JEREMIA 25 - Biblia Ilagho Jiboie Kwa Wandu Wose

Wulodi aighu ya kudwalwa wunyika cha Babuloni

¹ Mwaka ghwa kana ghwa kubonya nguma kwake Jehoiakimu mwana wa Josia mzuri wa Juda, (nagho ni mwaka ghwa imbiri ghwa kubonya nguma kwake Nebukadnezari mzuri wa Babuloni), BWANA oreghorieghe nani aighu ya wandu wose wa Juda;

² ukawighoria wandu wose wa Juda na awo werekoghe wikikaia Jerusalemu.

³ “Kufuma mwaka ghwa ikumi na idadu ghwa kubonya nguma kwake Josia mwana wa Amoni, mzuri wa Juda, serelekieghe kumghoria ilagho ja BWANA ijo orekoghe ukinighoria, na kuvikia linu ni miaka mirongo iwi na idadu; ela ndemoresikireghe anduangi.

⁴ Ndemcheesikira hata kudegha kudu konyu wei msikire, hata ngera BWANA wafungie ndighi kumdumia wadumiki wake walodi ngelo kwa ngelo;

⁵ wikighamba, ‘Ghalukenyi idana, kula umu onyu ufume kwa mighendo yake ya wuwiwi na mabonyo ghake ghizamie, mpate kujikaia isanga ijo BWANA oremnekieghe inyo na weke ndeyo kufuma koicho hata kwa kala.

⁶ Msenughe milungu mizima mkiidumikia na kuitasa; mchemvavira BWANA na kuwusira machu ghake kwa iro kazi ra mikonu yenyu. Aho niko nao moni usechaamkaba anduangi.’

⁷ BWANA waghamba, ‘Ela sena ndemcheenisikira, eri mpate kunivavira na kuwusira machu ghapo kwa wundu ghwa iro kazi ra mikonu yenyu, nenyo mpato ni wasi.’

⁸ “Kwa huwo BWANA wa majeshi waghora huwu, angu msenisikire,

⁹ ola nichaduma malagho kwa mbari rose rikaiagha cha kaskazinyi, na kwa mdumiki wapo Nebukadnezari mzuri wa Babuloni, wipate kucha na kulwa na wandu wikaiagha iji isanga; na wandu wose wikaiagha mbai mbai yaro. Nani nichawitotesha putu na kuwibonya kilambo cheobosha kusholelwa, wikaie winonekie kwa kala na kala.

¹⁰ Nichawiinjira chwaka ra kuboilwa; lwaka lwa bwana-arusi na bibi-arusi, lwaka lwa magho ghishagha, na mwengere ghwa taa.

¹¹ Isanga jose jichasigharika iduu jimerie kunoneka, na iri mbari ra wandu richamdumikia mzuri wa Babuloni kwa miaka mirongo mfungade.

¹² “Ela nyuma ya iyo miaka mirongo mfungade kukatia, nichaikaba mbari ya Babuloni chiaimweri na mzuri waro. Nichajitotesha ijo isanga ja Wakaldayo, kwa wundu ghwa mawiwi ghawo, kujibonya jiwuye iduu kwa kala na kala.

¹³ Nichaghikatisha malagho ghose nereghighorieghe aighu ya Babuloni, ee, kula ilagho jiandikilo andenyi ya ichi chuo seji Jeremia orefunyireghe wulodi aighu ya mbari rose.

¹⁴ Mbari nyingi na wazuri wabaa wichawibonya Wababuloni wikaie wazumba wawo, nani nichawilipa karakara na kazi ra mikonu yawo.”

Kutanya kwa Mlungu aighu ya iro mbari ra wandu

¹⁵ Nao BWANA, uo Mlungu wa Israeli ukanizera, “Wada ichi kikombe cha divei ya machu ghapo, kuwinyoshe wandu wa iri mbari rose ra wandu nichaakuduma kwawo.

¹⁶ Wichachinywa na kutatarika, walaghalwa ni akili kwa wundu ghwa wuda nichaaghureda aghadi kwawo.”

¹⁷ Niko ngachiwada icho kikombe kufuma kwa BWANA, ngawinyosha wandu wa mbari rose awo BWANA unidumie kwawo.

¹⁸ Jerusalemu na mizi yose ya Juda na wazuri wawo na wabaa wawo wikanywa; wipate kuwuya wuduu, wa kumenywa, kusekwa na wa kuwasirwa njowe seji koni iko linu.

¹⁹ Na Farao, mzuri wa Misri ukanywa icho kikombe chiaimweri na wadumiki wake, na wabaa wake, na wandu wose;

²⁰ na wandu wose wa kighenyi wiko aghadi kwawo, wazuri wose wa isanga ja Uzi na wazuri wose wa isanga ja Wafilisti (Ashkeloni, Gaza, Ekroni, na masighariko gha wandu wa Ashdodi);

²¹ Edomu, Moabu, na wana wa Amoni;

²² wazuri wose wa Tiro, wazuri wose wa Sidoni, na wazuri wa masanga gha pwani kimonu cha Bahari ya Mediterania;

²³ Dedani, Tema, Buzi, na wandu wose wiaragha virodi;

²⁴ wazuri wose wa Arabu, na wazuri wose wa mbari ra wandu wa mranganyiko werekoghe wikikaia kireti;

²⁵ wazuri wose wa Zimri, wazuri wose wa Elamu, na wazuri wose wa Media;

²⁶ wazuri wose wa masanga gha kaskazinyi kula na kaavui; na mawuzuri ghose gha wurumwengunyi wiko ndoenyi, wose kwa kunughishirana wikakaia winyo icho kikombe. Na kutua kwa wose, mzuri wa Babuloni uchachinywa.

²⁷ BWANA ukanizera, “Zera wandu kukaia, Ini BWANA Uwadie Ndighi-Rose, uo Mlungu wa Israeli nawilaghira winyo hata wiwongie na kudaika; wigho hata wisedime kuwuka kwa wundu ghwa ugho wuda nighudumagha kwawo.

²⁸ “Wikalegha kunywa icho kikombe kufuma mkonunyi kwako kuwizere, BWANA wa majeshi waghamba huwu: ‘Suti mchinyo!

²⁹ Olenyi nazoe kazi eghunona ughu muzi ghuwangilo kwa irina japo. Mwadima kughenda msekabilo? Ndeidimikagha mghende kusekabilo, kwa kukaia nichareda wuda ghuche aighu ya wandu wose wikaiagha ndoenyi.’

³⁰ “Kwa huwo oho Jeremia, kuchawifunyira wandu awa wulodi ghwa agha malagho ghose nakughoria: ‘BWANA ucharuruma kufuma koighu, kufuma andu ukaiagha kwa wueli, uchafunya lwaka lwake; ucharuruma kwa ndighi mbaa aighu ya maranu ghake uchakema sa awo wandu wikamagha zabibu, aighu ya wandu wose wikaiagha ndoenyi.

³¹ Mrurumo ghwake ghuchafunya lwaka hata kutua kwa ndoenyi, kwa kukaia BWANA oko na mwandu aighu ya iro mbari ra wandu, uchawitanya wandu wose, na kuwibwagha wawiwi kwa lufu.’”

³² BWANA wa majeshi waghora huwu, “Ola wuwiwi ghuchaera kufuma kwa mbari hata mbari, na kiremba kibaa chichaweta kufuma kula, kufuma masanga gha kula gha ndoenyi!

³³ “Na awo wichaabwaghwa wudenyi ni BWANA ituku ijo, wichaera kula andu ndoenyi. Ndewichaalililwa, angu kutumbanywa, hata kurikwa; ela wichawuya kitungasi ndoenyi.

³⁴ “Inyo vilongozi, walisha wa wandu wapo, kemenyi kwa lwaka. Lilenyi na kukung'arisha terinyi; ngelo yameria kuvika mpate kubwaghwa, nenyo mchabarwa sa chombo chighokie.

³⁵ Walisha ndewichaapata andu kungi kokimbiria, wabaa wa icho chagha ndewichaafufunuka.

³⁶ Sikirenyi kililo cha walisha, na kukema mchungu kwa weke bwana wa icho chagha; kwa kukaia BWANA waawuyanona andu kwawo kolishira.

³⁷ Maranu gha sere ghichasaghiswa kwa wundu ghwa agho machu ghibirie gha BWANA.

³⁸ BWANA wasighie andu kwake sa shimba isighie mbanga yake, isanga jawo jawurie iduu, kwa wundu ghwa wuda ghwa mkorongi, na kwa wundu ghwa agho machu ghake ghibirie.”