ISAYA 54 - Biblia Ilagho Jiboie Kwa Wandu Wose

Lukundo lwa BWANA kwa Israeli

¹ BWANA waghamba, “Bora ee Jerusalemu, kuko sa muka uko kolowi, bora nandighi kwa kuboilwa, oho jingi kusekumbie lufu! Wana wako wichakaia wengi, kuchumba wa muka ulowolo.

² Churia wulalo ghwa hema yako, na pazia raro rishabulo, kusesighe kuchuria wulacha ghwa kamba rako, na vigingi varo vikaie vimange.

³ Angu kuchashabuka nandighi, chia ya mkonu ghwa kiwomi na ghwa kiwaka. Kivalwa chako chichawada isanga jawo jerekailoghe ni iro mbari ra wandu, na mizi yaro ichachua wandu.

⁴ “Kusakeobua, kwa kukaia ndekuchaafwa waya; kusekambo ni chongo, kwa kukaia ndekuchaafushwa waya; angu kuchaliwa waya ghwa wurika ghwako, na masholio gha wuka wukiwa ghwako ndekuchaaghikumbuka sena anduangi.

⁵ Kwa kukaia Muumbi wako nuo sa mumi wako, irina jake ni BWANA wa majeshi; na Mkomboli wako ni Mlungu Mweli wa Israeli, wadawangwa Mlungu wa wurumwengu ghose.

⁶ Ini BWANA nakuwangie, sa muka uleghelo na kusirimika rohonyi, sa muka mkoo uleghelo na kukumbwa noko; nani naghamba,

⁷ “Nerekusighieghe kwa ngelo vui, ela nichakuwunja kwa wughoma m'baa.

⁸ Kwa kapindi katini serekuzighanireghe ngikaia na machu mengi, ela kwa lukundo lwa kala na kala, nichakaia na wughoma aighu yako; naghamba ini BWANA, Mkomboli wako.

⁹ “Agha naghifwananisha na matuku gha Nuhu, sa iji koni nereghemieghe kwa Nuhu kukaia machi mengi ndeghichaacha ndoenyi sena, niko koni naghema kukaia sichaakaia na machu na oho, hata sichaakubukia anduangi.

¹⁰ Mighondi mibaa na mitini yadima kuinjwa, ela lukundo lwapo lukatie ndeluchaainjwa kwako, na ilaghano japo ja sere sichaajiinja. Naghamba ini BWANA, uo ukuwoniagha wughoma.

Jerusalemu mbishi

¹¹ “Ee Jerusalemu, muzi kukorongelo na kukumbwa-kumbwa ni kiremba, kusewadie mndungi wa kukuhoresha, ola nichaiagha misingi yako kwa magho gha zoghori mbaa gha safire.

¹² Nichaiagha minara yako kwa magho ghiboie gha rubi, na minyango yako ichakaia ya lulu; wurigha ghwako ghose nichaghuagha kwa magho gha zoghori mbaa.

¹³ Nichawifundisha wana wako wose, nawo wichawona nicha na sere.

¹⁴ Kuchamangishwa kwa hachi, na makorongo ghichakaia kula na oho, kwa kukaia ndekuchaakaia na wowa, hata kiture; angu vichakaia kula na oho.

¹⁵ Mndungi ukakufunya kulwa na oho, ugho wuda ndeghufumie kwapo; uo ose uchaabonya wuda na oho uchaghwa moni.

¹⁶ “Ola ini namuumbie mchani vuma, ukoragha na kupuputa modo ghwa maka; nao waboisa maswagha ghefwana kazi yaro. Sena wokoni namuumbie mnoni, uo unonagha.

¹⁷ Ndekuwawdie iswagha jingi jiboisiro jelwa na oho jichaasima, na kula mundu uchaakaianya kimusi na oho kutanyonyi kuchamsima. Iji nijo ifwa ja wadumiki wa BWANA, na wudederii ghwawo ghuafuma kwapo.”