JEREMIA 33 - Biblia Ilagho Jiboie Kwa Wandu Wose

Ilaghiro jimu ja isuwirio

¹ BWANA oreghorieghe nani indo ja kawi niko kifungonyi andenyi ya waza ya walindiri.

² BWANA uo uumbie ndoenyi na kuimangisha, irina jake uwangwaghwa BWANA, waghamba,

³ “Niwange nani nichakutumbulia; nichakughoria maza mbaa rivisikie, iro kusererimanyireghe.

⁴ Ini BWANA, Mlungu wa Israeli, naghamba huwu aighu ya nyumba riko andenyi ya ughu muzi ghwa Jerusalemu, na nyumba ra wazuri wa Juda iro rerechikanyiroghe eri ripate kubonya wurigha ghoghiria wuda.

⁵ Wamu waro wichacha kulwa na Wababuloni nawo wichabwaghwa, na kurichura iro nyumba ra awo wandu nichaawibwagha kwa machu na kubia kwapo; kwa kukaia namerie kughughalukia na mbai ughu muzi kwa wundu ghwa wuwiwi ghwawo ghose.

⁶ Olenyi nichaghuredia ughu muzi wuboisi na wubanana, nani nichawiboisa wandu waro na kuwiwonyera wungi ghwa mecha na wulindiri.

⁷ Nichawiwunjira Juda na Israeli mecha ghawo, na kuwiagha sa iji koni werekoghe imbiri.

⁸ Nani nichawielesha wuwiwi ghwa kaung'a yawo yose winibonyere, na kuwifuya wughoma kaung'a rawo rose na kuja kunilegha kwawo.

⁹ Na muzi ughu ghuchaniredia kuboilwa, na makaso, na wubaa, imbiri ya mbari rose ra ndoenyi iro richaasikira malagho gha agho mecha ghose nichaawibonyera; nawo wichaobua na kusughusika kwa wundu ghwa kuwona uko kuboa na agho mecha ghose nichaghubonyera ughu muzi.”

¹⁰ BWANA waghamba huwu, “Mwawuyaghamba wei isanga iji jeesighwa iduu jisene mundu hata nyamandu; ela sena, andenyi ya ihi mizi cheni ya Juda na chia ra Jerusalemu, ireni riko nduu risewadie wandu hata nyamandu, luchasikirika sena

¹¹ lwaka lwa kuseka na kuboilwa, na lwaka lwa bwana na bibi arusi, na chwaka ra awo wiboragha wikireda mafunyo gha chawucha andenyi ya Hekalu ya BWANA wikighamba, ‘Funyenyi chawucha kwa BWANA wa majeshi, angu BWANA ni mucha, na lukundo lwake lukatie lwadua kwa kala na kala.’ Kwa kukaia nichajibonya isanga jikaie sa iji koni jerekoghe, waghamba BWANA.”

¹² BWANA wa majeshi waghamba huwu, “Isanga iji jeresighiloghe iduu, jisewadie mundu hata nyamandu andenyi ya mizi yake yose, jichakaia na malalo gha walisha ghelisha mfugho rawo.

¹³ Andenyi ya mizi ya isanga ja mighondinyi, na andenyi ya mizi ya Shefela, na andenyi ya mizi ya Negebu, na andenyi ya isanga ja Benjamini, na andu kose kuko kaavui na Jerusalemu, na andenyi ya mizi ya Juda, mfugho richawoneka rikitalwa ni mlisha rikiida.”

¹⁴ BWANA waghamba, “Olenyi matuku ghichacha, nani nichajikatisha ilaghiro nerejibonyereghe na wandu wa Israeli na wandu wa Juda.

¹⁵ Matuku agho na ngelo iyo, nichabonya umu wa kivalwa cha Daudi ukaie mzuri, nao uchabonya hachi na loli isangenyi.

¹⁶ Matuku agho, wandu wa Juda wichakia, na wandu wa Jerusalemu wichakaia banana. Na muzi ugho ghuchawangwa, ‘BWANA nuo kukia kodu.’

¹⁷ Kwa kukaia ini BWANA naghamba, Daudi ndechaasowa mundu oseria kifumbi cha nguma andenyi ya Israeli,

¹⁸ na wakohani wa Kilawi ndewichaasowa mundu imbiri kwapo ofunya vizongona vekora, na kukora vizongona va viro, na kufunya vizongona kwa kala na kala.”

¹⁹ BWANA oreghorieghe nani ukighamba,

²⁰ “Ikakaia mdimagha kuchikanya ilaghano japo nijibonyere na dime, na ilaghano japo nijibonyere na kio, hata ikaie dime na kio valemwa ni kucha kwa ngelo raro,

²¹ aho niko ilaghano japo na mdumiki wapo Daudi jidimagha kuchika, hata usowe mwana wa womi oseria kifumbi chake cha nguma, na wokoni ilaghano japo aighu ya wadumiki wapo wakohani wa Kilawi.

²² Sa iji koni majeshi gha mlungunyi ghisetalikagha, na msangagha ghwa baharinyi ghusepimikagha, ni huwo koni nichaachichuria kivalwa cha mdumiki wapo Daudi na wakohani wa Kilawi awo wawuyanidumikia.”

²³ BWANA ukaghora nani ukighamba,

²⁴ “Welee, ndekuzighanire kukamanya seji awa wandu wawuyaghamba wei, ‘BWANA wamerie kuvilegha ivi vinyumba viwi orevisaghueghe?’ Na huwo wawimenyere wandu wapo hata ndewiduagha wikiwoneka sa mbari mesonyi kwawo.

²⁵ Ini BWANA naghamba, Ngalemwa ni kujimangisha ilaghano japo ja dime na kio, na sharia rapo ra mlungunyi na ndoenyi,

²⁶ aho niko nichaalegha kivalwa cha Jakobo, na mdumiki wapo Daudi, nani sichaamsaghua ungi wa kivalwa chake ubonye nguma aighu ya kivalwa cha Abrahamu, Isaaka na Jakobo. Angu nichawifuya wughoma na kuwiwunja andu kwawo.”