JEREMIA 18 - Biblia Ilagho Jiboie Kwa Wandu Wose

Jeremia nyumbenyi kwa Mvimbi

¹ BWANA oreghorieghe nani ukighamba,

² “Ghenda nyumbenyi kwa mvimbi, nani nichakughoria malagho aho.”

³ Niko ngasea cha nyumbenyi kwa mvimbi, ngammbona ukibonya kazi na igurudumu jake.

⁴ Na iji kilambo chingi cha wongo chazama mkonunyi kwake ngelo ukichibonya, ukachighalusa na kubonya kilambo kizima, seji orewonieghe nicha moni.

⁵ Niko BWANA ukanizera,

⁶ “Welee, sidimagha kubonya konyu ee wandu wa Israeli, seji u mvimbi wabonya? Inyo mooka mkonunyi kwapo kara kara na wongo mkonunyi kwa mvimbi.

⁷ Ngelo iyo yose ngaghamba mbari ya wandu, angu wuzuri ghuinjike, ghuchikanyo na kunonwa,

⁸ nao iyo mbari ihee wuwiwi ghwake, nanimoni nichaghaluka nisighe kureda wuwiwi ugho nikoghe niiredie.

⁹ Na ngelo iyo yose ngaghamba nichawusira mbari ya wandu na kuagha ugho wuzuri,

¹⁰ nao ibonye wuwiwi mesonyi kwapo, na kuleghasikira, nichaghaluka nisighe kuibonyera agho mecha nikoghe niibonyere.

¹¹ Idana kuwizere wandu wa Juda na wandu wa Jerusalemu, ‘BWANA waghora huwu: Ola nam'bonyera mpango ghom'bonya kiwiwi. Kula umu onyu ndewuye urisighe chia rake mbiwi, boisenyi mighendo yenyu na mabonyo ghenyu.’

¹² Ela awo wadaghamba, ‘Agho ni gha duu! Isi dichanugha mipango yedu, na kula umu odu uchanugha kuja kukua kwa ngolo yake mbiwi.’”

Wandu kumlegha BWANA

¹³ BWANA waghamba, “Kotienyi mbari rose ra wandu ngera mndungi wasikire ilagho sa ijo; Wandu wa Israeli wabonyere ilagho jizamie nandighi.

¹⁴ Welee, theluji yalekagha kudika kufuma koighu ighonyi ja mghondi ghwa Lebanoni?

¹⁵ Ela wandu wapo awo wanisighie, wadafukiria milungu ya tee marumba; Wamerie kukuwa kwa chia rawo, iro chia rawo ra kala; nawo wanughie chia zima riseboisiro.

¹⁶ Wamerie kubonya isanga jawo jishinikilo, kilambo chesholelwa ngelo rose. Wandu wichaaida aho wichazighana na kushinika, nawo wichasughusa vongo vawo.

¹⁷ Nichawisaghisa imbiri ya wamaiza wawo, seji mbeo ifumagha mashariki idukagha vilambo; nichawiwikia mghongo, sichaawizighana ingelo ya wasi ghwawo anduangi.”

Njama mbiwi aighu ya Jeremia

¹⁸ Niko awo wandu wikaghamba, “Choonyi dibonye njama aighu ya Jeremia, kwa kukaia na jingi sharia ndeichakaia isefunywaghwa ni wakohani, na njama nderichakaia risefumagha kwa wandu wa akili, na ilagho ja Mlungu ndejichaalekwa kughorwa ni walodi. Choonyi dimghorie malagho ghemsima, disewuesikiria malagho ghangi ghake.”

¹⁹ Niko ngamlomba BWANA, “Ee BWANA, kunisikire; sikira seji wamaiza wapo wighoragha.

²⁰ Welee, wuwiwi ghwalipwagha kwa wundu ghwa wucha? Sena hata hoku wanikotera kina winikumbe andenyi. Kumbuka seji nerechieghe kwako ngiwilombia, eri kusighe kukaia na machu nawo.

²¹ Kwa huwo idana ee BWANA kuwiredie wana wawo njala, na kuwifunya wibwagho kwa lufu. Waka wawo ndewisowekelo ni wana wawo na womi wawo; womi wawo ndewibwagho ni makongo, na wandu wawo wa irika wibwagho wudenyi.

²² Kuwiredie wandu wewibwagha wisemanyire, kililo chipate kusikirika nyumbenyi rawo; kwa kukaia wakotere kina chenikumba andenyi, nawo waboisire shaghala kivisonyi rewada maghu ghapo.

²³ Njama rawo renibwagha kwariichi putu ee BWANA; kusakewilekia kiwiwi chawo, hata kusakeivuta kaung'a yawo mesonyi kwako. Kuwichee ngelo ya machu ghako, kuwikumbe noko wifume kwako.”