Biblia Todo Logo
Bìoball air-loidhne

- Sanasan -

ISAYA 59 - Biblia Ilagho Jiboie Kwa Wandu Wose


Mlodi kutanya kaung'a ra wandu

1 Olenyi mkonu ghwa BWANA ndeghupungue ghusedimagha kukira, hata madu ghake ndeghiriwie wei ghilemo ni kusikira;

2 ela mawiwi ghenyu nigho ghimtanyire na Mlungu onyu, na kaung'a renyu niro rimshekerie Mlungu usemzighane, hata usedime kumsikira.

3 Kwa kukaia mikonu yenyu yalushiro ni bagha ra wandu muwibwaghie, na vala venyu vachulwa ni wuwiwi; memu yenyu eechulwa ni kudeda malagho gha tee, na chumi renyu rachulwa ni kughora kiwiwi.

4 Ndekuwadie ungi onyu ughendagha kotinyi ukikaia na hachi, hata ndekuwadie ungi onyu ukaiagha mloli kwa sharia. Mwakusaghika kwa malagho gha duu, mkighora tee, mwachua mikalo emredia wuwiwi.

5 Mwakaia sa wandu wikongodagha maghi gha choka na kuluka midambo-dambo ya mbughi-mbughi; uo mundu ujagha agho maghi wadafwa; na mndungi ukabara ijo ighi, choka yadafuma.

6 Midambo-dambo yaro ndeichaafwana kwa kuluka nguwo, hata wandu ndewidimagha kukufinikira iro nguwo mwaribonya. Kazi renyu ni mbiwi, na mikonu yenyu yachua mabonyo ghizamie.

7 Mwaghenda na iseghe kubonya wuwiwi, mwashashira kudia bagha ya wandu wisene ikosa jingi. Maririkanyo ghenyu ni gha wuwiwi, na andu kose mwidagha mwadabonya mawiwi ghenona.

8 Ndemuichi chia ya sere, hata mighendo yenyu ndeiwadie hachi ingi anduangi. Mwarinonie chia renyu, hata mndungi ukarinugha ndechaimanya chia ya sere anduangi.


Wandu kurumiria kaung'a yawo

9 Wandu waghamba, “Ni kwa wundu ughu ndediwuebonyerwa hachi, hata ndediwuepata loli ingi anduangi; dalola mwengere, ela daawuyapata kira; dasuwiria kuwona mwengere ela daawuyaghenda kirenyi.

10 Dawuyaadada wurigha sa vitungure, na sa wandu wisewadie meso. Diakuwa na dime ghadi seji daawuyaghenda nakio, nesi dawoneka sa wafu aghadi ya wandu wiwadie ndighi.

11 Diaruma karakara na kibarabara, dialila na kusirimika kwa wasi sa mbughi; dailola hachi dikaisowa, na kukia kukakaia kula nesi.

12 “Angu makosa ghedu ghachurikia nandighi; kaung'a redu radishitakia. Isi darimanya to.

13 Dakukosere na kukukana ee BWANA, daghalukie na mbai dikalemwa ni kukunugha oho Mlungu odu. Dadedie wuwiwi dikakulegha, dikiririkanya mawiwi na kudeda malagho gha tee kufuma ngolonyi kodu.

14 Daiwikie na mbai iyo loli, na hachi ikakaia kula nesi; kwa kukaia loli yamerie kulaghashwa wandunyi, wuloli ndeghuwadie wulalo.

15 Loli yasowekie; na uo ukutanyagha na wuwiwi, waakungira wasinyi.” BWANA wawonie maza iri ukazamilwa na ndighi, angu hachi iseko.


BWANA kukufunya kuwivuvua wandu wake

16 Orezighanireghe ukashinika kuwona angu ndekorekoghe na mndungi odima kukotia maza iri; niko ukaghorua mkonu ghwake ghoni kureda wusimi, na kuwikira wandu wake kwa hachi yake.

17 Wakurushire hachi sa ngao ya laghenyi, na kukia sa kofia ya chuma chongonyi kwake. Warwae kisasi sa nguwo rake, na kukurigha lubio sa nguwo ekumba.

18 Uchawikaba wawiwi kunughana na mabonyo ghawo, na kuluya lugho kwa wamaiza wake. Uchaluya lugho hata kwa awo wiko masanga gha pwani.

19 Kwa huwo, kufuma magharibi hata mashariki, wandu wichajiobua irina ja BWANA, na wubaa ghwake; kwa kukaia uchacha sa machi gha moda m'baa ghuenjwagha ni kuweta kwa mbeo ifumagha kwa BWANA.

20 BWANA waghamba, “Nichacha Jerusalemu kumkombua inyo kivalwa cha Jakobo, mghalukagha na kusigha makosa ghenyu.

21 “Nichabonya ilaghano japo nenyo huwu: Uo Roho wapo uko aighu konyu, na malagho ghapo naghingira memunyi konyu, ndeghichaafuma memunyi konyu, na memunyi kwa wana wenyu, hata memunyi kwa weke wawayo kufuma idana, hata kwa kala na kala.”

©Bible Society of Kenya, 1997

All rights reserved.

Bible Society of Kenya
Lean sinn:



Sanasan