na mizi yake yose.

² “BWANA, uo Mlungu wa Israeli ukanizera nighende kudedanya na Zedekia mzuri wa Juda nimzere, ‘Ola naawuyaghungira ughu muzi mkonunyi kwa mzuri wa Babuloni, nao uchaghukora.

³ Ndekuchaafufunuka kusewadilo, ela kwa loli kuchawadwa na kungirwa mkonunyi kwake; kuchawonana na kudedanya nao wushu kwa wushu, na kughenda Babuloni.’

⁴ Ela sena ee Zedekia mzuri wa Juda, sikira seji ini BWANA nighoragha; Naghamba huwu aighu yako, ‘Ndekuchaabwaghwa wudenyi anduangi.

⁵ Kuchafwa kwa sere. Na sa iji koni marumba gherekorwagha kwa wundu ghwa weke ndeyo, awo wazuri wa kala werekoghe imbiri yako, ni huwo koni wandu wichakora marumba kwa wundu ghwako na kukulilia wikighamba, “Weei ngai bwana!” ’ Kwa kukaia ini BWANA, namerie kujighora ilagho ijo.”

⁶ Niko ngamghoria Zedekia mzuri wa Juda agho malagho ghose aho Jerusalemu,

⁷ iji ijeshi ja mzuri wa Babuloni jerekoghe jikilwa na Jerusalemu, na mizi yose ya Juda, iyo eresigharikieghe, nayo ni Lakishi na Azeka, angu iyo niyo mizi ya Juda iaghilo wurigha eresigharikieghe.

Mabonyo gha mikalo aighu ya wazumba

⁸ BWANA oreghorieghe nani nyuma ya Mzuri Zedekia kubonya mapatano na wandu wose wa Jerusalemu jeeresha malagho gha wuhuru,

⁹ kukaia yamfwana kula mundu uwifunguo wazumba wake wa Kiebrania wikaiagha wa womi angu wa waka; eri ungi wawo usakem'bonya mruna wa Kiebrania kukaia mzumba.

¹⁰ Wabaa wose wikasikira, na wandu wose werengirieghe andenyi ya ijo ilaghano wikasikira; awo werelaghirieghe kukaia kula umu wawo umsighe mzumba wake ukaie huru, ukaiagha wa womi angu wa waka, wisewuekaia wazumba sena; nawo wikasikira, na kuwisigha wikaie huru.

¹¹ Ela konyuma wikaghaluka na kuwiwunja awo wazumba wa womi na wa waka werekoghe huru, wikawiwika aisi ya wuzumba sena.

¹² Niko BWANA,

¹³ Mlungu wa Israeli ukanizera nighorie wandu, “Nerebonyereghe ilaghano na weke ndeyo ngelo nerewifunyagha isanga ja Misri kufuma wuzumbenyi ngighamba,

¹⁴ ‘Kula mwaka ghwa mfungade, kula umu onyu suti umsighe Muebrania oreuziroghe kwake ukaie huru nyuma ya kudumika miaka irandadu; suti umsighe huru usemdumikie.’ Ela weke ndeyo ndewerenisikireghe hata kunideghia madu.

¹⁵ Kafwani koni moreherieghe, na kubonya agho ghiko gha hachi imbiri kwapo, kwa kueresha malagho gha wuhuru kwa kula umu onyu, mkabonya ilaghano imbiri kwapo andenyi ya Hekalu yapo;

¹⁶ ela mkaghaluka sena na kujilusha irina japo ingelo kula umu onyu oremmbunjireghe mzumba wake wa womi angu wa waka, awo morewisighieghe sa iji koni werekundeghe, nao mkaghaluka sena mkawiwika wuzumbenyi.

¹⁷ Kwa huwo ini BWANA naghora huwu, Mwalemelo ni kunisikira muereshe wuhuru kula mundu kwa mruna na kwa mmbao; olenyi ini namueresha wuhuru ghobwaghwa wudenyi na ghowadwa ni saka izamie, na ghwa njala. Nichabonya mbari rose ra ndoenyi rimshinikie.

¹⁸ Na awo wandu wijikosere ilaghano japo kwa kulemwa ni kuwadia seji werejibonyereghe imbiri kwapo, nichawibonya wifwanane na ija ngache wereidumbueghe ghadi na ghadi na kuidia aghadi yaro;

¹⁹ awo wabaa wa Juda, na wabaa wa Jerusalemu, wabaa wa ngomenyi na wakohani, na wandu wose wa isangenyi wereidieghe ghadi na ghadi ya iyo ngache ibarilo ghadi na ghadi,

²⁰ nichawifunya na kuwingira mikonunyi kwa wamaiza wawo, na mikonunyi kwa awo wilolagha kutotesha marangi ghawo. Gharia rawo richawuya vindo va nyonyi ra mbeonyi, na nyamandu ra isakenyi ra ndoenyi.

²¹ Nani nichamngira Zedekia na wabaa wake mikonunyi kwa wamaiza wake, na mikonunyi kwa awo wilolagha kutotesha marangi ghawo, ijo ijeshi ja mzuri wa Babuloni wiwisighie na kughenda chia rawo.

²² Olenyi nichawilaghira, nani nichawiwunja kwa ughu muzi wipate kulwa nagho, wighusime, na kughukora. Nichaibonya mizi ya Juda iwuye miduu isene wandu.”