ISAYA 63 - Biblia Ilagho Jiboie Kwa Wandu Wose

Wusimi ghwa BWANA kwa iro mbari ra wandu

¹ Nani uhu ufumagha Bosra muzi ghwa Edomu uko na nguwo ritinikie righokie ra wubaa, sena uwadiagha kwa wubaa ghwa ndighi rake? “Ni ini BWANA niereshagha hachi yapo, niko na ndighi rekira.”

² Kwaki nguwo rako ritinikie huwu, na marwao ghifwanane na gha mundu ukamagha zabibu?

³ “BWANA watumbulia, Narifashire iro mbari ra wandu sa zabibu, hata ndekuwadie mndungi wandunyi orekwanyeghe nani anduangi; narifashire kwa machu ghapo ee, kwa lubio lwapo ngarifasha-fasha; bagha yawo ikatarikia marwao ghapo, nani ngarilusha nguwo rapo putu.

⁴ Kwa kukaia ituku ja kuluya lugho jerekoghe ngolonyi kwapo, na mwaka ghwa kuwikombua wandu wapo ghwameria kuvika.

⁵ Nerezighanireghe ngilola, ela serewonieghe mndungi onitesia, ngangilwa ni kiture, ela ndekorekoghe na mndungi oniwadia mkonu; niko huwo lubio lwapo lukaniwusira, ngakupatira wusimi kwa mkonu ghwapo ghoni.

⁶ Nerewifashireghe awo wandu kwa machu ghapo, ngawibara-bara kwa ulo lubio lwapo; ngaidia bagha yawo andoenyi.”

Wucha ghwa BWANA kwa Israeli

⁷ Nichalughora ulo lukundo lukatie lwa BWANA, na kumkasa BWANA kwa maza rose oredibonyereghe, na wucha ghose ughubonyere kwa nyumba ya Israeli kwa wughoma ghwake, karakara na ugho wungi ghwa lukundo lwake lukatie.

⁸ Mlungu oreghambieghe, “Kwa loli awa ni wandu wapo, wana wisedimagha kughora tee;” nao ukawuya Mkiri wawo.

⁹ Kwa matiriro ghawo ghose, uo moni oretiriroghe, na malaika uo orekirieghe imbiri kwake ukawikira. Kwa lukundo na wughoma ghwake orewikombueghe ukawidwa na kuwighenja matuku ghose gha kala.

¹⁰ Ela weremleghieghe wikamvavira Roho Mweli, nao moni ukaghaluka kukaia m'maiza wawo, ukawoka kulwa nawo.

¹¹ Niko wikakumbuka matuku gha kala gha Musa mdumiki wa Mlungu, wikakotia, “Oko hao uo BWANA orewijosereghe vilongozi kufuma baharinyi? Oko hao uo BWANA orewinekieghe awo wandu Roho wake Mweli?

¹² Uo kwa wubaa ghwake oremmbwadieghe Musa mkonu ghwa kiwomi, ukawagha machi na kumuisa; eri upate kuwika irina jake kwa kala na kala;

¹³ uo orewilongozereghe na kuwiisa andu kumilie? Wereidieghe kireti sa farasi hata wisekuwe.”

¹⁴ Sa ng'ombe riseagha cha ivongonyi; ni huwo koni Roho wa BWANA orewinekieghe kuhora. Kwa huwo, oho kukawilongoza wandu wako, eri kukupatire kumoni irina ibaa jichumbie.

Ilombi jelomba wughoma na wutesia

¹⁵ Kudizighane kufuma mlungunyi kwako ee BWANA, kufuma agho malalo ghako ghielie gha wubaa. Ugho wuing'oni na kudima kwako koko hao? Ghuao ugho wughoma na lukundo lwako kudikunde nalo?

¹⁶ Angu oho koko Aba odu, hata ngera weke wawa wedu Abrahamu na Jakobo ndewidimanyagha; ela oho BWANA koko Aba odu na Mkomboli odu kufuma agho matuku gha kala; niko irina jako jerekoghe huwo.

¹⁷ Ee BWANA, kwaki kudisighaa dilaghalo ni chia rako? Kwaki kwarikurisha ngolo redu hata disedime kukuobua? Wuya kwa wundu ghwa wadumiki wako, ee, awo wandu wiko ifwa jako.

¹⁸ Wandu wako wielie werekaieghe na Andu Kwako kwa Wueli kwa ngelo vui, na wamaiza wedu wikakufasha na kukunona.

¹⁹ Dakaia sa wandu jingi diserekoghe aisi ya nguma rako, dakaia sa wandu jingi disewangilo wandu wako.