JEREMIA 28 - Biblia Ilagho Jiboie Kwa Wandu Wose

Jeremia na mlodi Hanania

¹ Mwaka ugho ghoni, Zedekia mzuri wa Juda ukizoya kubonya nguma, mori ghwa kasanu ghwa mwaka ghwake ghwa kana, Hanania mwana wa Azuri, mlodi ufumie Gibeoni, ukadedanya na ini andenyi ya Hekalu, imbiri ya wakohani na wandu wose, ukanizera wei,

² BWANA wa majeshi, uo Mlungu wa Israeli waghambie huwu, “Namerie kuchikanya ghongolo ya mzuri wa Babuloni.

³ Nichawunja vilambo vose va Hekalu aha andenyi ya miaka iwi, ivo veredwaloghe ni Nebukadnezari mzuri wa Babuloni kufuma aha hata Babuloni.

⁴ Sena nichammbunja Jekonia mwana wa Jehoiakimu mzuri wa Juda, na wandu wose wa Juda weredwaloghe wunyika cha Babuloni; kwa kukaia nichaichikanya ghongolo ya mzuri wa Babuloni.”

⁵ Niko mlodi Jeremia ukamzera mlodi Hanania imbiri ya wakohani na imbiri ya wandu wose werekoghe kimusi andenyi ya Hekalu ya BWANA,

⁶ “Amen! BWANA ndebonye woruwo, ubonye malagho gha wulodi ghwako ghikaie gha loli; vilambo va Hekalu ya BWANA vipate kuwunjwa kufuma Babuloni chiaimweri na wandu wose widwalo wunyika.

⁷ Elaima sikira ilagho nikughoriagha awandu wose wikisikiria,

⁸ Walodi wose werekoghe imbiri ya oho na ini ngelo ra kala werefunyireghe wulodi ghwa wuda, njala, na saka izamie aighu ya masanga mengi, na mawuzuri mabaa.

⁹ Mlodi uo ose ufunyagha wulodi ghwa maza ra sere, nao agho malagho ghake ghibonyeke, niko umanyikagha kukaia loli waadumwa ni BWANA.”

¹⁰ Niko Hanania ukavifunya ivo vilingo va ghongolo verekoghe singonyi kwa mlodi Jeremia, ukavichikanya.

¹¹ Hanania ukaghamba imbiri ya wandu wose, “BWANA waghamba huwu, Huwu niko nichaaichikanya ghongolo ya Nebukadnezari mzuri wa Babuloni ifume singonyi kwa mbari rose andenyi ya miaka iwi.” Ela Jeremia ukaghenda chia yake.

¹² Kapindi katini, nyuma ya mlodi Hanania kuchikanya ghongolo kufuma singonyi kwa mlodi Jeremia, BWANA ukaghora na Jeremia:

¹³ “Ghenda kumzere Hanania, ‘Ola kwachikanyire vilingo va midi, ela nichabonya vizima va chuma.

¹⁴ Ini BWANA, uo Mlungu wa Israeli naringirie mbari iri rose ra wandu ghongolo ya chuma, ripate kumdumikia Nebukadnezari mzuri wa Babuloni; nawo wichamdumikia, kwa kukaia namnekie hata nyamandu ra isakenyi.’”

¹⁵ Nao mlodi Jeremia ukamzera mlodi Hanania, “Sikira Hanania, BWANA ndekudumie kungi, na oho kwawibonya wandu awa wirumirie malagho gha tee.

¹⁶ Kwa huwo BWANA waghamba huwu, ‘Ola nichakuinja kufuma ndoenyi. Kuchafwa ughu mwaka ghoni, kwa kukaia kwaghora malagho ghemlegha BWANA.’”

¹⁷ Nao mlodi Hanania ukafwa mori ghwa mfungade ghwa ugho mwaka ghoni.