JEREMIA 26 - Biblia Ilagho Jiboie Kwa Wandu Wose

Jeremia kubonywa mwandu

¹ Kuzoya kwa kubonya nguma kwake Jehoiakimu mwana wa Josia mzuri wa Juda, BWANA oreghorieghe

² ukaghamba, “Kaia kimusi awazenyi ya Hekalu, kughorie wandu wa mizi yose ya Juda, awa wawuyacha kutasa Hekalunyi, malagho ghose nichaakulaghira kuwizere; kuseghirie ilagho jingi.

³ Kewada wichasikira wighaluke na kusigha kula umu mighendo yake izamie, eri nipate kughalusa nia ewibonya kiwiwi.

⁴ Kuwizere, ‘BWANA waghamba huwu: Mkalegha kunisikira na kunugha sharia rapo niriwikie imbiri konyu,

⁵ na kulindia malagho gha wadumiki wapo walodi nawuyawiduma konyu toe, hata ngera ndemuwitalie,

⁶ nichaibonya Hekalu ihi iwuye sa Shilo; na mbari rose ra ndoenyi wichatumia irina ja ughu muzi sa kilambo chiwadilo ni njowe.’”

⁷ Wakohani, na walodi, na wandu wose wikamsikira ukighora agho malagho andenyi ya Hekalu ya BWANA.

⁸ Jeremia uendameria kughora malagho ghose orelaghiriloghe ni BWANA kwa wandu wose, wakohani, na walodi, na wandu wose, wikammbwada wikighamba, “Kuchafwa!

⁹ Kwaki kwafunya wulodi kwa irina ja BWANA kukighamba, ‘Ihi Hekalu ichakaia sa Shilo, na wei ughu muzi ghuchakaia mduu ghusewadie wandu?’” Wandu wose wikakwana na kummaria Jeremia aho Hekalunyi ya BWANA.

¹⁰ Nao iji wabaa wa Juda wasikira maza iro, wikacha Hekalunyi kwa BWANA kufuma ngomenyi kwa mzuri, wikasea kidombo vifumbinyi kwawo andu kongiria Mbenge Mbishi ya Hekalu ya BWANA.

¹¹ Niko wakohani na walodi wikawizera wabaa chiaimweri na wandu wose, “Umundu wafwane utanyo kifwa, kwa kukaia wafunyire wulodi kiwiwi aighu ya ughu muzi, sa iji koni mwasikira kwa madu ghenyu gheni.”

¹² Niko Jeremia ukawizera wabaa na wandu wose ukighamba, “Ni BWANA unidumie kufunya wulodi aighu ya ihi Hekalu na ughu muzi, niko ngaghora malagho agho ghose mwaghisikira.

¹³ Kwa huwo idana boisenyi mighendo yenyu na mabonyo ghenyu, mumsikire BWANA Mlungu onyu; nao uchasigha kum'bonyera kiwiwi icho uchighorie aighu yenyu.

¹⁴ Ela kwapo ini, wonenyi neko mkonunyi konyu; nibonyerenyi agho mughiwonagha kukaia mecha na gha hachi konyu.

¹⁵ Ela mmanye kwa loli mkanibwagha, mchakuredia aighu yenyu na aighu ya muzi ughu na wandu waro ikosa ja kubwagha mundu usewadie ikosa jingi. Kwa kukaia ni loli BWANA ooniduma konyu kughora agho malagho ghose mwaghisikira kwa madu ghenyu.”

¹⁶ Niko wabaa wa wandu wose wikawizera wakohani na walodi, “Ndeifwane umundu utanyo kifwa, kwa kukaia waghora nesi kwa irina ja BWANA Mlungu odu.”

¹⁷ Na wabaa wamu wa isanga wikawuka na kuwizera wandu wose wakwanyika wikighamba,

¹⁸ “Mika wa Moreshethi orefunyireghe wulodi matuku gha Hezekia mzuri wa Juda, ukawizera wandu wose wa Juda, ‘BWANA wa majeshi, waghamba huwu, Sioni ichalimwa sa mbuwa, Jerusalemu ichawuya kitungu cha maghacho na mghondi ghwa Hekalu ghuchawuya msidu.’

¹⁹ Welee, Hezekia mzuri wa Juda, chiaimweri na wandu wose wa Juda werem'bwaghieghe Mika? Welee, nderemuobughe BWANA na kuvoya uvikilo ni wughoma ghwa BWANA? Welee, BWANA ndereghalusireghe nia na kusigha kughureda ugho wuwiwi m'baa oreghughorieghe aighu yawo anguwada? Diamba dikuredie wuwiwi isi diweni.”

²⁰ (Korekoghe na mndumu orefunyireghe wulodi kwa irina ja BWANA, uwangwaghwa Uria mwana wa Shemaia ufumie Kiriath-jearimu. Orefunyireghe wulodi aighu ya ughu muzi na aighu ya iji isanga kwa malagho ghifwanane na agha gha Jeremia.

²¹ Hata iji Mzuri Jehoiakimu chiaimweri na mang'oni ghake na wabaa wake wereghisikireghe malagho gha Uria, mzuri orekundieghe kum'bwagha; ela iji Uria oresikireghe, oreobueghe na kukimbiria Misri.

²² Niko mzuri Jehoiakimu ukaduma wandu wamu Misri wikwanye na Elnathani mwana wa Akbori,

²³ wikamfunya Uria aja Misri, wikamreda kwa Mzuri Jehoiakimu; nao ukam'bwagha kwa lufu na kughukumba mumbi ghwake andu korikia kwa wandu wa kawaida.)

²⁴ Ela kwa kukaia Ahikamu mwana wa Shafani oremteserieghe Jeremia, ndeeredimikieghe ufunyo kwa wandu ubwagho anduangi.