JEREMIA 32 - Biblia Ilagho Jiboie Kwa Wandu Wose

Jeremia kughua mbuwa

¹ BWANA oreghorieghe nani mwaka ghwa ikumi ghwa kubonya nguma kwake Zedekia mzuri wa Juda, nagho ghorekoghe ni mwaka ghwa ikumi na wunyanya ghwa Nebukadnezari mzuri wa Babuloni.

² Ngelo iyo, majeshi gha mzuri wa Babuloni gherekoghe ghaghurughaia muzi ghwa Jerusalemu, na ini mlodi Jeremia nerekoghe nafungilwa andenyi ya waza ya walindiri, erekoghe andenyi ya ngome ya mzuri wa Juda.

³ Zedekia mzuri wa Juda odenifunga angu nerefunyireghe wulodi ngighamba wei BWANA waghambie, “Ola nichamneka mzuri wa Babuloni ughu muzi, nao uchaghuwusa;

⁴ na Zedekia mzuri wa Juda ndechaafufunuka usewadilo ni Wababuloni, ela kwa loli uchangirwa mikonunyi kwa mzuri wa Babuloni; nao uchadedanya nao wushu kwa wushu wikizighanana;

⁵ sena uchamdwa Zedekia hata Babuloni, nao uchakaia aho hata nimchee, na ukedualwa na Wakaldayo ndechaawisima kungi.”

⁶ BWANA oreghorieghe nani ukighamba,

⁷ “Ola Hanameli mwana wa awuyo Shalumu uchacha kwako ukuzere, ‘Ghua mbuwa yapo iko Anathothi, kwa kukaia mundu wa kaavui uko na hachi eighua ni oho.’

⁸ Niko wamii Hanameli ukacha kwapo aho wazenyi ya walindiri, kunughana na ilagho ja BWANA, ukanizera, ‘Ghua mbuwa yapo iko Anathothi, isanga ja Benjamini, kwa kukaia hachi eiwusa, hata eighua wori ni yako; kwa huwo kuighuo.’ Niko ngamanya kukaia loli ni BWANA oreghorieghe nani.

⁹ “Ngaighua ija mbuwa iko Anathothi kufuma kwa wamii Hanameli, ngampimia vibelele va feza ikumi na mfungade.

¹⁰ Ngangira sahihi kwa ija barua eighua, na kuikaba muhuri, ngapata washahidi, na kupima rija pesa ratilinyi.

¹¹ Niko ngaiwusa ija barua eghua iko na muhuri, na sharia ra mapatano, na ija kopi zima isekabilo muhuri,

¹² ngarineka Baruku mwana wa Neria, wawae Mahiseia imbiri ya wamii Hanameli, na imbiri ya washahidi awo werengirieghe barua eghua sahihi, na imbiri ya Wayahudi werekoghe kidombo aho wazenyi ya walindiri.

¹³ Ngamlaghira Baruku imbiri kwawo ngighamba,

¹⁴ ‘BWANA wa majeshi, uo Mlungu wa Israeli waghamba huwu: Wada iri barua reghua mbuwa; iko na muhuri ghoighua, na iyo kopi yaro, kuriwike andenyi ya chombo cha wongo, ripate kukaia kwa ngelo ndacha.

¹⁵ Angu BWANA wa majeshi uo Mlungu wa Israeli waghamba huwu: Nyumba, na mbuwa ra mizabibu richaghulwa sena andenyi ya iji isanga.’

Ilombi ja Jeremia

¹⁶ “Nyuma ya kumneka Baruku mwana wa Neria ija barua eghua mbuwa, neremlombieghe BWANA ngighamba,

¹⁷ ‘Aa e Bwana MLUNGU! Ni oho kuumbie mlungunyi na ndoenyi kwa ndighi rako mbaa na kwa mkonu ghwako ghwa kudima! Ndekuwadie ilagho jingi jisedimikagha kwako,

¹⁸ oho kuwonyeragha lukundo lukatie kwa maelfu, ela sena kwadawikaba wandu wako kwa wundu ghwa kaung'a ra weke ndee. Ee Mlungu m'baa kuwadie ndighi rose, oho irina jako kuwangwagha BWANA wa majeshi,

¹⁹ kuko m'baa kwa njama rako na kwa mabonyo ghako; kwadawona chia rose ra wadamu na kumlipa kula mundu karakara na mabonyo ghake;

²⁰ oho korewonyereghe alama na mashiniko andenyi ya isanga ja Misri, na hata idime kwawuyawonyera kwa wadamu wose; kukamanyika seji iko idime.

²¹ Oho korewiredieghe wandu wako Israeli kufuma isanga ja Misri kwa alama na mashiniko, na kwa mkonu ghwako ghwa ndighi ghoobosha.

²² Kukawineka iji isanga jinorie na ndighi korewighemieghe weke ndee kukaia kuchawineka,

²³ nawo wikangia na kujiwusa. Ela ndewerekusikireghe hata kughenda kwa sharia rako. Ndewerebonyereghe ilagho jingi ja agho korewilaghirieghe wibonye. Kwa huwo niko kubonyere wikachelwa ni ughu wuwiwi ghose.

²⁴ “‘Zighana seji Wababuloni wiaghie wurigha wighurughaie ughu muzi wipate kughuwada, na kwa wundu ghwa wuda, na njala, na saka izamie, ughu muzi ghwamerie kungirwa mikonunyi kwa Wababuloni awo wawuyalwa nagho. Agho koreghighorieghe ghakatia, na oho kwawuyaghiwona.

²⁵ Ela sena oho ee Bwana MLUNGU kwanizerie huwu: “Ghua mbuwa kwa pesa, na kukupatira washahidi” - hata ngera saki ughu muzi ghwawadilo ni Wababuloni.’”

²⁶ Niko BWANA ukaghora nani ukighamba,

²⁷ “Ola ini ne BWANA, uo Mlungu wa wadamu wose; jeko ilagho jingi jisedimikagha kwapo?

²⁸ Ola nichaghungira ughu muzi mikonunyi kwa Wababuloni na kwa Nebukadnezari mzuri wa Babuloni, nao uchaghuwada.

²⁹ Awo Wababuloni wawuyalwa na ughu muzi wichacha na kughukora, wichaghukoranya chiaimweri na nyumba iro wandu waro werekoghe wikimfukiria Baali marumba aighu ya mapaa gharo; wikifunya mafunyo gha kunywa kwa kughidiria milungu mizima, eri winivavire na kuniwusira machu.

³⁰ Kwa kukaia wana wa Israeli na wana wa Juda ndewibonyere ilagho jingi icha, ela wuwiwi mduu imbiri kwapo kufuma wanake ghwawo; wana wa Israeli ndewibonyere ilagho jingi icha, ela kunivavira tu na kuniwusira machu kwa wundu ghwa mabonyo ghawo.

³¹ Wandu wa muzi ughu wanibonyere ngajokwa ni machu kufuma ghwaaghwa hata linu; kwa huwo nichaghuinja niseghuwoneghe

³² kwa wundu ghwa ugho wuwiwi ghubonyero ni wandu wa Israeli na wandu wa Juda, wikanivavira na kuniwusira machu, hata na wazuri wawo, na wabaa wawo, na wakohani wawo, na walodi wawo; wose wandu wa Juda na awo wikaiagha Jerusalemu.

³³ Waghalukie nambai wisekunde kuniwona, na hata ngera nawifundishire kwa kufunga ndighi, ela ndewerenisikireghe wiwade mafundisho ghapo anduangi.

³⁴ Wadawika milimu yawo ya wuchafu andenyi ya Hekalu iwangilo kwa irina japo, wipate kuilusha.

³⁵ Waaghie andu kotasa kwa wundu ghwa Baali andenyi ya vololo ya Hinomu, wipate kufunya wana wawo wa womi na wa waka kwa ghuja mlungu Moleki; hata ngera saki serewilaghirieghe huwo, na ilagho ijo jingi jisengia andenyi ya akili rapo, wei wibonye ugho wuchafu na kuwishekeria Juda kungia kaung'enyi.”

Ilaghiro ja Isuwirio

³⁶ BWANA, uo Mlungu wa Israeli waghamba huwu, “Wandu waawuyaghamba kukaia muzi ughu ghuchangirwa mikonunyi kwa mzuri wa Babuloni kwa chia ya wuda na njala, na saka izamie:

³⁷ Olenyi nichawitumbanya awo wandu kufuma kwa agho masanga nerewiwingieghe kwa wundu ghwa machu ghapo na kubia kwapo, na makai mabaa; nipate kuwiwunja andu aha, nani nichawibonya wikaie nicha.

³⁸ Nawo wichawuya wandu wapo, nani nichakaia Mlungu wawo.

³⁹ Nichawineka nia imweri na chia imweri, wipate kuniobua kwa kala na kala kwa mecha ghawo na gha wana wawo wichaanugha nyuma.

⁴⁰ Nani nichabonya ilaghano ja kala na kala nawo, kukaia sichaaleka kuwibonyera mecha. Nichawibonya winiobuo wisechewuya nyuma na kunisigha.

⁴¹ Nichaboilwa kuwibonyera mecha, nani nichawimangisha andenyi ya iji isanga, kwa ngolo yapo yose na kwa roho yapo yose.

⁴² “Na sa iji koni nerewiredieghe wandu awa mawiwi, huwo koni nichawireia mecha ghose agho nerewilaghirieghe.

⁴³ Isanga iji mwawuyajighamba wei jeeka iduu, jisewadie mndungi hata nyamandu, jinekelo Wababuloni, jichaghaluka hata mbuwa rikaie rikighulwa aha.

⁴⁴ Mbuwa richaghulwa kwa pesa, na barua reghua richangirwa sahihi, naro richakabwa muhuri na kushuhudilwa andenyi ya isanga ja Benjamini, na andu kose kuko kaavui na Jerusalemu, na andenyi ya mizi ya Juda, na mizi ya isanga ja mighondinyi, andenyi ya mizi ya Shefela, na mizi ya Negebu; kwa kukaia nichawiwunja sena isangenyi kwawo, ini BWANA naghamba.”