JEREMIA 23 - Biblia Ilagho Jiboie Kwa Wandu Wose

Isuwirio kwa ngelo richagha

¹ BWANA waghamba, “Ni bugha kwa awo winonagha na kusaghisa wandu wapo.”

² BWANA uo Mlungu wa Israeli waghamba huwu aighu ya wabonyi nguma wiwilindiagha wandu wapo, “Mwasaghisire wandu wapo na kuwiwinga noko; hata ndemuwizighanire anduangi. Olenyi nichamkaba kwa wundu ghwa mabonyo ghenyu ghizamie.

³ Nani nichatumbanya masighariko gha wandu wapo kufuma masanga ghose nerewiwingieghe, na kuwiwunja andu kwawo; nawo wichava na kuchurikia.

⁴ Nichawika wabonyi nguma wazima awo wichaawibonyera nguma nicha na kuwilindia. Ndewichaaobua sena, hata ndewichaafushwa waya, angu ungi kulaghaya sena anduangi.

⁵ “Olenyi matuku ghichacha, nichawusira umu wa kivalwa cha Daudi uchaakaia mzuri wa hachi nao uchabonya nguma kwa hikima, na kubonya hachi na loli isangenyi.

⁶ Matuku ghake Juda uchakirwa, na Israeli uchakaia banana; nao uchawangwa kwa irina iji, ‘BWANA nuo hachi yedu.’

⁷ “Olenyi matuku ghichacha, wandu wisechaaghema sena, ‘Sa iji BWANA uko moyo, uo orewijosereghe wandu wa Israeli kufuma isanga ja Misri,’

⁸ ela wichaghema, ‘Sa iji BWANA uko moyo, uo orewilongozereghe na kulongoza kivalwa cha nyumba ya Israeli kufuma isanga ja kaskazinyi, na kufuma masanga ghose orewiwingieghe;’ nawo wichakaia isangenyi jawo jeni.”

Machilo gha Jeremia aighu ya Walodi

⁹ Nafwa ngolo andenyi kwapo, maindi ghapo ghose ghaawuyasughusika; nakaia sa mmbongeri wasirwa ndighi ni chofi kwa wundu ghwa BWANA na kwa wundu ghwa malagho ghake ghielie.

¹⁰ Isanga jeechulwa ni wandu wisowie wuloli na BWANA; kwa wundu ghwa iyo njowe, isanga jaawuyalila, na malisho gha kireti gheeoma. Mighendo yawo ni ya wuwiwi, na wudimi ghwawo si ghwa hachi anduangi.

¹¹ BWANA waghamba, “Mlodi na mkohani, wose ndewiwadie Mlungu, nawona wuwiwi ghwawo hata andenyi ya Hekalu yapo.

¹² Chia rawo richawuya redendeluka a kirenyi, andenyi ya iro chia, wichawingwa na kughwa; kwa kukaia nichareda wuwiwi aighu kwawo, andenyi ya ugho mwaka ghwa kukabwa kwawo.

¹³ Nawonie ilagho jizamie na ndighi, kwa walodi wa Samaria; walodere kwa irina ja Baali, na kuwilaghasha wandu wapo Israeli.

¹⁴ Ela kwa walodi wa Jerusalemu, nawonie ilagho jizamie kuchumba; awo waawuyalaka na kughora tee. Wabonyi kiwiwi waawuyawifungisha ndighi, hata mndungi ndewueghaluka usighe wuwiwi ghwake anduangi; wose weewuya kwapo sa Sodoma, na wandu wikaiagha andenyi yaro sa Gomora.”

¹⁵ Kwa huwo, BWANA wa majeshi waghora huwu aighu ya walodi wa Jerusalemu, “Olenyi nichawijisha vindo viwawie, na kuwinyosha machi ghibirie; kwa kukaia wamerie kueresha kuja kuleghamuobua Mlungu isangenyi jose.”

¹⁶ BWANA wa majeshi waghora huwu, “Msesikire malagho gha walodi wimloderagha wikimneka isuwirio ja tee; waawuyaghora malagho gha akili rawo reni, ndeghifumie momunyi kwapo anduangi.

¹⁷ Matuku ghose waawuyawizera awo wimenyagha ilagho japo, ‘Mkaia nicha to;’ na kwa awo wighendagha kwa kunugha kukua kwa ngolo rawo, wadawizera, ‘Ndemchelwagha ni wuwiwi ghungi.’”

¹⁸ Ela nani ungi wawo ukaie andenyi ya njama ra BWANA, kujizighana na kujisikira ilagho jake, angu nani wawo ujisikirie ilagho jake na kujiwadia?

¹⁹ Ola machu gha BWANA ghafuma sa kiremba ghawichea awo wawiwi sa kikulughulu.

²⁰ Machu gha BWANA ndeghichaawuya nyuma, hata ghakatisha makusudio ghake, sa iji koni waghesha kubonya. Malagho agha ghichamtambukia nicha ngelo richagha.

²¹ BWANA waghamba, “Ini siwidumie awa walodi, ela wikaghenda; sighorie nawo, ela sena wikafunya wulodi.

²² Ngera loli wedeeka andenyi ya njama rapo, kumangu waghorie wandu wapo ilagho japo, na kumangu wandu wapo waghalukie na kusigha chia rawo mbiwi, na mabonyo ghawo ghizamie.

²³ “Welee, huwo neeka Mlungu wa kaavui niseko Mlungu wa kula wori?

²⁴ Mundu wadima kukuvisa andu kwake kwa kiviso nisemmbone? Waghamba BWANA. Welee, si ini nichurie mlungunyi na ndoenyi?

²⁵ Namerie kusikira malagho gha walodi wifunyagha wulodi ghwa tee kwa irina japo wikighamba, ‘Nalodere ndodo! Nalodere ndodo!’

²⁶ Wele iri tee ridua ngolonyi kwa awa walodi wifunyagha wulodi ghwa tee hata lii, wikikalilwa ni ngolo rawo reni?

²⁷ Waghesha kuwibonya wandu wapo winiliwe kwa iro ndodo rawo wighorianagha weni na weni, sa iji koni weke ndee wereniliwieghe wikatasa Baali.

²⁸ Uo mlodi uko na ndodo yake, ndeghore ndodo yake; na uo mlodi uko na ilagho japo, ndeghore ilagho japo kwa wuloli. Kwani mafozi ni kilamboki kwa ngano.

²⁹ Welee, ilagho japo ndejeeka sa modo, ndejeeka sa nyondo ibaraa-bara igho?

³⁰ Ini sikwanye na awo walodi wiiwianagha malagho ghapo weni na weni.

³¹ Olenyi sikwanye na awo walodi, waghamba BWANA, awo witumiagha chumi rawo wikighamba, ‘BWANA waghamba,’

³² Olenyi sikwanye na awo walodi wighoragha tee kwa ndodo rawo, wighoragha na kuwilaghasha wandu wapo kwa tee rawo ra duu, ingelo nisewidumie, hata kuwilaghira; nawo ndewichaawifwana wandu awa hata kutini,” waghamba BWANA.

Msigo ghwa BWANA

³³ BWANA waghamba, “Mndungi wa awa wandu angu mlodi, angu mkohani ukakukotia, ‘Msigo ghwa BWANA niki?’ Kuchamtumbulia, ‘Ni inyo mmbeni msigo, nani nichamkumba noko.’

³⁴ Kwa wundu ghwa malagho gha mlodi, angu mkohani, angu umu wa awa wandu ughoragha ‘Msigo ghwa BWANA,’ nichamkaba uo mundu na nyumba yake.

³⁵ Mchazerana huwu kula mundu na mmbao, na kula mundu na mruna, ‘BWANA watumbulia wada?’ Angu, ‘BWANA waghora wada?’

³⁶ Ela msigo ghwa BWANA ndemchaaghughora sena anduangi; angu kula ilagho ja mundu nijo jeni msigo ghwake; na inyo mwamerie kughinona malagho gha Mlungu uko moyo, uo BWANA wa majeshi, Mlungu odu.

³⁷ Niko huwo kuchamzera uo mlodi, ‘BWANA wakutumbulia wada?’ Angu ‘BWANA waghora wada?’

³⁸ Ela mkaghamba, ‘Msigo ghwa BWANA,’ BWANA waghamba huwu, ‘Kwa kukaia mwaghamba agha malagho, “Msigo ghwa BWANA,” nani nadumie ngamzera, “Mseghore, ‘Msigo ghwa BWANA,’

³⁹ kwa wundu ugho nichamshoa na kumkumba noko nisemmboneghe, chiaimweri na ughu muzi neremnekieghe na weke ndeyo.

⁴⁰ Nani nichamredia aighu konyu masholio ghedua na waya ghwa ngelo rose ghusechaaliwika.”