ISAYA 55 - Biblia Ilagho Jiboie Kwa Wandu Wose

Ifunyo ja Mlungu ja wughoma

¹ BWANA waghamba, “Okenyi kula mundu uomagha ndeche machinyi; na uo usewadie pesa, ndeche ughuo uje. Choonyi mghuo divei na mariwa, kuseko na pesa angu zoghori.

² Kwaki mtumiagha pesa renyu kwa kilambo chiseko vindo; na kudumika kwa icho chiseghudishagha? Nisikirenyi nicha mpate kuja mecha, na kuboilwa andenyi ya agho manori.

³ “Deghenyi madu ghenyu munichee, sikirenyi, mpate kukaia moyo; nani nichabonya ilaghano ja kala na kala andwamweri nenyo, kwa wundu ghwa lukundo lwapo lwa loli lukatie kwa Daudi.

⁴ Olenyi nam'bonyere ukaie wushuhuda kwa wandu, kilongozi na m'baa wa wandu.

⁵ Ola, kuchawanga mbari ra wandu kusewiichi, na iro mbari ra wandu wiserekumanyireghe, wichakukimbiria; kwa wundu ghwapo ini BWANA Mlungu wako, Mlungu Mweli wa Israeli; angu namerie kukuneka wubaa.”

⁶ Mlolenyi BWANA, ingelo upatikagha, mmbangenyi ingelo uko kaavui;

⁷ uo mundu mmbiwi ndeisighe chia yake, na uo useko na hachi usighe maghesho ghake; ndemghalukie BWANA upate kufuilwa wughoma putu. Ndeghaluke cha kwa Mlungu odu, nao uchamfuya wughoma putu.

⁸ BWANA waghamba, “Maririkanyo ghapo ndeghiko sa ghenyu, hata chia rapo nderiko sa chia renyu anduangi.

⁹ Sa iji koni mlungunyi kuko ighu kuchumba ndoenyi, niko koni na chia rapo riko ighu kuchumba renyu.

¹⁰ “Sa iji koni vua na barafu inyagha kufuma mlungunyi, nayo ndeiwuyagha, ela yadainyoshera ndoe; na kuibonya ifunye mavalo na kuzoghua, na kumneka mbeu uo orewaeghe chiaimweri na vindo veja,

¹¹ niko koni na ilagho jifumagha momunyi kwapo, ndejichaaniwuria iduu, ela jichakatisha agho makusudi ghapo gha kujiduma, najo jichawona nicha kwa kula ilagho nerejidumieghe.

¹² “Mchasigha Babuloni kwa kuboilwa, nenyo mchalongozwa cha shighadi kwa sere; mighondi mibaa na mitini ichawoka kubora imbiri konyu, na midi yose iko mlambenyi ichakaba chui.

¹³ Wulalo ghwa minjwa kuchabuka msumbesu, na wulalo ghwa mndandangoma kuchabuka mhadasi. Ilagho iji jichakaia lukumbuso kwapo ini BWANA, na alama ya kala na kala isechaainjika jingi.”