JEREMIA 31 - Biblia Ilagho Jiboie Kwa Wandu Wose

Kughala kwa wandu wa Israeli

¹ BWANA waghamba, “Ngelo ija nichakaia Mlungu wa vichuku va Israeli, nawo wichakaia wandu wapo.

² Awo wandu wifufunukie wisebwaghilo wudenyi, nerewiwonieghe wughoma kireti Iji wandu wa Israeli werelolagha kuhora,

³ nerewifutukieghe kufuma kula. Neremkundeghe kwa lukundo lwa kala na kala, niko huwo nadua ngikaia mloli konyu.

⁴ Nichamuagha sena, na inyo mchaaghika ee wandu wa Israeli; mchawada mayanga ghenyu, na kuvina kwa kuboilwa.

⁵ Mchawa mizabibu sena aighu ya mighondi ya Samaria, na awo wiwagha, wichaboilwa ni matunda gharo.

⁶ Ngelo ichacha walindiri wichaawanga andenyi ya isanga ja mighondinyi ja Efraimu, ‘Wukenyi dijoke Sioni kwa BWANA Mlungu odu.’”

⁷ BWANA waghamba huwu, “Borenyi kwa kuboilwa, kwa wundu ghwa Israeli, wusirenyi chwaka kwa wundu ghwa m'baa wa iro mbari ra wandu; ghorenyi, m'bore makaso, mghambe, ‘BWANA wamerie kuwikira wandu wake, agho masighariko gha Israeli.’

⁸ Olenyi nichawireda kufuma isanga ja kaskazinyi, na kuwikwanya kufuma masanga gha kula gha ndoenyi; vitungure na wakelemeri wichakaia aghadi kwawo, chiaimweri na muka uko na kifu, na uo ukumbagha lufu kwa kuva; wichawuya aha izungu ja wandu ibaa nandighi.

⁹ Wichacha wikilila, nani nichawiwunja wikilomba. Nichawighenja mbai-mbai ya meda ya machi, na kwa chia ighorokie wisekuwagha; angu ini ne ndee Israeli, na Efraimu ni mvalwa wapo wa imbiri.”

¹⁰ BWANA waghamba, “Sikirenyi ilagho japo inyo mbari ra wandu, mghorie masanga gha pwani ghiko kula mghambe, ‘U orewisaghisireghe wandu wa Israeli, nao uchawitumbanya sena, seji mlisha ulindiagha chagha chake.’

¹¹ BWANA wamerie kuwifungua wandu wa Israeli, nao wameria kuwikombua kufuma kwa iyo mbari iwadie ndighi erewimazirieghe.

¹² Wichacha wikibora kwa lwaka lubaa, aighu ya Mghondi ghwa Sioni; nawo wichaja manori mecha gha BWANA, gha viro, na divei, na mavuda; gha ng'ondi na ng'ombe ngoo, na marangi ghawo ghichawuya sa mbuwa inyoshere nawo ndewichaasowekelwa sena anduangi.

¹³ Niko aho wai wichavina kwa kuboilwa, wandu wa irika na waghosi wichaboilwa, nichawihoresha na kughamba kulila kwawo kuwuya kuboilwa na wasi ghwawo ghuwuye maseko.

¹⁴ Nichaghudisha mkohani na vindo kwa wungi, na wandu wapo wchakatwa ni wucha ghwapo, Ini BWANA naghamba.”

Wughoma ghwa BWANA kwa Israeli

¹⁵ BWANA waghamba huwu: “Lwaka lwasikirika Rama lwaka lolila na kukema mchungu; Raheli ukiwililia wana wake, nao walegha kuhoreshwa kwa wundu ghwa wana wake, angu wameria kufwa.

¹⁶ Leka lila, aghia mbori; kwa kukaia kazi kubonyere kwa wana wako ichapata malipo; nawo wichawuya kufuma isanga ja m'maiza.

¹⁷ Jeko isuwirio kwa irangi jako jichagha, na wana wako wichawuya kwa isanga jawo jeni.

¹⁸ “Nasikire wandu wa Israeli wikiruma, ‘Oho kwadiwunjire kwa kudikaba, karakara na ngache isefundishiro dikafundishika; kudiwunje dipate kuaghika, angu oho ko BWANA Mlungu odu.

¹⁹ Diendaghaluka na mbai, dawurie dikahea; na diendafundishwa, dikakukaba diweni barenyi; derefueghe waya dikafwa ngolo, kwa kukaia deredukieghe waya ghwa wanake ghodu.’

²⁰ “Welee, Israeli si mwana wapo mkundwa? Welee, si mwana wapo, wa ngolo wapo? Kula ngelo nidedagha kiwiwi aighu yake, nadawuya nimkumbuke sena; kwa huwo ngolo yapo yakaia na bea nao, nani kwa loli nichamfuya wughoma.

²¹ Kukubonyere kumoni alama ra chienyi, kudunge midi ekuwonyera chia kuikumbuke nicha ija chia mbaa, iyo koreiidieghe. Wuyenyi ee wandu wa Israeli, iwurienyi mizi yenyu.

²² M'mara-mara hata lii, inyo wandu mserumirikie? Ini BWANA nabonyere ilagho iwishi ndoenyi, ja muka kumlindia mndwawomi.”

Mecha ghichagha gha wandu wa Mlungu

²³ BWANA wa majeshi, uo Mlungu wa Israeli waghamba huwu, “Ngelo nichaawiwunja wandu isangenyi kwawo, wichatumia agha malagho sena andenyi ya isanga ja Juda na andenyi ya mizi yawo, ‘BWANA ndeghurasimie ugho mghondi ghwa wueli ghwa Jerusalemu, aho andu kwa wueli ukaiagha.’

²⁴ Na wandu wa Juda na wa mizi yose wichakaia aho andu kumweri; na wokoni walimi, na awo wimaraa-mara na mfugho rawo.

²⁵ Angu nichaihoresha iyo roho isirilo, na kula roho idumbukagha nichaighudisha.”

²⁶ Aho niendawuka kufuma dilonyi rapo ngazighana ngaghamba, “Nalale dilo risingie ngawuka nicha.”

²⁷ BWANA waghamba, “Ola matuku ghichacha, nani nichabonya isanga ja Israeli na ja Juda jichulo ni wandu na mfugho.

²⁸ Na ichakaia sa iji koni nerewiinjireghe na kuwifunya noko, kuwinona na kuwiredia wuwiwi, huwo koni nichawiagha na kuwiwika.

²⁹ Ngelo iyo, wandu ndewichaaghora sena: ‘Wavi wajie zabibu mbishi, na wana wikawadwa ni changarari.’

³⁰ Wulalo ghwa agho, kula mundu uchabwaghwa ni kaung'a rake. Mundu ujie zabibu rake mbishi, nuo moni maghegho ghake ghichaawadwa ni changarari.”

³¹ BWANA waghamba, “Ola matuku ghichacha, nani nichabonya ilaghano iwishi na wandu wa Israeli na wandu wa Juda.

³² Ilaghano ijo ndejichaakaia sa iji nerejibonyereghe na weke ndee iji nerewifunyireghe isanga ja Misri ngiwidwa na mkonu; ilaghano japo ijo werejichikanyireghe, hata ngera nerekoghe kwawo sa mumi wawo.

³³ Ela ilaghano nichaajibonya na wandu wa Israeli nyuma ya matuku ghaja nijo iji: Nichawika sharia yapo andenyi kwawo, nani nichaiandika aighu ya ngolo rawo; nichakaia Mlungu wawo nawo wichakaia wandu wapo.

³⁴ Ndewichaafundishana sena kula mundu na mmbao na kula mundu na mruna wikighamba, ‘Mmanye BWANA,’ angu wandu wose wichanimanya kufuma mtini wawo, hata m'baa wawo. Kwa kukaia nichawifuya wughoma mawiwi ghawo, na kaung'a yawo sichaaikumbuka sena anduangi, ini BWANA naghamba.”

³⁵ BWANA, uo uwikie iruwa jifunyeghe mwengere nadime, uo ulaghirie mori na nyerinyeri rifunyeghe mwengere nakio, uo unyavuragha bahari hata mivo-mivo yake irurume, uwangwagha BWANA wa majeshi, waghamba huwu,

³⁶ “Mpango ughu ghwa toe ghukasia imbiri kwapo, niko na kivalwa cha Israeli chichaasia wisekaie mbari imbiri kwapo kwa kala na kala.”

³⁷ BWANA waghamba huwu: “Ikakaia idimikagha mlungunyi koighu kupimo, na misingi ya ndoenyi naisi idimagha kumanywa, niko kivalwa cha Israeli nichaachilegha putu kwa wundu ghwa agho ghose wibonyere.”

³⁸ BWANA waghamba, “Ola matuku ghichacha, na muzi ghwa Jerusalemu ghuchaaghwa sena kwa wundu ghwapo; kufuma Mnara ghwa Hananeli hata Mbenge ya Mbembe.

³⁹ Msitari ghwa kipimo ghuchaghorolwa hata mghondi ghwa Garebu, ima ghughahike cha Goa.

⁴⁰ Vololo yose, andu wafu wirikwagha na andu maivu ghidaghwagha, na mbuwa rose riko hata kamoda ka Kidroni, cha mashariki, ichabonywa ikaie ya wueli kwapo; ugho muzi jingi ndeghuchaachikanywa hata kunonwa.”