ISAYA 52 - Biblia Ilagho Jiboie Kwa Wandu Wose

BWANA kuikombua Jerusalemu

¹ Wuka! Wuka kukurushe ndighi rako ee Jerusalemu; rwaa nguwo rako righokie ee Jerusalemu muzi ghwa wueli. Mndungi useshamishiro angu useelie jingi ndechaangia kwako sena anduangi.

² Wuka kukuanguo teri ee Jerusalemu kuko wunyikenyi; funyenyi minyororo iko singonyi konyu, ee wandu wa Jerusalemu muko wunyikenyi.

³ BWANA waghamba huwu: “Modeuzwa kuseko na ighuri, nenyo mchakombolwa kuseko na malipo ghangi.

⁴ Angu inyo wandu wapo moreserieghe imbiri, mkakaia kiwughenyi isanga ja Misri, na Muashuri ukamkoronga duu.

⁵ Idana nibonyaki aha, ikakaia wandu wapo wadwalwa wunyika cha Babuloni duu? Awo widuewibonyera nguma waawuyalila, na matuku ghose irina japo jaawuyasholelwa.

⁶ Kwa huwo wandu wapo wichanimanya ituku jija kukaia, ni Ini nidedagha, na ni Ini niko aha.”

⁷ Kwaboie saki kummbona mdumwa ukighenda aighu mighondinyi, kwa wundu ghoeresha malagho mecha; uo uereshagha sere kwa kureda malagho mecha gha kukia; na kughuzera muzi ghwa Jerusalemu, “Mlungu wako wabonya nguma.”

⁸ Sikira! Chwaka ra walindiri wako, wabora chiaimweri kwa kuboilwa; angu wammbona BWANA ukiwuya cha Jerusalemu, worinyi mesonyi kwawo.

⁹ Wusirenyi chwaka m'bore chiaimweri, inyo maghacho gha Jerusalemu; kwa kukaia BWANA wawihoresha wandu wake, waghukombua muzi ghwa Jerusalemu.

¹⁰ BWANA wawonyera ndighi rake ra wueli worinyi, mesonyi kwa mbari rose ra wandu; na kutua kwa ndoenyi kose, kuchawona kukia kwa Mlungu odu.

¹¹ Fumenyi, mfume Babuloni mghende noko, mseadade kindo chingi chiseelie; fumenyi aghadi kwake mkueleshe mmbeni; inyo mmbose muvidwagha vilambo va BWANA.

¹² Kwa kukaia ndemchaafuma kwa shwa-shwa hata ndemchaakimbia, Angu BWANA uchamkiria imbiri konyu, uo Mlungu wa Israeli uchakaia mlindiri onyu nanyuma.

Mdumiki utiririkagha

¹³ BWANA waghamba, “Olenyi mdumiki wapo uchawona nicha, uchakumwa na kujoswa ighu; nao uchakaia ighu na ndighi.

¹⁴ Wandu wengi weremshinikieghe, kwa kuwona fwana yake seji inonelo nandighi kuchumba mdamu uo ose.

¹⁵ Kwa huwo uchawishinua wandu wa mbari nyingi, na wazuri wichanyama kima kwa wundu ghwake; angu wichawona iro maza wisereghoreloghe, na kuritambua iro maza wisererisikireghe anduangi.”