JEREMIA 29 - Biblia Ilagho Jiboie Kwa Wandu Wose

Barua ya Jeremia kwa Wayahudi wiko Babuloni

¹ Agha nigho malagho gha barua nereandikieghe ini mlodi Jeremia kufuma Jerusalemu kwa waghosi weredwaloghe wunyika, na kwa wakohani, na walodi na wandu wose awo weredwaloghe wunyika ni Nebukadnezari kufuma Jerusalemu hata Babuloni.

² Aho ni nyuma ya mzuri Jekonia na mae kudwalwa wunyika chiaimweri na weke kolowi, na wabaa wa Juda na Jerusalemu, mafundi, na wachani vuma, kufuma Jerusalemu.

³ Barua iyo nereidumieghe kwa mkonu ghwa Elasa mwana wa Shafani na Gemaria mwana wa Hilkia, awo weredumiloghe ni Zedekia mzuri wa Juda, kwa Nebukadnezari mzuri wa Babuloni. Nayo ereghorieghe huwu:

⁴ “BWANA wa majeshi, uo Mlungu wa Israeli waghamba huwu, kwa wandu wose widwalo wunyika kufuma Jerusalemu hata Babuloni:

⁵ ‘Aghenyi nyumba mkaie andenyi, wenyi mbuwa, muje mavalo gharo.

⁶ Lowuonyi muve wana wa womi, na wa waka; mlowore wana wenyu wa womi na wa waka, wipate kuva wana wa womi na wa waka, mchurikie andenyi ya ijo isanga, msepunguo.

⁷ Mlindie sere andenyi ya ugho muzi nam'bonya mdwalo wunyika, mghulombie ugho muzi kwapo ini BWANA, kwa kukaia ghukakaia na sere nenyo mchakaia na sere.

⁸ Angu ini BWANA wa majeshi, uo Mlungu wa Israeli naghamba huwu, Msesighe walodi wenyu, na wandu wenyu wetambua pepo wiko aghadi konyu wimkalie, hata msakesikira ndodo rawo wilodagha;

⁹ kwa kukaia waawuyamfunyira wulodi ghwa tee kwa irina japo, ini siwidumie.’

¹⁰ “BWANA waghamba huwu, ‘Miaka mirongo mfungade ya kudwalwa wunyika Babuloni ikakata, nichamchea; nani nichajikatisha ilaghiro japo, na kummbunja andu aha.

¹¹ Angu naichi mipango niko nayo cha konyu, ni mipango ya sere, iseko ya wuwiwi, nipate kumneka isuwirio ngelo ra kutua.

¹² Niko aho mchaniwanga, mchacha na kunilomba; nani nichasikira.

¹³ Mchanilola na kuniwona, iji mwanilola kwa ngolo renyu rose.

¹⁴ Mchaniwona, nani nichammbunja isangenyi konyu; nichamkwanya kufuma kwa mbari rose ra wandu, na andu kose neremmbingieghe; nani nichamreda kufuma kwa jija isanga moredwaloghe wunyika na kummbunja aha.’

¹⁵ “Mwawuyaghamba, ‘BWANA wawusirie walodi Babuloni kwa wundu ghodu,’

¹⁶ Sikirenyi seji BWANA waghamba aighu ya uo mzuri useagha kidombo kifumbinyi cha nguma cha Daudi, na aighu ya wandu wose wikaiagha andenyi ya ughu muzi, wamzenyu awo wiseredwaloghe wunyika andwamweri nenyo.

¹⁷ BWANA wa majeshi waghora huwu: ‘Olenyi nichawiredia wuda, na njala na saka izamie; nawo wichakaia sa matunda gha tini ghizamie, ghisedimagha kujika.

¹⁸ Nani nichawinugha kwa wuda na njala na saka izamie, na kuwibonya wishinikilo ni mawuzuri ghose ghiko ndoenyi; wiwuye wa njowe, weshinikilwa, wezomelwa, na wesholelwa andu uko kose nichaawighenja kwa mbari rose;

¹⁹ kwa kukaia waleghie kusikira malagho ghapo nighidumie kwawo tuli tuli kwa chia ya wadumiki wapo walodi, ela ndeweresikireghe.

²⁰ Sikirenyi seji Ini BWANA nighoragha konyu inyo mmbose moredwaloghe wunyika, ngamghenja kufuma Jerusalemu hata Babuloni.’

²¹ “BWANA wa majeshi, uo Mlungu wa Israeli waghamba huwu aighu ya Ahabu mwana wa Kolaia na Zedekia mwana wa Maaseia, awo wawuyamfunyira wulodi ghwa tee kwa irina jake: ‘Ola nichawingira mikonunyi kwa Nebukadnezari, mzuri wa Babuloni, nao uchawibwagha imbiri konyu.

²² Na kwa wundu ghwawo, wandu wose wa Juda widwalo wunyika, na awo wiko Babuloni, wichakaia wikitumia malagho agha kwa kuwasira njowe, “BWANA ndekubonye sa Zedekia na Ahabu awo wereocheloghe wimoo ni Nebukadnezari mzuri wa Babuloni;”

²³ kwa kukaia wabonyere wukelu andenyi ya Israeli, wikalaka na waka wa wambao, sena ii chia wiaghora tee wikiloda kwa irina japo nisewidumie. Ni ini niichi malagho agho sena neko mshahidi, Ini BWANA naghamba.’”

Barua ya Shemaia

²⁴ Kumzere Shemaia Mnehelami kukaia,

²⁵ BWANA wa majeshi, uo Mlungu wa Israeli waghora huwu, “Kwaghenjere barua kwa irina jako kwa wandu wose wikaiagha Jerusalemu, na kwa mkohani Zefania mwana wa Maaseia, na kwa wakohani wose, kukighamba wei

²⁶ BWANA wakubonyere kukaie mkohani wulalo ghwa mkohani Jehoiada, kupate kukaie mzighaniri wa Hekalu ya BWANA, na kumfunga kula mundu wa isu, uo ukubonyagha moni kukaia mlodi kwa kilingo na izango ja chuma singonyi kwake.

²⁷ Da kwaki kusemkanie Jeremia uja wa Anathothi wawuyamfunyira wulodi?

²⁸ Kwa kukaia wadumie barua kodu isi didwalo wunyika Babuloni ukighamba, ‘Kudwalwa wunyika konyu kucham'bonya mkaie aho kwa ngelo ndacha; kwa huwo aghenyi nyumba rekaia, muwe mbuwa renyu mpate vindo veja.’”

²⁹ Nao mkohani Zefania ukaishoma iyo barua mlodi Jeremia ukisikira.

³⁰ Niko BWANA ukaghora na Jeremia ukighamba,

³¹ “Duma malagho kwa wandu wose widwalo wunyika kughambe kukaia, ‘BWANA waghamba huwu aighu ya Shemaia Mnehelami: Kwa kukaia Shemaia wamfunyire wulodi nisemdumie, hata ukam'bonya inyo mrumirie tee,

³² nichamkaba Shemaia Mnehelami na kivalwa chake chose; ndechaakaia na mndungi odua moyo aghadi ya awa wandu, na kuwona iro maza ndicha nichaawibonyera wandu wapo, kwa kukaia wadeda malagho ghewibonya winileghe.’”