JEREMIA 15 - Biblia Ilagho Jiboie Kwa Wandu Wose

Bugha kwa wandu wa Juda

¹ Niko BWANA ukanizera, “Hata ngera Musa na Samueli wadakaia kimusi aho, ngolo yapo ndayadimagha kuwighalukia wandu awa. Wifunye noko nisewiwone!

² Nawo wikakukotia, ‘Welee, dighende hao?’ Kuchawitumbulia, ‘BWANA naghamba huwu: “Wandu webwaghwa ni saka izamie, wichafwa kwa saka izamie, na awo webwaghwa wudenyi, wichafwa wudenyi, na awo webwaghwa ni njala, wichabwaghwa ni njala, na awo webarishwa, wichabarishwa.” ’

³ “Nichawiwikia watoteshi wa mbari inya, lufu lobwagha, koshi rerashua, nyonyi ra mbeonyi na nyamandu ra isakenyi reja na kunona.

⁴ Nani nichawibonya wishinikilo ni mawuzuri ghose gha ndoenyi kwa wundu ghwa agho ghibonyero aho Jerusalemu ni Manase mwana wa Hezekia, mzuri wa Juda.

⁵ “Nani uchaakuwonia wughoma ee Jerusalemu, angu nani uchaakulilia? Nani uchaadunga maghu kukotia maza rako?

⁶ Oho kwanileghie, na oho kwachurie kuwuya nyuma; niko ngaghughorua mkonu ghwapo kukukaba na kukutotesha; nasilwa ni ndighi rekurumaghia.

⁷ Nameria kuwiela na lungo, mbengenyi ra isanga; nabwaghie wana wawo, na kuwitotesha wandu wapo, kwa kukaia ndeweresighieghe chia rawo mbiwi.

⁸ Nachurie mtalo ghwa waka wawo wifuilo ni womi, wikakaia wengi kuchumba msangagha ghwa baharinyi. Nawiredia weke mao wasi kwa wundu ghwa wana wawo, kwa kuwiredia mtoteshi ngelo ya dimeghadi; Nabonyere kuwawa na wowa ghuwichee ghafla.

⁹ Muka orevaeghe wana mfungade uchasilwa ni ngolo na kudumbuka; uchaserelwa ni kira nadime; wafushwa waya na kusowelwa ishima. Awo wisigharikie wichabwaghwa wudenyi, na kughwa imbiri ya wamaiza wawo,” waghamba BWANA.

Jeremia kulalamika kwa BWANA

¹⁰ Ni bugha kwapo mao, angu korenivaeghe nikaie mundu odeda na kubonya nganyi isanga jose. Sikopeshere hata sikopie kilambo chingi kwa mndungi; ela sena wandu wose weenisua.

¹¹ BWANA ukaghamba, “Kwa loli nichakukira kwa wundu ghwa wucha, kwa loli nichawibonya wamaiza wako wikuvoye ngelo ya wasi.

¹² Welee, mndungi wadima kuchikanya chuma, ee chuma chifumagha kaskazinyi na shaba?

¹³ Wuzuri ghwako ghwa mali na mashamo ghako nichaghineka ghidwalo wunyika duu, kwa wundu ghwa kaung'a rako richue isangenyi.

¹⁴ Nichakubonya kuwidumikie wamaiza wako isanga kusejiichi, angu kwa machu ghapo, modo ghwakorelo ghuchaadua ghukiaka matuku ghose.”

¹⁵ Niko ngatumbulia, “Oho kwamanya ee BWANA; kunikumbuke na kunilindia. Kulipe kisasi aighu ya watiriri wapo. Kwa wundu ghwa uko kurumaghia kwako kusakenida kula; kumanye naawuyasholelwa kwa wundu ghwako.

¹⁶ Nereghiwonieghe malagho ghako ngaghija, ghikawuya iseko na kuboilwa ngolonyi kwapo; angu niwangilo kwa irina jako ee BWANA Mlungu wa majeshi.

¹⁷ Sereserieghe kidombo aghadi ya wandu weja maseko, hata jingi sereboiloghe chiaimweri nawo; nereserieghe kidombo niekeri, angu mkonu ghwako ghorenimazireghe, nani ngachulwa ni machu.

¹⁸ Kwaki luwawo lwapo lusesiagha na chonda chapo chiseboagha? Welee, kuchawuya sa kamoda ka tee kwapo, kara kara na machi ghiomagha?”

¹⁹ BWANA waghora huwu, “Kukahea nichakuwunja kupate kunidumikia. Kukadeda malagho mecha wulalo ghwa agho ghisena fwaida, kuchawuya mundu ojigora ilagho japo; wandu wichakunugha oho, hata ndekuchaawinugha awo anduangi.

²⁰ Nichakubonya kukaie sa wurigha ghwa ngome ghwa shaba kwa wandu awa; wichalwa na oho, nawo ndewichaakusima, kwa kukaia ini neko chiaimweri na oho nipate kukukira na kukuvuvua.

²¹ Nichakukira kufuma mikonunyi ya wandu wawiwi, na kukukombua kufuma kwa wakorongi.”