JEREMIA 24 - Biblia Ilagho Jiboie Kwa Wandu Wose

Vikapu viwi va tini

¹ Nyuma ya Nebukadnezari mzuri wa Babuloni kuwidwa wunyika Jehoiakini mwana wa Jehoiakimu mzuri wa Juda, na wabaa wake, mafundi ghake ghewacha na gechana vuma, kufuma Jerusalemu, BWANA orenifunukuyeghe ngawona vikapu viwi va tini verewikiloghe imbiri ya Hekalu ya BWANA.

² Kikapu chimu cherekoghe na tini riboie nandighi, sa tini ra imbiri razoya kuwurwa, ela chija kikapu chimu cherekoghe na tini rizamie nandighi, rizamie hata isedimikagha rijike.

³ BWANA ukanizera, “Jeremia, kwawuyawona kii?” Ngatumbulia, “Naawuyawona tini riboie nandighi na tini rizamie nandighi rizamie hata isedimikagha rijike.”

⁴ Niko ilagho ja BWANA jikanichea,

⁵ “BWANA, uo Mlungu wa Israeli waghamba huwu, Nichawitala wandu wa Juda awo niwibonyere widwalo wunyika cha isanga ja Wakaldayo, kukaia waboie kara kara na iri tini riboie.

⁶ Nichakaia ngiwizighana kwa wundu ghwa mecha, nani nichawiwunja kwa iji isanga; nichawiagha hata sichaawivuchua, nichawimangisha hata sichaawiinja anduangi.

⁷ Nichawineka ngolo emanya kukaia ini ne BWANA, nawo wichawuya wandu wapo, nani nichakaia Mlungu wawo, kwa kukaia wichaniwuria kwa ngolo rawo rose.

⁸ Ela nicham'bonyera Zedekia mzuri wa Juda karakara na iri tini rizamie risedimagha kujika; chiaimweri na wabaa wake, na masighariko gha wandu wa Jerusalemu wiko iji isanga chiaimweri na awo wikaiagha isanga ja Misri.

⁹ Nichawiredia wuwiwi ghoobolwa ni mawuzuri ghose gha ndoenyi, wipate kukaia masholio, na wandu wetanilwa na kusekwa na kutumia irina jawo sa wandu wiwadilo ni njowe andu kose nichaawisasara ndoenyi.

¹⁰ Nani nichaduma wuda na njala na saka izamie wipate kubwaghwa, hata wameria kutoteshwa putu kufuma isanga ijo nerewinekieghe awo na weke ndee.”