ISAYA 8 - Biblia Ilagho Jiboie Kwa Wandu Wose

Mwana wa Isaya kukaia alama kwa wandu

¹ Niko BWANA ukanizera, “Wada m'bau m'baa, kuandike aighu yaro mbari mbaa reshomeka nicha, ‘Ni ya Maher-shalal-hash-bazi.’”

² Kupate washahidi wawi wa loli, mkohani Uria, na Zekaria mwana wa Jeberekia kwa wundu ghwapo washahidi wapo.

³ Niko ngamghendia uja mlodi wa waka mkwapo, nao ukapata kifu, ukava mwana wa womi. BWANA ukanizera, “Mmbange, ‘Maher-shalal-hash-bazi;’

⁴ kwa kukaia, imbiri mwana uhu usemanyire kuwanga ‘Aba’ angu ‘Mao,’ mali ra Dameshki na vilambo viwadilo wunyika va Samaria vichadukwa ni mzuri wa Ashuru.”

Kucha Kwa mzuri wa Waashuru

⁵ BWANA ukaghora nani sena ukighamba,

⁶ “Kwa kukaia wandu awa waleghie machi gha Shiloa ghiseagha mboa, na wulalo ghwaro wiasughusikia Mzuri Resini na Mzuri Peka mwana wa Remalia,

⁷ ola, nichawiredia mzuri wa Ashuru na wubaa ghwake ghose, upate kuwuka aighu ya wandu wa Juda, kara kara na moda ghwa Eufrate ingelo ghuchuagha machi na kudika-dika.

⁸ Nawo wichangia na kuwiinja wandu wa Juda, seji machi ghichuagha na kudika-dika ii chia na ii chia, ghikidwa vilambo vose.” Mlungu oko andwamweri nesi.

⁹ Kabenyi tarumbeta ya wuda inyo mbari ra wandu, mmbonefushwa waya; deghenyi madu masanga gha kula; kaienyi tayari kwa wuda, mmbonefushwa waya.

¹⁰ Bonyenyi njama renyu, ela nderichaafwana anduangi. Ghorenyi agho ghose mkunde, ela ndeghichaakatia anduangi; kwa kukaia Mlungu oko andwamweri nesi.

BWANA kumuonya mlodi

¹¹ BWANA waghorie kwa ndighi mbaa ukinikania nisenughe mighendo ya awa wandu ukighamba,

¹² “Kusengie njama ra awa wandu; kuseobuo maza wawuyariobua, hata kusekaie na kiture chingi.

¹³ Ela kunitale ini moni BWANA wa majeshi kukaia Mweli, na kuniobua ini moni, ini nikaie kuobua kwako.

¹⁴ Ini moni kwa wundu ghwa wueli ghwake, nichakaia igho ja makuwisho, na lwala lokuwisha kwa wuzuri ghwa Juda na Israeli; nani nichakaia mdegho na shaghala kwa awo wose wikaiagha Jerusalemu.

¹⁵ Wengi wichakuwa kwa ijo igho, wichaghwa na kuchika-chika, nawo wichawadwa na kudwalwa.”

Maonyo aighu ya kulola njama kwa Wafu

¹⁶ Kughufunge ugho wushuhuda na kuikaba muhuri sharia aghadi ya wanughi wapo.

¹⁷ Nichammbeseria BWANA, uo wawuyakuvisa usewono ni kivalwa cha Jakobo, nani nichamsuwiria uo.

¹⁸ Neko aha chiaimweri na awo wana ninekelo ni BWANA, na BWANA wa majeshi, uo ukaiagha Mghondi ghwa Sioni, wadiwikie dikaie washahidi na fwana kwa wandu wa Israeli.

¹⁹ Wandu wikamzera, “Lolenyi njama kwa walaghui na wasawi; awo wihohoriagha na kudeda sa nyonyi;” huwo ndeiwifwane wandu wilole njama kwa Mlungu wawo? Welee, ni hachi wandu kulola njama kwa wafu wulalo ghwa awo wiko moyo?

²⁰ Mchawitumbulia, “Sikirenyi mafundisho na wushuhuda ghwa BWANA, msewisikire awa wandu, kwa kukaia malagho wighoragha ndeghine mwengere.”

Ngelo ya wasi

²¹ Wandu wichamara-mara isangenyi wiko na wasi na njala, nawo wichachulwa ni machu kwa wundu ghwa njala hata widime wamsholia mzuri na Mlungu wawo, wikighaluka na kuzighana nokoighu.

²² Sena wichazighana andoenyi, nawo ndewichaawona kindo chingi ela bugha na wasi ghobwagha ngolo; nawo wichakumbwa andenyi ya kira kibaa.