ISAYA 60 - Biblia Ilagho Jiboie Kwa Wandu Wose

Wubaa ghwa Jerusalemu ghuchagha

¹ Wuka ee Jerusalemu kung'ale-ng'ale, angu mwengere ghwako ghwameria kucha; na wubaa ghwa BWANA ghwameria kukaia aighu kwako.

² Ola ndoenyi kuchafinikirwa kira, na kira kibaa chichawifinikira wandu; ela oho, Mlungu uchakulangalishira mwengere, na wubaa ghwake ghuchawoneka aighu kwako.

³ Mbari ra wandu richaghuchea mwengere ghwako, na wazuri wicharudwa ni kuela kwa kuwusirwa kwako.

⁴ Wusira meso ghako kuzighane chia rose kuwone; wandu wako wose wakwanyika chiaimweri waawuyakuchea; wana wako wa womi wichacha kufuma kula, na wana wako wa waka wichadukwa mikonunyi.

⁵ Niko oho kuchawona na kuelwa ni ngolo, ngolo yako ichakaia na iseko na kuboilwa; kwa kukaia kucharedelwa mali nyingi kwa chia ya bahari, mali ra wandu wa iro mbari richaredwa kwako.

⁶ Longo lwa ngamila richacha richuo kwako, wana wa ngamila wifumie Midiani na Efa; iro rose kufuma Sheba richakuchea. Richareda dhahabu na marumba, wikieresha agho makaso gha BWANA.

⁷ Ng'ondi rose ra Kedari richaredwa kwako, na bauru ra Nebaiothi richafunywa kwa wudumiki ghwa BWANA; naro richarumirilwa kukaia kizongona aighu madhabahunyi kwake, nao uchaipamba Hekalu yake ikumikie na wubaa mungi.

⁸ Ni vilamboki ivi vighendagha seji ni marundu, karakara na mbughi riwuyagha vijunginyi kwawo?

⁹ Ni meli ra Tarshishi richagha kufuma kula cha masanga ghwa pwani; rawuyareda wana wako wa womi, chiaimweri na feza na dhahabu rawo; kujineka ishima irina ja BWANA Mlungu wako, na Mlungu uo Mweli wa Israeli; kwa kukaia wamerie kukuneka wubaa.

¹⁰ BWANA waghuzera muzi ghwa Jerusalemu huwu, “Waghenyi wichaagha sena mawurigha ghako, na wazuri wawo wichakudumikia; angu nerekukabieghe kwa machu ghapo, ela kwa kukunda kwapo koni, nerekufueghe wughoma.

¹¹ Minyango yako ichakaia iari ngelo rose, ndeichaarughwa nadime hata nakio anduangi; eri wandu wa iro mbari wipate kukuredia mali, wikilongozwa ni wazuri wawo.

¹² Ela mbari ra wandu na wuzuri ugho ghose ghusekudumikiagha oho, ghuchatota; na mbari yaro ichasia toe.

¹³ “Kuboa kose kwa mbau ra Lebanoni kucharedwa kwako; misumbesu, mitidhari, na mibunduki, kupate kuipamba Hekalu yapo ya wueli, nani nichakughokesha andu kowikiria maghu ghapo.

¹⁴ Wana wa womi wa awo wandu werekukorongieghe, wichacha na kukughoghomia; na wose werekumenyereghe, wichakughoghomia hata maghunyi kwako; wichakuwanga, ‘Muzi ghwa BWANA, Jerusalemu muzi ghwa Mlungu Mweli wa Israeli.’

¹⁵ “Sa iji koni korelegheloghe na kumenywa, kukasowa hata mndungi oidiria kwako; niko koni nichaakubonya kuwoneke wa wubaa na kuboilwa kwa kala na kala.

¹⁶ Mbari ra wandu na wazuri wichakulindia seji mreri ulelagha wana; na oho kuchamanya angu Ini BWANA ne Mkiri wako, sena ne Mkomboli wako Uo Uwadie Ndighi wa Jakobo.

¹⁷ “Nichakuredia dhahabu wulalo ghwa shaba, na feza wulalo ghwa chuma; nichakuredia shaba wulalo ghwa mbau, na chuma wulalo ghwa igho; nichawibonya wabaa wako wiikunde sere, na wanyapara wako wiikunde hachi.

¹⁸ Lwaka lokorongwa ndeluchaasikirika isangenyi kwako, hata kudwalwa wunyika na kutoteshwa ndevichaawoneka andenyi ya mano yako. Wurigha ghwako kuchaghuwanga, ‘Kukia;’ na mbenge rako kuchariwanga, ‘Makaso.’

¹⁹ “Iruwa ndejichaakaia mwengere ghwako ngelo ya nadime, hata mori ndeghuchaakaia mwengere ghwako ngelo ya nakio anduangi; ela ini BWANA nichakaia mwengere ghwako ghwa kala na kala, na ini Mlungu wako nichakaia nuo wubaa ghwako.

²⁰ Iruwa jako ndejichaaneng'ena, hata mori ghwako ndeghuchaasia; kwa kukaia ini BWANA nichakaia mwengere ghwako ghwa kala na kala, na matuku gha wasi ghwako ghichasia.

²¹ Wandu wako wose wichakaia webonya hachi, nawo wichajiwusa ijo isanga kwa kala na kala. Awo ni mavalo ghapo na kazi ya mikonu yapo, eri nipate kunekwa wubaa.

²² Uo mtini uchawuya kichuku, na uo mtini putu uchawuya mbari iwadie ndighi Ini ne BWANA, nichashashira ilagho ijo kwa ngelo yaro.”