ISAYA 9 - Biblia Ilagho Jiboie Kwa Wandu Wose

Mwana kuvalwa kwa wundu ghodu

¹ Ndekuchaakaia na chia ingi kwawo efufunuka iyo ngelo ya wasi.

Mzuri uchagha

² Isanga ja kichuku cha Zebluni na Naftali weresumbukieghe ngelo rimu, ela ngelo ra kutua ra isanga iji jichakaia ja ishima kufuma mashariki ya Mediterania hata isanga jiko kimonu cha Jordani, hata Galilaya ya mbari zima.

³ Oho kwamerie kuichuria iyo mbari ya wandu, na kuchuria kuboilwa kwawo, wawuyaboilwa imbiri kwako seji wakuwidi viro wiboilwagha; seji wandu wiboilwagha wikiwagha vilambo viwadilo wunyika.

⁴ Kwa kukaia kwaichikanyire ghongolo erewilemerieghe, na ghuja mzata ghorewikabagha maongenyi; ugho mzata ghwa mkorongi, kwaghuchikanyire seji koresimieghe majeshi gha Midiani.

⁵ Kula chadu cha mundu wa wuda, na kula nguwo iwadie bagha, ichakorwa sa mbande.

⁶ Angu damerie kuvailwa mwana, danekelo mwana wa womi; nao uchadibonyera nguma, na irina jake uchawangwa, “Mnjama wa mashiniko,” “Mlungu Uwadie Ndighi,” “Aba wa kala na kala,” “M'baa wa sere.”

⁷ Kubonya nguma kwake kwa sere ndekuchaakaia na kutua kungi; Uchaseria kifumbi cha nguma cha ndee Daudi, ukighumangisha wuzuri ghwake kwa hachi na loli; kufuma idana hata kwa kala na kala. BWANA wa majeshi nuo uchaabonya agha.

BWANA kuineka Israeli ikabo

⁸ BWANA wareda ilagho ja kutanya aighu ya wuzuri ghwa Israeli, icho kivalwa cha Jakobo.

⁹ Wandu wose wa Israeli, na awo wikaiagha andenyi ya muzi ghwa Samaria wichajimanya ilagho ijo; awo wose wikukasagha kwa lung'eto lwa ngolonyi; wikighamba,

¹⁰ “Maaghi gha matofali ghawudukie, ela dichaghiagha kwa magho ghiwachilo; mbau ra mudi ghwa muku rachikie, ela dichatumia mbau ra mudi ghwa sida.”

¹¹ Kwa huwo BWANA wawusira wamaiza aighu yawo, wipate kuwikaba.

¹² Wasiria wacha kufuma mashariki, na Wafilisti kufuma magharibi, nawo watambarua memu yawo wipate kummila Israeli. Hata huwo saki, machu gha BWANA ndeghisirie ela mkonu ghwake ghokaba ghoko ghughorokie hata idana.

¹³ Hata ngera BWANA wa majeshi wawikabie, ela wandu wa Israeli ndewiherie wikaghaluka na kumlola BWANA anduangi.

¹⁴ Kwa huwo BWANA wadumbua chongo na mkomba kufuma kwa Israeli, na lumbashu lwa mtende na maria kwa ituku jimweri.

¹⁵ Mghosi unekelo ishima nuo chongo, na mlodi ulodagha malagho gha tee nuo mkomba.

¹⁶ Awa wawuyawilongoza awandu, waawuyawilaghasha chia; na awo wilongozwagha, waawuyatota.

¹⁷ Kwa huwu, BWANA ndewueboilwanya na ungi wa wandu wawo wa irika, hata ndena wughoma kwa wana wisena weke ndee na waka wakiwa; kwa kukaia kula umu ndena Mlungu, nao ni m'bonyi kiwiwi, na kula ilagho widedagha ni wuwiwi mduu. Hata huwo saki, machu gha BWANA ndeghisirie, mkonu ghwake ghokaba ghoko ghughorokie hata idana.

¹⁸ Wuwiwi ghwa wandu ghuakora sa modo ghukoragha visachi va minjwa ghuakagha sa modo ghwa msidunyi, ghujosagha mosi sa ikungughu.

¹⁹ BWANA wajikora isanga kwa wundu ghwa machu ghake, na wandu wakaia sa mbande, hata ndekuwadie mndungi ummboniagha mruna wughoma anduangi.

²⁰ Wandu wakukwanyira vindo andu kose isangenyi, na kuja icho chose wichiwonagha, ela wasigharika wiko njala wokoni; hata wiaja wana wawo weni.

²¹ Manase na Efraimu wialwa weni na weni, na ii chia wiabonya wuda na Juda. Hata huwo saki machu gha BWANA ndeghisirie, ela mkonu ghwake ghokaba ghoko ghughorokie hata idana.