ISAYA 58 - Biblia Ilagho Jiboie Kwa Wandu Wose

Kufunga tumu kwa loli

¹ BWANA waghamba, “Ghora kwa lwaka lubaa, kusakeleka; wusira lwaka lwako sa tarumbeta, kuwighorie wandu wapo ikosa jawo, na kivalwa cha Israeli kuchighorie kaung'a rawo.

² Sena hoku waawuyanilola kula ituku, wikikunda kurimanya chia rapo, sa wandu wa hachi, na sa wandu wiserisighie sharia ra Mlungu wawo. Wakunda kupata kutanya kwa hachi na kukunda kusoghoda kaavui na Mlungu.”

³ Wandu wakotia BWANA, “Kwaki difungie tumu sena kusewonagha? Kwaki dakusera na ndighi huwu, na oho ndekutalie ilagho ijo?” Na BWANA wawitumbulia huwu, “Olenyi mwadakuboia mmbeni ngelo yenyu efunga tumu, na kuwikoronga wabonyi kazi wenyu.

⁴ Olenyi kufunga tumu konyu ni korashana na kulwa, na kubulana na ngonde. Kufunga konyu kwa idana ndekudimagha kubonya malombi ghenyu ghisigharike mlungunyi.

⁵ Munizera uku ni kufunga tumu nerekusaghueghe ini, wei mundu ukusere kwa wasi na kughoghomesha chongo chake sa lunyasi, na kurwa nguwo ra magunia chiaimweri na kulala ivunyi? Mwadima kughamba uku ni kufunga tumu na ituku nijirumiriagha ini BWANA?

⁶ “Nechi kufunga tumu nikukunde ini ni uku: kuvifungua vifungo va makorongo, kuinja ghongolo isena hachi, na kumlekeria uo ukorongelo ukaie huru, chiaimweri na kuchikanya kula ghongolo?

⁷ Nechi ni kummbaghia vindo vako uo usowie, na kumngira nyumbenyi kwako uo mkiwa usena wulalo; na iji kwammbona mundu uko duu, kumrushe nguwo, hata kuseleghe kumtesia mndungi wa kichuku chako.

⁸ “Aho niko mwengere ghwako ghuchang'ala-ng'ala sa kuela kwa ndoe, na oho kuchaboiswa shwa wori. Hachi yako ichakukiria imbiri kwako, na wubaa ghwapo ini BWANA ghuchakaia nanyuma yako kukulindia.

⁹ Niko aho kuchaniwanga ini BWANA, nani nichakudika, kuchanikemia nani nichaghamba: Neko aha. “Iji kwaleka kukoronga, na kuloda na chala kukideda kiwiwi,

¹⁰ na iji kwawineka vindo awo wisowagha, na kuwikatishira bea rawo awo wikorongelo. Aho niko kira chikumarie chia rose chichaaghaluswa chikaie sa mwengere ghwa dime ghadi.

¹¹ Na ini BWANA nichakughenja kari kose, na kukukatishira bea rako kwa vindo vicha vose; na kukubonya kukaie na ndighi sa mbuwa inyoshero machi na ndoria ya machi ghisesiagha.

¹² Wandu wako wichaagha maghacho ghenyu gha kala, kuchaiagha na kuiwusira misingi ya kokala uko; na oho kuchawangwa m'boisi wa mawurigha wuwishi, na M'boisi chia, eri wandu wipate kukaia andenyi ya muzi.”

Malipo ghelindia Sabato

¹³ BWANA waghamba, “Kukalindia mighendo yako kuseinonagha Sabato, na kukulindia kusenughe bea rako kwa ituku japo jielie, na kujiwanga ijo ituku ja Sabato jiboie ja wueli, na ituku ja BWANA ja ishima; kukajineka ishima na kulegha ghenda charo, kusebonyagha kazi angu kuja malagho gha duu,

¹⁴ niko aho kuchaaboilwa andenyi kwapo ini BWANA, nani nichakubonya kukaie nicha ndoenyi; sena nichakughudisha na ifwa ja ndeyo Jakobo, kwa kukaia ini BWANA najighora ilagho iji.”