JEREMIA 1 - Biblia Ilagho Jiboie Kwa Wandu Wose

Jeremia

¹ Agha ni malagho gha Jeremia mwana wa Hilkia, umu wa wakohani werekoghe muzi ghwa Anathothi ghuko andenyi ya isanga ja Benjamini.

² BWANA oreghorieghe na Jeremia mwaka ghwa ikumi na idadu ghwa kubonya nguma kwake Josia mwana wa Amoni, mzuri wa Juda.

³ Sena ukaghora nao matuku gha Jehoiakimu mwana wa Josia, mzuri wa Juda; na hata kutua kwa mwaka ghwa ikumi na imweri ghwa Zedekia, mwana wa Josia mzuri wa Juda, hata ngelo ya wandu wa Jerusalemu kudwalwa wunyika mori ghwa kasanu.

Kuwangwa kwa Jeremia

⁴ BWANA ukaghora nani ukinizera,

⁵ “Nerekumanyireghe imbiri nisekuumbie kifunyi, na imbiri kusevalo, nerekusaghueghe; nerekuwikieghe kukaie mlodi wa iro mbari ra wandu.”

⁶ Niko ngaghamba “Ai, Bwana MLUNGU! Ola ini siichi kudeda, kwa kukaia ne mwana tu!”

⁷ Ela BWANA ukanizera, “Kuseghambe, ‘Ini ne mwana tu;’ kwa kukaia kuchaghenda kwa awo wandu weni nichaakuduma kwawo; na ijo jose nichaakulaghira, nijo jeni kuchaajideda.

⁸ Kusakeobua wandu, angu ini neko andwamweri na oho kukukira.”

⁹ Nao BWANA ukaghorua mkonu ghwake, ukaadada momu ghwapo. Ukanizera, “Ola nangira malagho ghapo momunyi kwako.

¹⁰ Wona, idime nakuneka nguma aighu ya mbari ra wandu na aighu ya mawuzuri, kukuo na kuchikanya; kunone na kukumba noko, kuaghe na kuwa.”

Mawono awi

¹¹ Niko BWANA ukaghora nani ukinizera, “Jeremia, niki kwawuyachiwona?” Nani ngaghamba, “Naawuyawona lumbashu lwa mlozi.”

¹² Niko BWANA ukanizera, “Kwawona kara kara, kwa kukaia naawuyajizighana ilagho japo nipate kujikatisha.”

¹³ BWANA ukaghora nani sena indo ja kawi ukinizera, “Kwawuyawona kii?” Nani ngaghamba, “Naawuyawona nyungu idoghodagha cha kaskazinyi.”

¹⁴ BWANA ukanizera, “Wuwiwi ghuchacha kufuma kaskazinyi kwa wandu wose wikaiagha iji isanga.

¹⁵ Olenyi nichariwanga mbari ra mawuzuri gha kaskazinyi, nawo wichacha, na kula umu wawo uchawika kifumbi chake cha nguma aho andu kongiria kwa mbenge ya Jerusalemu, wikibonya wuda na kughumara wurigha ghwaro, wikilwa na mizi yose ya Juda.

¹⁶ Nani nichareda kutanya kwapo aighu ya wandu wapo, kwa wundu ghwa ugho wawiwi ghwawo ghose ghonilegha ini, na kufukiria milungu mizima marumba na kwa wundu ghwa kutasa kazi ra mikonu yawo cheni.

¹⁷ Ela oho, wuka kukuwike tayari kuwighorie agho malagho ghose nakulaghira. Kusakewifwa waya, nichekufwa waya imbiri kwawo.

¹⁸ Ola idime nakubonya oho kukaie sa muzi ghuwadie ngome; sa nguro ya chuma na sa wurigha ghwa shaba. Isanga jose jichakutangala, na wazuri wa Juda, na wabaa wake, na wakohani wake, na wandu wose wa iji isanga.

¹⁹ Wichalwa na oho, ela ndewichaakusima, kwa kukaia ini neko chiaimweri na oho nipate kukukira.”