JAKOBO 1 - Biblia Ilagho Jiboie Kwa Wandu Wose

¹ Ini Jakobo mdumiki wa Mlungu, na wa Bwana Jesu Kristo, namuandikia inyo mbari ikumi na iwi risaghisikie wurumwengunyi. Namroghua.

Irumirio na Hikima

² Wanidu, mkapatwa ni matimo mazima-mazima, mughitale kukaia ni kuboilwa konyu,

³ angu mwamanya kutimwa kwa irumirio jenyu kuareda kumanga.

⁴ Na uko kumanga kukaie kukate, nenyo mpate kukaia mkate putu, msesowagha kindo chingi.

⁵ Ela ngera mndungi onyu wasowa hikima, ndelombe kwa Mlungu, uhu unekagha wandu kwa wungi, kuseko na kubukia; nao uchanekwa.

⁶ Ela ndelombe kwa irumirio, kuseko na ngera ingi, angu uo uko na ngera wafwanana na mivo-mivo ya bahari ighenjwagha na kukumbwa-kumbwa ni mbeo.

⁷ Mundu uo usegheshe wei upata kindo chingi kufuma kwa Bwana;

⁸ angu mundu wa nia iwi, ndemangagha kwa chia rake rose.

Wukiwa na wungi ghwa mali

⁹ Uo mwanidu wa ndonyi, ndekukase kwa kujoswa kwake,

¹⁰ na uo uko na mali, ndekukase kwa kuserwa kwake; angu uchaida sa mboi ya nyasi.

¹¹ Angu iruwa jabuka, na mruke ghwaro ghubirie, nagho ghwanyarisha nyasi; mboi yaro yapotoka, na kughoka kwaro kwalaghaya. Huwo koni mundu wa mali nyingi uchalaghaya aghadi ya mighendo yake.

Matimo

¹² Mundu urumaghiagha matimo, ucharasimilwa; angu iji wasima ijo itimo, uchapata kirumbu cha irangi, icho Mlungu uwilaghirie awo wose wimkundagha.

¹³ Mndungi ukakatimwa useghambe, “Naatimwa ni Mlungu;” angu Mlungu ndedimagha kutimwa ni mawiwi, hata nao ndemtimagha mndungi anduangi;

¹⁴ kwa kukaia, kula mundu wadatimwa iji wakalilwa na kurudwa ni bea rake moni.

¹⁵ Iji bea yapata kifu, yadava kaung'a; na kaung'a ikazoghua putu, yadareda kifwa.

¹⁶ Msakekalilwa wanidu nimkunde.

¹⁷ Kula kuneka kuboie, na kula inosi jikatie, jadafuma aighu, jikisea kufuma kwa uja Aba wa miengere. Uo ndeughalukagha, hata kukaia na kiju cheghaluka anduangi.

¹⁸ Kwa kukunda kwake moni, oredivaeghe kwa ilagho ja loli, dipate kukaia mavalo gha imbiri gha maumbo ghake.

Kusikira na kubonya

¹⁹ Manyenyi ilagho iji wanidu nimkunde: kula mundu ndekaie uangue kwa kusikira, ela ukaie wa mboa kwa kudeda, na wa mboa kwa kujokwa ni machu;

²⁰ angu machu gha mdamu ndeghibonyagha hachi ya Mlungu anduangi.

²¹ Kwa huwu injenyi na mbai wuchafu ghose na wuwiwi ghwa kula mbari, nenyo mjiwuse ilagho jiwalo andenyi konyu kwa wumboa, ijo jidimagha kukira roho renyu.

²² Ela mkaie wabonyi wa ijo ilagho, msakekaia wasikiri waduu mkikukalia mmbeni.

²³ Angu mndungi ukakaia msikiri usebonyagha ijo ilagho, wafwanana na mundu ukuzighanagha wushu ghwake na kilole.

²⁴ Wakuzighana moni, na kughenda noko, nao shwa wori waliwa seji ukoghe.

²⁵ Ela uo uizighanagha sharia ikatie, iyo iwikagha wandu huru, nao urumaghie, ukisikira useliwagha, ela wakaia m'bonyi ukatishagha, mundu uo ucharasimilwa kwa agho ubonyagha.

²⁶ Ngera mndungi wakuwona moni kukaia wa dini, nao ndelumaziriagha lumi lwake, dini yake ni ya duu; nao waawuyakukalia moni.

²⁷ Dini ielie isewadie wuchafu imbiri ya Mlungu Aba, ni ihi: ni kuwighendia na kuwitesia wana wakiwa, na waka wifuilo ni womi wawo kwa wasi ghwawo, na kukulindia moni uselusho ni wurumwengu.